Qasım Hacıyev: “Azərbaycanın beş ölkə arasından belə bir komitəyə üzv seçilməsi təsadüfi deyil və bu bizim dövlətimizin haqqıdır”
UNESCO-nun Parisdəki Baş Qərargahında Dünya İrs Konvensiyasının iştirakçısı olan Dövlətlərin Baş Assambleyasının 25-ci sessiyasında Azərbaycan 2025-2029-cu illər üçün UNESCO-nun Ümumdünya İrs Komitəsinə üzv seçilib.
Qeyd edək ki, 1972-ci ildə qəbul olunan "Dünya mədəni və təbii irsinin qorunması üzrə Konvensiya"ya indiyədək 196 dövlət qoşulub.
Azərbaycan Xarici İşlər Nazirliyinin verdiyi məlumata görə, Şərqi Avropa regionundan bir yer uğrunda beş ölkə mübarizə aparıb. Azərbaycan birinci turda 160 səsdən 92-ni alıb.
21 üzv dövlətdən ibarət olan Komitə UNESCO-nun Ümumdünya İrs Siyahısının yaradılması, ərazilərin qorunması və Dünya İrs Fondundan vəsaitlərin bölüşdürülməsindən məsuldur. Azərbaycan əvvəllər 2015-ci ildən 2019-cu ilə qədər Komitədə çalışıb və 2019-cu ildə onun 43-cü sessiyasına ev sahibliyi edib.
Budəfəki sessiya zamanı Baş Assambleya Dünya İrs Komitəsinə növbəti dörd il müddətinə 12 üzv seçib: Azərbaycan, Ermənistan, Banqladeş, Çexiya, Qrenada, Küveyt, Monqolustan, Peru, Polşa, İsveçrə, Toqo, Tanzaniya Birləşmiş Respublikası.
Beləliklə, Dünya İrs Komitəsinin hazırkı tərkibi aşağıdakı kimidir:
Azərbaycan, Ermənistan, Banqladeş, Çexiya, Qrenada, Yamayka, Qazaxıstan, Keniya, Küveyt, Livan, Monqolustan, Peru, Polşa, Koreya Respublikası, Seneqal, İsveçrə, Toqo, Türkiyə, Ukrayna, Tanzaniya Birləşmiş Respublikası, Vyetnam.
Azərbaycanın UNESCO-nun Ümumdünya İrs Komitəsinin üzvü seçilməsi Ermənistanda qıcıqla qarşılanıb. Məlumat belə təqdim edilib ki, guya Azərbaycan Qarabağda “erməni mədəni irsini dağıdıb”, UNESCO da belə bir ölkəni Ümumdünya İrs Komitəsinə üzv seçib. Azərbaycanı qaralamaq yolunu tutan İrəvan özü də yaxşı bilir ki, Qarabağda heç bir erməni irsi olmayıb və “mədəni irs” mifi ermənilərin və onların havadarlarının uydurmasıdır.
Məsələ bundadır ki, Ermənistan vaxtilə işğal altında saxladığı Azərbaycan ərazilərini tarimar edib, tarixi, mədəni, dini abidələri yerlə-yeksan edib, dağıdıb, qədim alban irsinə aid olan abidələri, kilsələri, monastır və məbədləri öz adına çıxaraq saxtalaşdırıb. Ermənistanın mədəni irs cinayətləri bununla bitmir, Qərbi Azərbaycan (indiki Ermənistan) ərazisində Azərbaycana aid bütün tarixi, mədəni, dini irsi də məhv edib, xristian abidələrini erməniləşdirib, kilsələrə sahiblənib və sair. Azərbaycanı Qarabağda “erməni irsini məhv etməkdə” ittiham edən ermənilər özlərinin törətdikləri mədəni irs cinayətlərini unutmasınlar. Onlar bu cinayətlərə görə hələ cavab verməyiblər.
