Ramil Hüseynov: “İndiki şərtlər çərçivəsində sülh sazişini Rusiya platformasında imzalamaq əsla real deyil”
Rusiya Azərbaycan və Ermənistanın sülh sazişi imzalaması üçün öz ərazisini təqdim etmək təklifini qüvvədə saxlayır. Bu barədə Rusiya xarici işlər nazirinin müavini Mixail Qaluzin bildirib.
“Ermənistan və Azərbaycan arasında yekun sülh sazişinin imzalanması üçün platforma təqdim etməyə dair təklifimiz qüvvədə qalır”, – diplomat Ermənistanın Müstəqillik Günü münasibətilə keçirilən qəbulda deyib. Qaluzin qeyd edib ki, Rusiya tərəfi Bakı və İrəvan arasında münasibətlərin normallaşmasına xüsusi əhəmiyyət verir: “Aydındır ki, planlarımızı praktiki olaraq həyata keçirmək üçün hələ də mühüm işlər görülməlidir. Biz Rusiya, Ermənistan və Azərbaycan liderlərinin üçtərəfli bəyanatlarını da nəzərə almaqla, tərəflərə qalan fikir ayrılıqlarının aradan qaldırılmasında bütün zəruri dəstəyi göstərməyə hazırıq”.
Axı Azərbaycan vasitəçi olmadan Ermənistanla danışıqlara üstünlük verir. Üstəlik, sülh müqaviləsinin bəndləri paraflanıb. Bütün hallarda sülh sazişinin Moskvada, Rusiyanın platformasında imzalanması indiki şərtlər daxilində mümkündürmü?
“Kreml münaqişənin passiv formada qalmasında və bundan öz məqsədləri üçün istifadə edilməsində maraqlıdır”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, indiki şərtlər çərçivəsində sülh sazişini Rusiya platformasında imzalamaq əsla real deyil: “Düzdür, Azərbaycan üçün bunun harada imzalanması elə bir prinsipial əhəmiyyət kəsb etmir. Birincisi, Azərbaycan öz suverenliyini və ərazi bütövlüyünü tam təmin edib. İkincisi, Azərbaycanın son şərti də mütləq qəbul olunmalıdır. Yəni Ermənistan Konstitusiyasından ölkəmizə qarşı ərazi iddiaları çıxarılmalıdır. Ondan sonra sülh sazişinin Tbilisidə, Moskvada və yaxud da Vaşinqtonda imzalanmasının bizim üçün elə bir əhəmiyyəti yoxdur. Bakı dəfələrlə vurğulayıb ki, sülhün əsası beş prinsip üzərində qurulmalıdır və bu prinsiplərdən kənara çıxmaq yolverilməzdir. Ona görə də Azərbaycan üçün əsas prioritet balanslaşdırılmış diplomatiya və real nəticədir. Moskva 10 noyabr 2020-ci ildə əldə edilən üçtərəfli sazişdən çıxış edərək sülh sazişinin Moskvada imzalanmasına çalışır. Ancaq o da var ki, Rusiyanın 10 noyabrdan sonrakı fəaliyyəti sülhə gətirib çıxarmadı. Çünki reallıqda Rusiya tərəfsiz olmadı. Sülh sazişinin imzalanması üçün yetərli addımlar atmadı. Ona görə ki, Azərbaycanla Ermənistan arasında dayanıqlı və qalıcı sülh Kremlə sərf etmir. Kreml münaqişənin passiv formada qalmasında və bundan öz məqsədləri üçün istifadə edilməsində maraqlıdır. Yəni əvvəllər olduğu kimi, hər iki ölkəni təzyiq altında saxlasın. Vaşinqtonda tərəflərin sülh sazişi bəndlərini ratifikasiya etməsindən sonra sazişin Moskvada imzalanması mümkünsüzdür. Bu, ABŞ-a hörmətsizlik olar. Üstəlik, Paşinyan hakimiyyəti də Rusiyada sazişin imzalanmasında maraqlı deyil. Bu baxımdan Qaluzinin təklifi real deyil”.
Vidadi ORDAHALLI
