ABŞ və Rusiya arasında gərginlik yenidən yüksəlir. İddia olunur ki, Vaşinqton Ukraynaya Rusiyanın enerji infrastrukturunu hədəf alan hücumlarda gizli kəşfiyyat dəstəyi verərək, Putini iqtisadi çöküşlə küncə sıxışdırmağa çalışır.
“Financial Times”ın məlumatına görə, ABŞ kəşfiyyatı Kiyevə Rusiyanın neftayırma zavodlarına və strateji enerji obyektlərinə uzaqmənzilli hücumların müəyyənləşdirilməsində dəstək verir.
Qəzetə danışan Ukrayna və Amerika rəsmiləri bildiriblər ki, ABŞ kəşfiyyatı Ukrayna ordusuna marşrutun planlaşdırılması, vaxtı və hədəfin təhlili ilə bağlı yardım edir. Bu dəstək sayəsində Ukrayna strateji enerji obyektlərinə, o cümlədən neft emalı zavodlarına cəbhə xəttindən çox-çox uzaqlarda hücumlar təşkil edir.
“Financial Times”ın yazdığına görə, bu gizli dəstək yaydan etibarən daha da güclənib və Bayden dövründə məhdudlaşdırılan hücumlar Tramp dövründə yenidən gücləndirilib.
Məlumata görə, Putindən məyus olandan sonra Tramp Ukrayna siyasətini dəyişib və Ukraynaya dəstəyini artırıb. Qeyd edilir ki, iyul ayında Ukrayna lideri Zelenski ilə prezident Tramp arasında telefon danışığı prosesdə dönüş nöqtəsi olub. Qəzet yazır ki, Tramp telefon damışığı zamanı Ukraynanın Moskvanı hədəfə alıb-ala bilməyəcəyilə maraqlanıb. Tramp bu strategiyanı “rusları çətinə salmaq” və “Kremili danışıqlara məcbur etmək” məqsədilə dəstəkləyib. Ağ Ev isə bunu təkzib edərək, Trampın sadəcə “suallar verdiyini” bildirib.
Məlumata görə, Ukrayna Rusiyanın 38 neft emalı zavodundan ən azı 16-na zərbə endirib, bəzi obyektlər təkrar bir neçə dəfə hədəfə alınıb.
Hücumlar nəticəsində Rusiyanın gündəlik emal gücü 1 milyon bareldən çox azalıb, dizel ixracı məhdudlaşdırılıb və Moskva yanacaq idxalına başlayıb.
Bundan başqa, Kiyevin əməliyyatları Rusiyanın enerji istehsal gücündə 20% itkiyə səbəb olub.
“Financial Times” yazır ki, ABŞ kəşfiyyatı Ukraynaya hədəflərin zəif tərəfləri haqqında məlumat verib, bəzi hallarda hətta prioritet hədəfləri onlar müəyyənləşdirib.
Qəzet Vaşinqtonun əməliyyatların "bütün mərhələsində yaxından iştirak etdiyini" iddia edib.
Bir ABŞ rəsmisi, Ukrayna hədəfləri seçdiyini, Vaşinqton isə onların zəif nöqtələri barədə məlumat verdiyini bildirib. Bəzi mənbələr isə hədəfləri bir başa ABŞ-ın müəyyən etdiyi bildirir.
Ukrayna ordusunun son hücum uğurları yerli istehsal və ABŞ-dan gələn texniki kəşfiyyat dəstəyi ilə daha da güclənib.
“Financial Times” yazır ki, Kiyev “Fire Point” və “Liutyi” adlı uzun mənzilli pilotsuz uçuş aparatlarını (PUA) 300-ə yaxın dron dəstəsi şəklində istifadə edir.
Bu arada, Ukrayna kəşfiyyat xidməti SBU Rusiyanın dərinliklərində yerləşən Ufa şəhərindəki “Bashneft-UNPZ” neft emalı zavodunu uzaqmənzilli əməliyyatla hədəfə alıb. Ölkənin şərqində təxminən 1400 kilometr məsafədə olan bu obyekt Rusiya ordusu üçün ən böyük yanacaq və neft təchizatı mərkəzlərindən biri hesab olunurdu.
“Financial Times” həmçinin bildirib ki, Tramp administrasiyası Ukraynaya “Tomahawk” qanadlı raketləri də daxil olmaqla, uzaqmənzilli silah dəstəyi verməyi də nəzərdən keçirir.
Bildirilir ki, Tramp bu raketlərin necə istifadə ediləcəyi ilə bağlı məlumat istəyib, Zelenski isə "Bu addım Ukraynanı gücləndirə və rusları sakitləşdirə bilər" deyib.
Qəzetin yazdığına görə, Tramp administrasiyası sələfindən fərqli olaraq Kiyevə daha dərin əməliyyat dəstəyi verməyə başlayıb.
TAHİR
