Sahil Kərimli: “Bu istiqamətlərdə Azərbaycanla Almaniya arasında yeni mərhələ başlayır”
Oktyabrın 15-də Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Almaniya Parlament Cəmiyyətində hökumətin, Bundestaqın, beyin mərkəzlərinin, aparıcı KİV-lərin nümayəndələri ilə görüş keçirib.
Bu barədə Azərbaycan Prezidentinin köməkçisi "X" sosial şəbəkə hesabında paylaşım edib.
"Bu gün Almaniya Parlament Cəmiyyətində hökumətin, Bundestaqın, beyin mərkəzlərinin, aparıcı KİV-lərin nüfuzlu nümayəndələri ilə müzakirələr keçirilib. Biz dəyişən regional və qlobal dinamika şəraitində Azərbaycanın sülhün, sabitliyin və əlaqələrin möhkəmləndirilməsində əsas rolunu müzakirə etdik", - paylaşımda bildirilib.
Azərbaycan Almaniya ilə bu istiqamətdə münasibətlərə niyə bu qədər əhəmiyyət verir?
İndiki şəraitdə həm regional, həm də qlobal məsələlərin irəlilədilməsində Almaniya ilə münasibətlərə Azərbaycanın belə önəm verməsi nə ilə bağlıdır? Eyni zamanda Almaniyanın da Azərbaycana önəm verməsi hazırkı vəziyyətdə nəyə görə əlamətdardır?
“Azərbaycanın bölgəmizə və dünyaya vermiş olduğu töhfələr...”
Siyasi ekspert Sahil Kərimli “Bakı-Xəbər”ə bildirdi ki, Azərbaycan son illərdə düşünülmüş və praqmatik siyasət həyata keçirir, çoxşaxəli siyasət nəticəsində bu gün dünyada xüsusi önəmli tərəfdaşa və böyük nüfuza malik bir ölkəyə çevrilib. “Bu istiqamətdə Azərbaycanın Avropa ilə əlaqələri də xüsusi vurğulanmalıdır. Avropanın əksər ölkələri, o cümlədən də Almaniya ilə münasibətlərə daim böyük önəm verilib. Əlbəttə, son dövrlərdə Azərbaycanın dünyaya vermiş olduğu töhfələr, dünyada sülh və təhlükəsizlik istiqamətində atılan addımlar, xüsusilə də ölkəmizin bölgədə-Cənubi Qafqazda böyük güc və nüfuz sahibi olması, eyni zamanda da dövlətimizin müəllifi olduğu nəhəng, dünya səviyyəli enerji layihələri də dövlətimizi daim Avropanın diqqətində saxlayır. Xüsusilə də Almaniya bu istiqamətdə Azərbaycanla münasibətlərə böyük əhəmiyyət verir. Bu baxımdan Azərbaycan da münasibətlərə qarışılıq vermək üçün Almaniya ilə əməkdaşlığa önəm verir. Qarşılıqlı iqtisadi layihələr, Azərbaycanın enerji məhsullarının Avropa, xüsusilə də Almaniya bazarlarına çıxarılması, idxal-ixrac əməliyyatları, qarşılıqlı sərmayələrin qoyulması və bu kimi siyasi, iqtisadi, mədəni əlaqələr də daim inkişaf edir”.
S.Kərimlinin fikrincə, bu baxımdan Almaniya tərəflə keçirilən görüşlər, məsləhətləşmələr, aparılan müzakirələr münasibətlərin gələcəyi üçün çox böyük əhəmiyyət daşıyır: “Hazırda Azərbaycan dünyada çox böyük nüfuza malikdir. Azərbaycanın ABŞ-la münasibətləri heç vaxt olmadığı qədər yüksələn xətt üzrə inkişaf edir. Xüsusilə də Azərbaycan Prezidentinin Cənubi Qafqazda sülh və təhlükəsizliyin əldə olunması istiqamətində Ermənistanla sülhün əldə olunması istiqamətində atdığı qətiyyətli və milli maraqlara əsaslanan addımlar bu gün Qərbdə də, Avropada da böyük maraq və rəğbətlə qarşılanır. Azərbaycanın bölgəmizə və dünyaya vermiş olduğu töhfələr də, əlbəttə, Almaniya da daxil olmaqla Avropanın marağını günü-gündən artırır. Bu baxımdan, Almaniya Azərbaycanın bu nüfuzunu yüksək qiymətləndirir, ölkəmizin bölgədə yaratdığı yeni reallıqlarla barışmaq məcburiyyətindədir ”.
S.Kərimli qeyd etdi ki, Azərbaycanın həyata keçirəcəyi nəhəng nəqliyyat-kommunikasiya layihələri, Zəngəzur dəhlizinin açılması da bu münasibətlərin gələcəyi üçün böyük önəm daşıyır.
Azərbaycan Prezidentinin köməkçisinin Bundestaqın, beyin mərkəzlərinin, aparıcı KİV-lərin nümayəndələri ilə görüşünə gəlincə, S.Kərimli qeyd etdi ki, bu sahələrdə əməkdaşlıq əlaqələrinin dərinlışdirilməsi, birgə müzakirələrin keçirilməsi hər iki dövlətin maraqlarına cavab verir. S.Kərimlinin sözlərinə görə, müxtəlif vaxtlarda Almaniya cəmiyyətində, mediasında Azərbaycana qarşı qərəzli yanaşmalar, yanlış rəylər olub və Azərbaycanda da ictimai təşkilatlar, media səviyyəsində belə xoşagəlməz təbliğatlara qarşı narazı münasibətlər, etirazlar baş verib. Azərbaycan tərəfin bu kimi dezinformasiyalara cavab verdiyini, adekvat yanaşdığını deyən S.Kərimli hesab edir ki, eyni zamanda Azərbaycanın haqq səsinin dünyaya çatırılması yönündə də müəyyən işlər görülüb. “Bu gün bu cür görüşlər, təmaslar, müzakirələr ona xidmət etməlidir və edəcək ki, bu anlaşılmazlıqlar ortadan qalxsın. Cəmiyyətin bütün sektorlarında - istər, dövlət, istər QHT, istər mətbuat sektorunda çoxşaxəli münasibətlər yaranmalıdır. Həm dövlət, həm qeyri-dövlət, həm də media qurumları, beyin mərkəzləri və sair səviyyəsində bu cür əlaqələr olmalıdır ki, qarşılıqlı anlaşma və bir-birinə hörmət xarakteri daşıyan münasibətlər qurulsun. Bunu diplomatiyanın və qarşılıqlı əlaqələrin yeni fazası, yaxud yeni istiqaməti adlandırmaq olar. Bu istiqamətlərdə Azərbaycanla Almaniya arasında yeni mərhələ başlayır. Ən müxtəlif sahələrdə əməkdaşlıqda hər iki dövlət maraqlıdır”.
S.Kərimli vurğuladı ki, yeni reallıqlar və yeni mərhələ kontekstində bu cür təmaslar və görüşlər gələcəkdə də münasibətləri tamamilə yeni məcraya yönəldəcək.
İradə SARIYEVA
