“ASALA-dan və digər terror təşkilatlarından Ermənistandakı revanşist qüvvələrin istifadə etmək ehtimalı mümkündür”
Prezident İlham Əliyev "Terrorçu hücumlar və silahlı münaqişələr zamanı humanitar böhranların və qlobal xarakterli texnogen fəlakətlərin qarşısının alınmasında təhlükəsizlik orqanlarının qarşılıqlı fəaliyyəti" mövzusunda beynəlxalq konfransın iştirakçılarına müraciətində bildirib ki, müxtəlif bölgələrdə silahlı toqquşmaların baş verməsi humanitar böhranlara, texnogen qəzalara, ekoloji fəlakətlərə zəmin yaradır: “Eyni zamanda beynəlxalq müstəvidə münaqişələrin alovlanması, terrorçu təşkilatların yenidən fəallaşması, eləcə də kibertəhdidlərin artması müşahidə olunur...”
Prezident müraciətində terrorçu təşkilatlarının yenidən fəallaşdığını da vurğulayıb.
ASALA terroru da yenidən fəallaşa bilərmi?
“Ermənilərin bütün terror təşkilatları indi də fəaldır”
Azad Vətən Partiyasının sədri Akif Nağı “Bakı-Xəbər”ə bildirdi ki, dünyada gərgin qarşıdurma hökm sürür, hər kəs öz istəklərini güc yolu ilə həyata keçirməyə çalışır. “Bir yandan Rusiyanın Ukraynaya qarşı müharibəsini, İsrailin Qəzzada həyata keçirdiklərini terror aktları kimi də dəyərləndirmək olar. Dünyanın müxtəlif yerlərində təhlükəli vəziyyət yaranıb. Ən təhlükəli məsələdə odur ki, dövlətlərin arasında qarşıdurma var idi, müəyyən maraqlar uğrunda mübarizə gedirdi. Amma indi onu açıq güc müstəvisinə çevirirlər. Bu çox təhlükəlidir və təbiidir ki, bu cür qarşıdurmada terror təşkilatlarından istifadə edirlər. İndən sonra bu proses yüksələn xətt üzrə gedəcək, daha çox terror qrupları bu prosesə cəlb olunacaq, yeni terror qrupları da yaradılacaq. Ona görə də Azərbaycan Prezidentinin diqqəti bu məsələyə yönəltməsi qətiyyən təsadüfi deyil. Prezident İlham Əliyev reallıqları, faktları nəzərə alaraq bu mövedən çıxış edir. Bu təhlükəli tendensiyanın qarşısının alınması ilə bağlı dünya birliyinə, böyük dövlətlərə öz mesajlarını, xəbərdarlıqlarını göndərir. Terror təşkilatları adi bir proseslə yaranmayıb, onların hamısının arxasında bu və digər dövlətlər dayanıb. Bu terror təşkilatlarından o dövlətlər öz maraqları üçün istifadə ediblər. İstər PKK, istər ASALA, istərsə də digər terror təşkilatları olsun, hamısı xüsusi məqsədlə yaradılıb. Kürd adı ilə yaradılan terror təşkilatları böyük hesabla kürdlərin yox, onları yaradanların maraqlarına xidmət edib. PKK-nı Türkiyəyə qarşı yönətmişdilər, onun arxasında SSRİ deyilən Sovet imperiyası dayanırdı. Kürdlərin maraqlarına da bunun heç bir dəxli yox idi. Kürdlər də yavaş-yavaş bunu başa düşürülər. Keçən əsrin 70-ci ildə erməni terror təşkilatları yaradılırdı. Bu terror təşkilatlarının arxasında Sovet imperiyası və bəzi Qərb dövlətləri, eləcə də Amerika dayanırdı. İŞİD, Əl-Qaidə və digər terror təşkilatları, eləcə də başqa terror qruplaşmaları ilə bağlı məsələlər, artıq aydındır ki, bunlar böyük dövlətlər tərəfindən yaradılmışdı. Bu terror təşkilatlarından öz maraqlarını həyata keçirmək üçün istifadə edirdilər.
