Faiq Ələkbərli: “Türkiyə dövləti Bərzanidən izahat tələb edir, heç şübhəsiz, Bahçeli də ona yönələn bu aşağılayıcı sözlərə gərəkli cavab verəcək”
İraqdakı Kürdüstan Demokrat Partiyasının (KDP) sədri Məsud Bərzani onun Türkiyənin Şırnak bölgəsində təşkil edilən 4-cü Beynəlxalq Melaye Ciziri Simpoziumuna avtomatla silahlanmış kamuflyajlı cangüdənlərlə qatılmasına Milliyyətçi Hərəkat Partiyasının (MHP) lideri Dövlət Baxçalının sərt reaksiyasına cavab olaraq, MHP başçısını “qoyun dərisi geyinən qoca qurd” adlandırıb. “Allahın Dövlət Bahçeliyə hidayət verdiyini, onun irqçilik və şovinizmdən əl çəkdiyini düşündük. Ancaq görünür, o hələ də eyni qoca Boz Qurddur, ancaq indi qoyun paltarı geyinib”-deyə M.Bərzani bildirib.
Baki-xeber.com-un məlumatına görə, Baxçalı “Türkgün” qəzetinə açıqlamasında silahlı mühafizəçilərin görüntülərini “rüsvayçılıq” kimi qiymətləndirərək sərt tənqidlər səsləndirib.
MHP sədri İraq Kürdüstan Regional Rəhbərliyinin keçmiş sədri və Kürdüstan Demokratik Partiyasının lideri olan Məsud Bərzaninin Şırnakda qatıldığı simpoziumun şouya çevrildiyini bildirərək qeyd edib: “Xarici geyimli əsgərlərin vətənimizdə uzun müddət silahla dolaşması sadəcə biabırçılıqdır. Türkiyə Respublikasının qanunları pozulmuşdur, bu, Türkiyə Respublikasının nüfuzuna qəsdən edilən zərbədir”. Bərzaninin Baxçalını bu şəkildə adlandırmasına cavab olaraq Türkiyədə hakim AKP-nin sözçüsü Ömər Çelik bildirib ki, Daxili İşlər Nazirliyi Bərzaninin ölkəyə avtomat silahlı şəxslərlə gəlməsi faktını araşdırır. O, bu fakta etiraz edən MHP sədri Baxçalının bəyanatına cavab olaraq Bərzaninin ofisindən MHP liderinə qarşı irqçi məzmunlu bəyanatı da qəbuledilməz sayıb: “Qeyd edilən görüntü, əlbəttə ki, xoşagəlməz və ikrah yaradan şərhlər üçün əsas yaradıb. Daxili İşlər Nazirliyi bu məsələ ilə bağlı araşdırma aparır. Nəticə etibarilə, cənab Bərzani aktiv xidmətdə olan biri olmasa da, Türkiyə dövləti onun təhlükəsizliyini təmin etməyə qadir gücə sahib ölkədir. Cənab Baxçalı haqqında Bərzaninin ofisi adından hörmətsiz bir mesaj yayımlandı. Bu, təbii ki, hörmətsizlikdir. Qarşı tərəf irqçi və faşist kimi ifadələrdən istifadə edib. Cənab Baxçalı isə o açıqlamanı verərkən Bərzanini qoruyan cangüdənlərə toxunub, onun şəxsinə yox... Onun ofisinin açıqlaması birbaşa cənab Baxçalıya hörmətsizlikdir. Bu, qəbuledilməzdir və dərhal düzəldilməlidir".
Rəsmi Ankara Kürdüstan Demokratik Partiyasının rəhbərliyindən rəsmi şəkildə izahat tələb etdiyini və məsuliyyət daşıyanlara qarşı dərhal tədbir görülməsini tələb etdiyini bildirib.
“Türkiyə dövlətinin ədalətindən, səmiyyətindən sui-istifadə etməyə çalışırlar”
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru, siyasi ekspert Faiq Ələkbərli “Bakı-Xəbər”ə bildirdi ki, Türkiyə hökumətinin kürd terror təşkilatı, xüsusilə də PKK-nın ləğv edilməsi və silahlı terrorçuları ölkə ərazisindən çıxarması prosesi gedir. Türkiyə hökumətinin terrora son qoyulması istiqamətində kifayət qədər ciddi addımlar atdığını və bu məsələdə şəffalığı qorumağa çalışdığını deyən F.Ələkbərli qeyd etdi ki, rəsmi Ankaranın cəhdlərinə baxmayaraq, sözügedən terror təşkilatının arxasında dayanan qüvvələr, onların himayəçiləri rahat dayanmaq istəmirlər. “Elə İraq kürdlərinin başında dayananların da müəyyən açıqlamaları göstərir ki, onlar Türkiyə dövlətinin ədalətindən, səmiyyətindən sui-istifadə etməyə çalışırlar. Xüsuslə də Dövlət Baxçalını “qoyun dərisi geymiş qoca Boz Qurd” adlandırmaqla öz mahiyyətlərini ifadə edirlər. Bu doğru ifadə deyil. Bu ifadənin əvəzinə başqa bir ifadə seçilsəydi daha uyğun olardı. “Boz Qurd dərisində qoca qurd” deyilə bilərdi ki, o bunu deməyib, məhz “qoyun” ifadəsi işlədib. Bu da Baxçalıya qarşı yönələn aşağılayıcı fikirdir.
Bahçeli zaman-zaman Türkiyə dövlətinin bütövlüyü ilə bağlı fikirlər səsləndirib. Onlar da bunu qeyri-səmimilik kimi qələmə vermək istəyirlər.
Baş verənləri, təbii ki, Türkiyə dövləti qarşılıqsız qoymayacaq, bu addıma qarşı tədbir görüləcək. Bununla bağlı müvafiq addımlar atılacaq”.
F.Ələkbərli qeyd etdi ki, eyni zamanda Cumhuriyyət İttifaqına daxil olan D. Bahçeli də kürd liderin fikirlərini cavabsız qoymayacaq. “Türkiyə dövləti Bərzanidən izahat tələb edir, heç şübhəsiz, Baxçalı da ona yönələn bu aşağılayıcı sözlərə gərəkli cavab verəcək. Bu gün Türkiyədə sülh və barış üçün mübarizə aparılır. Bu məsələdə ciddi problem yaratmaq istəyən qüvvələr çalışırlar ki, bu proses yolunda getməsin. Amma inanırıq ki, Türkiyə dövləti öz dərin siyasəti ilə bu problemləri həll edəcək”-deyə F.Ələkbərli qeyd etdi.
İradə SARIYEVA
