Əli Mustafa: “Düşünmürəm ki, bundan sonra Niderland Azərbaycana qarşı qərəzli mövqedən çıxış etsin”
Niderlandda səfərdə olan xarici işlər nazirinin müavini Elnur Məmmədov Niderland Krallığının xarici işlər nazirinin müavini Marsel de Vink ilə görüşüb.
Görüşdə müxtəlif sahələrdə əlaqələrin inkişafı üçün mövcud imkanlar ətrafında fikir mübadiləsi aparılıb, iqtisadi əməkdaşlığın iki ölkə arasında əlaqələrdə mühüm yer tutduğu qeyd olunub və Niderland şirkətlərinin Azərbaycanda uğurlu fəaliyyətindən məmnunluq ifadə olunub. İkitərəfli və çoxtərəfli gündəlikdə olan mövzular, habelə qarşılıqlı maraq doğuran beynəlxalq və regional məsələlər, o cümlədən post-münaqişə dövründə regionda yaranmış yeni reallıqlar, sülh prosesi və tarixi Vaşinqton görüşünün nəticələri də görüşdə diqqət mərkəzində olub.
Niderland Fransadan sonra Avropa İttifaqında Azərbaycana münasibətdə ən qərəzli mövqedən çıxış edən ölkə olub. Dəfələrlə bu ölkənin parlamenti erməni separatçıların müdafiəsi ilə bağlı qətnamə qəbul edib, çağırışlar edib. Avropa Parlamentində bu ölkəni təmsil edən deputatlar ölkəmizə qarşı xüsusi qərəzli münasibəti ilə seçilib. Siyasi sahədə Niderlandın Azərbaycana qarşı düşmənçiliyinin təkrar olunmayacağına, ortadan götürüləcəyinə qarantiya olmadan bu ölkə ilə iqtisadi münasibətləri inkişaf etdirmək, dərinləşdirmək nə dərəcədə mümkün və düzgün yoldur?
“Son dövrlər çox şey dəyişib və ölkəmizin Avropa üçün önəmi artıb”
Sözügedən məsələ ilə bağlı fikirlərini “Bakı-Xəbər”lə bölüşən siyasi şərhçi Əli Mustafa hesab edir ki, Qərbi Avropa dövləti olan Niderland Azərbaycana heç də hər zaman xoş münasibətdə olmayıb: “Niderlandda daha çox Fransanın təsirini hər zaman hiss etmişik. Ancaq eyni zamanda dövlətin də maraqları var. O cümlədən, Cənubi Qafqazda maraqları var. Ancaq təəssüf ki, xristian həmrəyliyi konteksində onlar hər zaman Qafqazda erməniləri dəstəkləyiblər. Hollandiyanın Azərbaycana münasibətinin qərəzli olmasında erməni lobbisinin də rolu var. Ancaq avqustun 8-də Vaşinqtonda sülh sazişi şərtlərinin paraflanması Niderlandın Azərbaycanla bağlı siyasətinə yenidən baxmasına səbəb olub. Hesab edirəm ki, bu, müsbət haldır. Düşmənçiliklər sonsuza qədər olmur. O cümlədən, dostluqlar da sonsuza qədər olmur. Dünən pis olan münasibətlər, bu gün yaxşı müstəviyə keçir. Bu baxımdan düşünmürəm ki, bundan sonra Niderland Azərbaycana qarşı qərəzli mövqedən çıxış etsin. Çünki Ermənistanla Azərbaycan arasında münaqişə ortadan qalxıb. Ona görə də diplomatik münasibətlər sağlam müstəvidə inkişaf edirsə, iqtisadi əlaqələrin genişlənməsi üçün də yeni imkanlar yaranır. Bu baxımdan hesab edirəm ki, ciddi risklərin olacağı gözlənilmir. Ona görə ki, son dövrlər çox şey dəyişib və ölkəmizin Avropa üçün önəmi artıb. Ümumiyyətlə, Azərbaycanın digər Avropa ölkələri ilə problemi varsa, bunu yoluna qoymaq lazımdır. Bu da diplomatik fəaliyyətdən asılıdır. Yəni biz dünya dövlətlətləri ilə əlaqələrimizi sıxlaşdırmalıyıq”.
Vidadi ORDAHALLI
