Vüqar Bayramov: “Şəhərsalmada Azərbaycana aid nümunənin təqdimatı təqdirəlayiqdir”
Prezident İlham Əliyev Xankəndidə keçirilən III Azərbaycan Milli Şəhərsalma Forumunun (NUFA3) iştirakçılarına müraciət ünvanlayıb. Müraciətdə bildirilir ki, Azərbaycanın milli inkişaf strategiyasında şəhərsalma prioritet istiqamətlərdən birini təşkil edir:
“Ölkədə şəhərsalma və urbanizasiya sahəsində qəbul edilmiş yanaşmalar iqtisadi dayanıqlığa, sosial-iqtisadi rifaha, iqlim dəyişmələrinə uyğunlaşmaya töhfə verir. Xüsusilə Qarabağ və Şərqi Zəngəzur iqtisadi rayonlarında aparılan genişmiqyaslı bərpa və quruculuq işləri Azərbaycan dövlətinin şəhərsalma sahəsində strateji baxışını və icra imkanlarını nümayiş etdirir”.
“Qarabağ və Şərqi Zəngəzurda istifadə edilən şəhərsalma modelləri bu gün beynəlxalq təşkilatların diqqətindədir”
Azərbaycanın milli inkişaf strategiyasında şəhərsalmanın prioritet istiqamətlərdən biri olmasının əhəmiyyəti haqqında danışan millət vəkili Vüqar Bayramov “Bakı-Xəbər”ə açıqlamasında qeyd etdi ki, Qarabağ və Şərqi Zəngəzurda istifadə edilən şəhərsalma modelləri bu gün beynəlxalq təşkilatların diqqətindədir: “Nəzərə almaq lazımdır ki, işğaldan azad edilən hər bir ərazinin özünün spesifik şəhərsalma modeli var. Burda “ağıllı şəhər” və “ağıllı kənd” modelindən istifadə olunur. Bununla yanaşı, şəhərsalma sosial-iqtisadi inkişaf üçün zəmin sayılır. Işğaldan azad edilən yaşayış məntəqələrində biz yeni yanaşmaların tətbiqini müşahidə edirik. Məlumat üçün bildirim ki, sabah (17 oktyabr) Füzuli şəhər günü qeyd ediləcək. Bu cür günlər şəhərsalma üçün önəmlidir”.
Həmsöhbətimizin dediyinə görə, Qarabağ və Şərqi Zəngəzurda tətbiq edilən şəhərsalma modeli həm də iqtisadi inkişaf üçün önəmlidir. Bu ondan xəbər verir ki, həmin ərazilərdə şəhərsalmanın standartlarından istifadə olunur. Məlum hal investisiyaların cəlb olunması baxımından da əhəmiyyətlidir: “Bəllidir ki, III Azərbaycan Milli Şəhərsalma Forumu (NUFA3) qədim Azərbaycan torpağı olan Xankəndidə keçirilir. Bu kimi beynəlxalq forumların, tədbirlərin həmin ərazilərdə keçirilməsi olduqca əhəmiyyətlidir. Forumda müzakirə olunan məsələlər, Azərbaycan modelinin tətbiq olunması, eyni zamanda, şəhərsalmada ölkəmizə aid nümunənin təqdimatı təqdirəlayiqdir”.
Günel CƏLİLOVA
