Aydın Mirzəzadə: “Məqsəd də, nə olur-olsun, qısa zamanda Azərbaycan-Ermənistan münaqişəsini dayandırmaq idi”
Ermənistan hökuməti Qarabağ nizamlanması ətrafında təxminən otuz illik danışıqlar prosesi ilə bağlı çoxlu sayda sənəd dərc edib.
Erməni mediasında yayılan məlumata görə, aşkarlanan çoxsaylı diplomatik epizodlar arasında Qarabağın Mehri ilə dəyişdirilməsi məsələsinin müzakirəsi xüsusi yer tutur. “İllərdir ki, erməni siyasətçiləri bu epizodu sanki qəribə bir oyuna cəlb olunmuş kimi təsvir etməyə çalışıblar, lakin sənədlərin dərc olunması təsdiqləyir ki, əslində bu, Heydər Əliyevin diplomatik bacarığının nümayişi idi. O, danışıqlar mövqelərini elə qurmağı bacardı ki, Ermənistan tərəfindən tətbiq edilən "üçtərəfli subyektivlik" ideyası iflasa uğradı və Xankəndidəki qanunsuz qurum heç bir beynəlxalq legitimliyə malik olmadığı üçün danışıqlar meydanından çıxarıldı. İddiaların əsl ünvanı olan Ermənistanla tək qalan Azərbaycan illər sonra İrəvanda heç kimin mübahisə edə bilməyəcəyi strateji bir dönüş nöqtəsinə nail oldu”-deyə media yazıb.
Ermənistanda açıqlanmış bu sənədlər Mehri ilə Qarabağın dəyişdirilməsinə dair də müəyyən məlumatları açır. Qeyd olunur ki, ermənilər bunu başqa cür başa düşsələr də, amma bu, Heydər Əliyevin diplomatik məharətini ortaya qoydu. Heydər Əliyev bu mövzunu ortaya atmaqla Dağlıq Qarabağı danışıqlar prosesindən faktiki olaraq çıxardı. Yəni təklif ABŞ tərəfindən verilsə də, erməni mediası etiraf edir ki, Heydər Əliyev qondarma rejimi danışıqlar masasından uzaqlaşdırmağa nail olmaqla Qarabağın Azərbaycana məxsus olduğunu nümayiş etdirib.
“Ermənistan marionet rejimi danışıqların bir tərəfi kimi stol arxasında əyləşdirə bilmədi”
Məsələ ilə bağlı “Bakı-Xəbər”ə açıqlamasında millət vəkili Aydın Mirzəzadə bildirdi ki, bu variant ABŞ tərəfindən təklif edilmişdi: “Məqsəd də, nə olur-olsun, qısa zamanda Azərbaycan-Ermənistan münaqişəsini dayandırmaq idi. Azərbaycan üçün əsas olan işğal altında olan torpaqlarının azad edilməsi idi. Heç bir zaman Azərbaycan Dağlıq Qarabağın, o cümlədən, Şuşanın, Laçının Ermənistana verilməsinə razılıq verə bilməzdi. Prinsip etibarı ilə söhbət ərazilərin dəyişdirilməsindən deyil, Ermənistanın işğal etdiyi Azərbaycan torpaqlarından çıxarılmasından gedirdi. Bu həmişə əsas məqsəd kimi danışıqlarda müzakirə mövzusu idi. Digər tərəfdən isə, Ermənistan nə qədər çalışsa da, işğal etdikləri ərazilərdə qurduqları marionet rejimi danışıqların bir tərəfi kimi stol arxasında əyləşdirə bilmədi. Bu mümkün olan məsələ deyildi. Aparılan siyasət Azərbaycanın gücünü, öz torpaqlarına sahibliyini göstərdi və bu gün də torpaqlarımızın işğaldan azad edilməsinə gətirib çıxardı”-deyə A.Mirzəzadə bildirdi.
İradə SARIYEVA
