Pakistanla Əfqanıstan sərhədindəki Paktiya əyalətində iki ölk sərhəd qüvvələri arasında toqquşmalar baş verib. Kabildə yerləşən “Tolo News” telekanalının X sosial media platformasında paylaşdığı xəbərə görə, Paktiyanın Pakistan sərhədinə yaxın bir neçə bölgəsində Əfqanıstan və Pakistan sərhəd qüvvələri arasında qarşıdurma baş verib.
Əfqanıstan hökumətinin sözçüsü toqquşmalarda 58 pakistanlı əsgərin öldüyünü, 30-un isə yaralandığını iddia edib.
Təhlükəsizlik mənbələri Əfqanıstan qüvvələrinin iki ölkə sərhədi olan Durand xətti yaxınlığında Pakistan bazalarını hədəf aldığını, Pakistanın isə buna cavab olaraq hava hücumlarına başladığını bildirib.
Mənbələr sözügedən bəzi bazaların ələ keçirildiyini və toqquşmalarda 12 pakistanlı əsgərin öldürüldüyünü bildirib.
Bölgə sakinləri əyalətin Dand-e Patan rayonunda baş verən qarşıdurmalara görə, mülki şəxslərin evlərini tərk etmək məcburiyyətində qalığını bildiriblər.
İslamabadda nəşr olunan “Dawn” qəzeti, Pakistan təhlükəsizlik rəsmilərinin ordunun hücumlara dərhal və güclü şəkildə cavab verdiyini bildirdiyini, çoxlu əfqan bazası və yaraqlıların mövqelərinə zərbələr endirildiyini yazıb.
Rəsmilər Pakistan ordusunun artilleriya, tank, yüngül və ağır silahlarla cavab verdiyini, əməliyyatlarda pilotsuz uçuş aparatlarından (PUA) da istifadə etdiyini deyib.
Pakistanın dövlət televiziya kanalı PTV News təhlükəsizlik mənbələrinə istinadən Pakistan ordusunun Əfqanıstana aid 19 postu ələ keçirdiyini iddia edib.
Ələ keçirilən postlarda olanların öldürüldüyü, əfqan qüvvələrinin bəzi postları tərk edib qaçdığı, bəzi postlarda isə yanğınların baş verdiyi bildirilir.
Yerli Pakistan mənbələrinin məlumatına görə, gecə boyunca müxtəlif yerlərdə baş verən qarşıdurmalardan sonra Pakistan və Əfqanıstan arasındakı Torkham sərhəd keçid məntəqəsi bağlanıb.
Əfqanıstan tərəfi də sərhəd keçid məntəqəsini bağladığını təsdiqləyib.
Tolo News-a danışan mənbələr Paktiya əyalətinin Aryoub Zazi və Angoor Adda bölgəsində Pakistanın artileriya hücumlarının hələ də davam etdiyini bildiriblər.
Əfqanıstan Müdafiə Nazirliyi bəyanat yayaraq, "Pakistana qarşı cavab tədbirləri və uğurlu əməliyyatların gecə yarısından etibarən dayandırıldığını", lakin öz ərazisini qətiyyətlə müdafiə etməyə hazır olduğunu bəyan edib.
Əfqanıstan hökumətinin sözçüsü Zabihullah Mücahid mətbuata açıqlamasında sərhəddə baş verən qarşıdurmalarda 58 pakistanlı əsgərin öldüyünü, 30-nun isə yaralandığını iddia edib.
Əfqanıstan tərəfində 20-dən çox adamın öldüyünü açıqlayan Mücahid, qarşıdurmaların Qətər və Səudiyyə Ərəbistanının tələbi ilə dayandırıldığını bildirib.
Mücahid ötən gecə Pakistan tərəfində keçirilən əməliyyatlardan sonra çoxlu sayda silah və texnikanın əfqan sərhədçilərinin əlinə keçdiyini iddia edib.
Bu arada həm Pakistan, həm də Əfqanıstan bir-birini mülki şəxslərə atəş açmaqda ittiham edib.
Oktyabrın 9-da Əfqanıstanın paytaxtı Kabildə partlayış səsinin eşidildiyi bildirilirdi. Həmin vaxt Pakistan döyüş təyyarələrinin Əfqanıstanın Paktiya əyalətinin Marqa bölgəsinə hava hücumu təşkil etdiyi iddia edilirdi.
Əfqanıstan hökuməti Marqa və paytaxt Kabildə baş verən partlayışlara görə Pakistanı günahlandırırdı.
TAHİR