Erməni terror təşkilatları da həmçinin o dövlətlərinin maraqlarına xidmət edir. Keçən əsrin 70-80-ci illərində bir neçə erməni terror təşkilatı yaradıldı. Onlardan biri də ASALA erməni terror təşkilatı idi ki, o da əsasən Qərb dövlətlərindən və keçmiş SSRİ-dən maliyyələşirdi. Türkiyəyə qarşı XXI əsrdə də erməni terror təşkilatları yaratmağa başladılar. Onların içində ən “fəallarından” biri “Apostol” təşkilatı idi. Bu terror təşkilatı Azərbaycanda və Türkiyədə terror aktları törətməyi qarşısına məqsəd qoymuşdu. Eyni zamanda adı tez-tez hallanan “VOVA” terror təşkilatları da son illər yaradılıb və sosial şəbəkələr üzərindən Türkiyəyə və Azərbaycana qarşı aqressiv şüarlar səsləndirir, hansısa hərəkətlər edəcəklərini bildirirlər. Bu da var. Ermənilərin bütün terror təşkilatları indi də fəaldır. ASALA keçən əsrin 70-ci illərində yarandı. Bu terror təşkilatı əsasən Türkiyə diplomatlarına qarşı fəaliyyət göstərirdi. Fransanın “Orli” hava limanında çox faciəli bir partlayış törətdilər. Bu terror aktlarının da hamısında məqsəd Türkiyəni hansısa istiqamətdə nəyəsə məcbur etmək idi. Adını qoyurdular ki, guya “genosidin” “qəbul olunmasını” istəyirlər. Onlar unudurdular ki, o cür utopik məqsədlərə belə terrorla çatmaq mümkün deyil. Ona görə də zamanla fəaliyyətləri səngiyirdi. Keçən əsrin 90-cı illərində, demək olar ki, onların bu prosesi ləngidi. ASALA hərdənbir səsini çıxarır, amma keçən əsrin 90-cı illərindən bəri, demək olar ki, fəaliyyəti yox dərəcəsindədir”.
A.Nağı qeyd etdi ki, XX əsrin sonlarında bu təşkilat bəzən üzə çıxırdı və əsasən Türkiyəyə qarşı bəyanatlar verirdi, Türkiyəni qondarma “soyqırımı” tanımağa məcbur etmək, ayrı-ayrı dövlətlərin bu “genosidi” tanımasına nail olmaq istəyirdilər. “İndiki dövrdə ASALA bir alət kimi qalır, onun ləğv olunması ilə bağlı qərar yoxdur. “AOD” adlı erməni terror təşkilatı da var. O da ehtiyatda dayanır. Yəni heç bir terror təşkilatını silib kənara atmırlar, ləğv etmirlər. O terror təşkilatlarını kimlər ki yaradıb, bu gün də onlardan istifadə etmək üçün müəyyən məqam gözləyirlər.
ASALA-dan və digər terror təşkilatlarından Ermənistandakı revanşist qüvvələrin istifadə etmək ehtimalı mümkündür. Ermənistanın daxilində müəyyən proseslər gedir, onlar bu təşkilatlardan istifadəyə meyl edə bilərlər. Cənubi Qafqazda sabitliyi pozmaqda maraqlı olan dövlətlər var ki, onlar da bu prosesə dəstək verə bilərlər ki, yenidən erməni terror təşkilatları fəallaşsın. Ola bilər ki, Cənubi Qafqazda nə isə planlaşdırsınlar, ilk növbədə Azərbaycana və Ermənistan ərazisində indiki hakimiyyətə qarşı hansısa aktlara əl atmaq məqsədi güdsünlər. Bu təhlükə var. Azərbaycan rəhbərliyi də yəqin ki, bunu görür. Yəni Prezident Əliyev təsadüfi açıqlama verməz. Onların qarşısını almaq üçün bütün istiqamətlərdə Azərbaycan rəhbərliyi, Azərbaycan xüsusi xidmət orqanları tərəfindən qabaqlayıcı tədbirlər görülməlidir”-deyə A.Nağı bildirdi.
İradə SARIYEVA
