Vüqar Bayramov: “Mərkəzi Asiya ölkələri arasında münasibətlərin daha da dərinləşməsi yeni-yeni imkanlar yaradır”
Bakıda "Avrasiya Nəqliyyat Marşrutu"nun Beynəlxalq Assosiasiyasının təsisçilərinin Ümumi Yığıncağının iclası keçirilib. Azərbaycanın sədrliyi ilə təşkil olunan iclasda Assosiasiya üzvü olan Azərbaycan, Özbəkistan, Qırğızıstan və Tacikistan dəmiryol administrasiyalarının rəhbər heyəti iştirak edib.
“Azərbaycan Dəmir Yolları” QSC-nin (ADY) sədri Rövşən Rüstəmov Çindən Avropaya və əks istiqamətə yükdaşımalarda artımın müşahidə edildiyi bir vaxtda marşrutların şaxələndirilməsinə ehtiyac yarandığını bildirib və bu məqsədlə Avrasiya Nəqliyyat Marşrutunun fəaliyyətinin tam təmin edilməsinin əhəmiyyətini vurğulayıb. Qeyd olunub ki, Orta Dəhlizin cənub qanadı hesab edilən Avrasiya Nəqliyyat Marşrutu Çin, Qırğızıstan, Tacikistan, Özbəkistan, Türkmənistan, Azərbaycan, Gürcüstan və Türkiyəni əhatə edir. Artıq bu aydan Çinin Qaşqar şəhərindən Azərbaycana Qırğızıstan, Özbəkistan və Türkmənistandan keçməklə multimodal daşımalara başlanılıb.
Göründüyü kimi, Çindən Avropaya daha bir nəqliyyat marşrutu açılır. Orta Dəhlizin cənub qanadının əhəmiyyəti artmaqdadır. Bütün bunların iqtisadi dividendlərini ekspertlər necə dəyərləndirir?
“Bütün bunlar Azərbaycan üçün yeni iqtisadi dividendlər və beynəlxalq yükdaşımalardan daha çox gəlirin əldə edilməsi deməkdir”
Sözügedən məsələni “Bakı-Xəbər”ə şərh edən millət vəkili Vüqar Bayramovun fikrincə, həmin layihənin iqtisadi perspektivi böyükdür: “Məsələ ondadır ki, Azərbaycan nəqliyyat və logistika baxımından regionda haba çevrilməkdədir. Nəzərə almaq lazımdır ki, Ələtdə Bakı Beynəlxalq Dəniz Ticarət Limanının imkanlarının genişləndirilməsi, Bakı-Tbilisi-Qars dəmir yolunun ötürmə qabiliyyətinin 1 milyon tondan 5 milyon tona qaldırılması daşımaların artmasına hesablanıb. Eyni zamanda Azərbaycanla Mərkəzi Asiya ölkələri arasında münasibətlərin daha da dərinləşməsi yeni-yeni imkanlar yaradır. Azərbaycanın, Qazaxıstan və Gürcüstanın birgə tarif müəyyən etməklə bağlı razılığa gəlməsi, o cümlədən, Orta Dəhlizin imkanlarının genişləndirilməsi, təbii ki, Azərbaycan üzərindən tranzit daşımaların həcminin artmasına gətirib çıxaracaq. Təbii ki, bütün bunlar Azərbaycan üçün yeni iqtisadi dividendlər və eləcə də beynəlxalq yükdaşımalardan daha çox gəlirin əldə edilməsi deməkdir. O baxımdan beynəlxalq yükdaşımalar Azərbaycanda qeyri-neft sektorunda artıq valyuta daxilolmaları baxımından aparıcı mənbələrdən birinə çevrilməkdədir. Bu da, təbii ki, iqtisadiyyatın şaxələnməsi, ölkəyə daha çox valyutanın daxil olması, eyni zamanda Azərbaycanın geosiyasi mövqeyinin gücləndirilməsi baxımından vacib hesab olunur”.
Vidadi ORDAHALLI