“Erməniləri narahat edən səbəb özlərinin mədəni irs cinayətlərinin dünyada ifşa olunması qorxusudur”
Tarix elmləri doktoru, professor Qasım Hacıyev “Bakı-Xəbər”ə bildirdi ki, bu kimi dezinformasiyaların yayılmasını, faktların köklü şəkildə təhrif edilməsini ermənilərdən hər zaman gözləmək olar. “Çünki ermənilər heç vaxt reallığı qəbul etmək istəmirlər. Yalan məlumatlar tirajlamaqla, uydurma tarixlə, mifik mədəni irs düzəltməklə məşğul olurlar. Özlərinin heç nələri yoxdur, UNESCO-ya təqdim etdiklərinin də əksəriyyətinin onlara aid olmadığı məlumdur. Ermənistanın orada təmsil olunması təəccüblü görünməlidir, nəinki Azərbaycanın bu komitəyə üzv seçilməsi. Azərbaycanın beş ölkə arasından belə bir komitəyə üzv seçilməsi təsadüfi deyil və bu bizim dövlətimizin haqqıdır. Azərbaycan uzun illərdir ümumdünya irsinə, onun müdafiəsinə, bərpasına böyük töhfələr verir. Ermənistan nə edib bu illər ərzində? Azərbaycan xalqının mədəni irsini talayıb, dağıdıb, saxtalaşdırıb. Azərbaycanın mədəni, tarixi, dini irsinə qarşı soyqırım törədən ermənilərin ölkəmizi hansısa şəkildə qaralaması yolverilməzdir”.
Azərbaycanın öz gücünə dünyada nüfuz qazandığını deyən Q.Hacıyevin sözlərinə görə, ölkəmiz UNESCO ilə məhsuldar əməkdaşlıq nümunələri yaradıb, Ermənistan isə yalnız dağıdıcılıqla, UNESCO rəhbərliyini aldatmaqla məşğul olub.
Ermənistanın heç bir mədəni, siyasi, iqtisadi, diplomatik uğurunun olmadığını deyən Q.Hacıyev qeyd etdi ki, bu ölkənin hardasa mövqe tutması xarici havadarlarının və erməni lobbisinin dəstəyi ilə olub. Saxta ideologiyadan qopa bilməyən ermənilərin xarici qüvvələrin təsiri, göstərişi ilə hərəkət etdiklərini qeyd edən Q.Hacıyev vurğuladı ki, onlar Azərbaycanın bu komitəyə üzv olmasına görə dolayısı ilə UNESCO-dakı “tərəfdaşlarını” ittiham etmək istəyirlər. “Torpaqlarımız işğal altında olanda ermənilər mədəni irsimizə divan tutdu, abidələrimizi dağıtdılar, amma əksər dövlətlərin, beynəlxalq qurumların səsləri çıxmadı. O zaman o dövlətlərin birinin ləyaqəti olmadı Azərbaycan abidələrini dağıtmaması üçün Ermənistana çağırış etsin ki, başqa xalqın abidəsini dağıtmağı, saxtalaşdırmağı dayandırın. Qarabağın ermənilərə heç bir aidiyyəti olmadığı halda, onlar “Arsax abidələrindən”, onların müdafiəsindən, mühafizəsindən danışırlar. Ermənilərin Azərbaycanı belə məsələlərdə ittiham etməyə heç bir haqqı yoxdur. Azərbaycan heç bir xalqın abidəsini dağıtmır. UNESCO-nun Ümumdünya İrs Komitəsinə üzv seçilməsi üçün də çox güclü əsasları olub. Ona görə də, ermənilərin hay-küyü, narahatlığı əsassızdır. Erməniləri narahat edən səbəb özlərinin mədəni irs cinayətlərinin dünyada ifşa olunması qorxusudur, bu üzdən də Azərbaycanın bir beynəlxalq uğuru olan kimi yalandan hay-küy salırlar”-deyə Q.Hacıyev bildirdi.
İradə SARIYEVA
