Bəhruz Quliyev: “Bu görüş “sadəcə bir diplomatik jest” deyil, bu, gələcək siyasi oyunun yeni mərhələsinə keçid ola bilər"
ABŞ Prezidenti Donald Tramp Şarm əl-Şeyxdən Vaşinqtona qayıdarkən təyyarəsində jurnalistlərə açıqlamasında Ukrayna barədə danışıb. Tramp oktyabrın 17-də Zelenskini qəbul etmək niyyətində olub-olmaması ilə bağlı suala müsbət cavab verib: "Düşünürəm ki, bəli".
Tramp, həmçinin, Amerikanın "Tomahavk" raketlərinin Ukraynaya tədarükünün mümkünlüyü ilə bağlı sualı cavablandırmaqdan imtina edib.
Maraqlıdır, Trampla Zelenskinin görüşünün nəticələri necə olacaq?
“Oktyabrın 17-də Tramp–Zelenski görüşü baş tutarsa, bu, ABŞ-Ukrayna münasibətlərində yeni mərhələnin başlanğıcı ola bilər”
“Səs” qəzetinin baş redaktoru, siyasi ekspert Bəhruz Quliyev “Bakı-Xəbər”ə şərhində bildirdi ki, ABŞ Prezidenti Donald Trampın Şarm əl-Şeyxdən qayıdarkən Zelenski ilə mümkün görüş barədə verdiyi açıqlama əslində bir çox geosiyasi mesajlar daşıyır. “Düşünürəm ki, bəli” – bu qısa, amma çox məna yüklü ifadə Tramp diplomatiyasının klassik üslubudur. Belə ki, o, həm niyyətini göstərir, həm də qarşı tərəfi müəyyən gözlənti içərisində saxlayır".
Həmsöhbətimiz onu da əlavə etdi ki, oktyabrın 17-də Tramp–Zelenski görüşü baş tutarsa, bu, ABŞ-Ukrayna münasibətlərində yeni mərhələnin başlanğıcı ola bilər. Trampın hakimiyyətə qayıtdığı təqdirdə prioritetləri dəyişə bilər, amma o, hər zaman “effektiv müqavilə” tərəfdarı olub: “Deməli, Zelenski ilə danışıqlarda əsas məsələ hərbi yardımın davamı deyil, Ukraynanın gələcəkdə ABŞ-la hansı şərtlərlə əməkdaşlıq edəcəyi olacaq. Trampın “Tomahavk” raketlərinin tədarükü barədə suala cavab verməməsi isə təsadüfi deyil. Düşünürəm ki, bu, onun diplomatik təzyiq aləti kimi “sözsüz mesaj” vermək strategiyasına uyğundur. Beləliklə, Vaşinqton Kiyevə açıq dəstək bəyanatı vermədən, eyni zamanda Rusiya ilə danışıqlarda öz manevr imkanlarını qoruyur”.
Siyasi şərhçi son olaraq bildirdi ki, Tramp–Zelenski görüşü təkcə Ukrayna üçün deyil, həm də qlobal güc balansı üçün önəmli hadisə olacaq. Görüşün nəticələri ABŞ-ın Avropa təhlükəsizliyi ilə bağlı siyasətinin gələcək istiqamətini müəyyənləşdirəcək: “Hesab edirəm ki, bu görüş “sadəcə bir diplomatik jest” deyil, bu, gələcək siyasi oyunun yeni mərhələsinə keçid ola bilər".
Günel CƏLİLOVA
