Elşad Həsənov: “Bu, Türkiyənin maraqlarına qarşı olan bir addımdır”
ABŞ Senatı Pentaqonun YPG və PYD üçün ayırdığı 130 milyonluq büdcəni təsdiq edib. Senat ABŞ-ın 2026-cı ilinin hərbi büdcəsi üçün 925 milyard dollarlıq maliyyə büdcəsini təsdiq edib. Məhz hərbi məqsədlər üçün ayrılan bu vəsaitdən 130 milyon dollar YPG və PYD-yə veriləcək.
Bu vəsait terror qruplarının təchizatına, təlimlərə və maaşların ödənilməsinə yönəldiləcək. 130 milyon dolların 65 milyon dolları terror qruplaşmasında təmsil olunanların maaşlarının ödənilməsinə sərf olunacaq. Yerdə qalan hissə silah-sursatın alınmasına və təchizata yönəldiləcək.
Bütün bunlar nə deməkdir? Türkiyə Suriyadakı PYD-YPG qruplaşmalarını terrorçu təşkilat hesab edir və onların tərksilah olunmasını tələb edir, ABŞ Konqresi isə onlara pul ayırır. Belə məlum olur ki, ABŞ sözügedən qruplaşmaların ləğvində maraqlı deyil.
“Problem ondadır ki, ABŞ siyasi və hərbi elitasında olan müəyyən dairələr kürd qruplarının tamamilə ləğvini istəmir”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Elşad Həsənov hesab edir ki, bütün bunlar ABŞ-ın həmin terrorçu qrupların sıradan çıxmasında maraqlı olmadığını göstərir: “Bu, Türkiyənin maraqlarına qarşı olan bir addımdır. Məsələ ondadır ki, Türkiyə PYD və YPG-ni terrorçu təşkilat hesab edir. Çünki sözügedən qruplar PKK-nın uzantıları olublar. Birləşmiş Ştatlar isə illərdir bu qrupları terrorçu təşkilat hesab etməyərək onları himayə edir. PKK özünü buraxdığı halda, YPG və PYD mövcudluğunu qorumaqdadır. Bu qrupların mövcudluğu təkcə ABŞ-ın maraqlarına uyğun deyil. Bu, həm də İsrailin maraqlarına işləyir. Tramp prezident seçiləndən sonra bəyan etmişdi ki, Suriyadan ABŞ qüvvələrini tamamilə çıxaracaq. Tam çıxarmasa da, onların sayını xeyli azaldıb. Belə görünür ki, ABŞ-da dərin dövlət Suriyada Vaşinqtonun mövcudluğuna tam son qoyulmasını istəmir. Həm də bu səbəbdən həmin terror qruplarına 130 milyon dollar ayrılıb. Tramp Türkiyə ilə münasibətləri maksimum yaxşılaşdırmaq istəyir. Çünki Türkiyənin regionda vacib güc olduğunu bilir. Ancaq problem ondadır ki, ABŞ siyasi və hərbi elitasında olan müəyyən dairələr kürd qruplarının tamamilə ləğvini istəmir. Ona görə də sözügedən məsələ bu dərəcədə uzanır. Burada İsrailin müstəsna rolunun olduğunu güman edirəm. Problem həm də ondadır ki, İsrail vahid Suriyanın mövcudluğunda maraqlı deyil. Bax problem həm də bundan qaynaqlanır. Ancaq hesab edirəm ki, gec-tez bu məsələ də həllini tapacaq və Türkiyə ilə hesablaşmalı olacaqlar. Ən azından ona görə ki, Türkiyəsiz regionda dayanıqlı sabitlik mümkünsüzdür. Əvvəl-axır Birləşmiş Ştatlar terrorçu qruplaşmaları maliyyələşdirməyi dayandıracaq”.
Vidadi ORDAHALLI
