Əli Mustafa: “Sarkisyanın məktubu sübut edir ki, Ermənistan Rusiyanın vassalı olub”
Ermənistan hökuməti "Qarabağ münaqişəsinin nizamlanması üzrə danışıqlar prosesinin Sənədləri"ni dərc edib. Hökumətin saytında cəmi 13 sənəd dərc olunub.
Yayımlanan materiallar arasında 2016-cı ilin avqustunda Serj Sarkisyanın Vladimir Putinə ünvanladığı məktub da yer alır. Sarkisyan məktubun giriş hissəsində Moskvanın “Qarabağ müharibəsinin silahlı fazasını dayandıran əsas qüvvə” olduğunu qeyd edir və Rusiya olmadan bölgədə balansı saxlamağın mümkün olmadığını etiraf edir. Sarkisyan məktubda Azərbaycan ordusunun güclənməsindən və Bakının “5 rayonun qaytarılması” istiqamətində tələblərindən ciddi narahat olduğunu gizlətmir. O, açıq şəkildə yazır ki, əgər Azərbaycan 5 rayonu geri alsa, bundan sonra daha sərt şərtlər irəli sürəcək, Ermənistan üzərində hərbi-siyasi üstünlük daha da möhkəmlənəcək.
Heç kəsə sirr deyil ki, o zaman Qarabağın işğalında Rusiyanın böyük rolu olub. Əslində bu məktubu açmaqla Paşinyan Putini ifşa edir. Faktiki olaraq deyir ki, Azərbaycanın bütün işğal prosesini Moskva hazırlayıb. Qısası, Sarkisyan Putinə xəbərdarlıq edir ki, kömək etməsən birlikdə regionda yaratdığımız status-kvonu Azərbaycan dəyişəcək.
“Ona görə də işğalı davam etdirmək üçün məhz Moskvadan kömək istəyib”
Sözügedən məsələ ilə bağlı fikirlərini “Bakı-Xəbər”lə bölüşən siyasi şərhçi Əli Mustafa hesab edir ki, həqiqətən də Qarabağın işğalını Ermənistanla Rusiyanın birgə həyata keçirdiyi ortaya çıxır: “Rusiyanın bilavasitə hərbi dəstəyi olmasaydı, Ermənistan nə ərazilərimizi işğal edə bilərdi, nə də bunun 30 ilə yaxın mövcud olması mümkün olardı. Otuz ilə yaxın ərazilərimizin işğal altında qalmasında Rusiyanın rolu böyük olub. Məhz 2016-cı ildə Rusiya hakimiyyəti imkan vermədi ki, Azərbaycan ərazilərini tam azad etsin. 1988-ci ildə Qarabağda erməni separatizmi başlayanda ovaxtki SSRİ rəhbərliyi bunu önləməklə bağlı lazım olan tədbirləri görmədi. Tam əksinə, separatçıları qorudular, silahlandırdılar. 1991-ci ildə SSRİ dağılandan sonra bilavasitə Rusiya dövləti Ermənistanın arxasında durdu. Nəticədə Qarabağ və ətraf 7 rayon işğal edildi. Kiçik Ermənistanda o qədər potensial haradan idi ki, Azərbaycan ərazilərini işğal etsin? Təbii ki, Rusiyanın hesabına işğal həyata keçirildi. Rusiya Cənubi Qafqazda təsir dairəsini qorumaq üçün Qarabağ məsələsindən uzun illər bir vasitə kimi istifadə edib. Qarabağda separatçı quldurları 1998-ci ildə Ermənistanda hakimiyyətə gətirən Rusiya olub. Onların başında da Robert Köçəryanla Serj Sarkisyan olub. Rusiyaya bağlı “Qarabağ klanı” 20 il Ermənistanda hakimiyyətdə olub. Rusiya heç vaxt maraqlı olmayıb ki, Qarabağ məsələsi birdəfəlik həll edilsin. Hətta Qarabağın ətraf rayonlarını belə Ermənistan qaytarmaq istəmirdi. Sarkisyanın məktubu sübut edir ki, Ermənistan Rusiyanın vassalı olub. Ona görə də işğalı davam etdirmək üçün məhz Moskvadan kömək istəyib. O baxımdan yaxşıdır ki, Paşinyan hakimiyyəti arxivləri açaraq həqiqəti ortaya qoyur. Bu, bir daha baş verənləri dünyaya göstərir ki, işğalın arxasında həm də Rusiya dayanıb”.
Vidadi ORDAHALLI
