Məhərrəm Zülfüqarlı: “Ermənistanın Rusiyadan ayrılaraq başqa siyasət yürütdüyünü görür və sözlərlə Paşinyanı yumşaltmağa çalışır”
Vladimir Putin Nikol Paşinyana Ermənistanın müstəqilliyinin 34-cü ildönümü münasibətilə təbrik məktubu göndərib. Putinin qısa təbriki bircə cümlənin üstündə qurulub. Təbrikdə bildirilib ki, Ermənistan-Rusiya münasibətləri xalqların dostluq ənənələri üstündə qurulub.
Rusiya prezidentinin Ermənistanın baş nazirinə dostluq ənənələrini xatırlatması təsadüfdürmü? Sanki Putin Ermənistana mesaj verir ki, sən bu dostluq ənənələrini pozursan.
Putinin bir cümləlik mesajının arxasında nə dayanır?
“Bu cür pafoslu sözlərlə heç kimi aldatmaq olmaz”
Tarix elmləri doktoru, professor, siyasi ekspert Məhərrəm Zülfüqarlı “Bakı-Xəbər”ə bildirdi ki, Rusiyanın siyasətində erməni kartı həmişə bir forpost, başqalarına təzyiq vasitəsi kimi istifadə olunub. “Rusiya və Ermənistan arasında dostluqdan söhbət gedə bilməz. Erməniləri bura imperiyaya xidmətçi kimi gətiriblər. Sadəcə olaraq, Paşinyan rejimi Ermənistanı Rusiyadan aralamaq, imperiya caynağından qoparmaq istəyir. Ona görə də bu cür sözlərlə münasibətləri malalanır. Məktubda “xalqlarımızın dostluq ənənələri üstündə qurulub” fikri tamamilə yanlışdır, səmimiyyətdən uzaqdır. Çar Rusiyası dövründə bu ölkə imperiya olub, müsəlmanları əsarətdə saxlamaq üçün vətəni olmayan xristian erməni əhalini bura köçürüb və onlardan da bir vasitə kimi istifadə edib. Lazım olanda erməni-müsəlman qırğını salıb, müsəlmanlarla ermənilərə bir-birini qırdırıb. Həmişə də belə bir siyasət yürüdüb ki, biz olmasaq siz bir yerdə yaşaya bilməzsiniz, ona görə də Rusiyadan möhkəm yapışmaq lazımdır. Artıq bu nağılların vaxtı keçib və erməni xalqı başa düşür ki, Rusiya öz məqsədləri üçün lazım gələndə ona dost-qardaş deyir, lazım gələndə onu bada verir. Ona görə də Putin indiki gərgin, böhranlı vəziyyətində Ermənistanın Rusiyadan ayrılaraq başqa siyasət yürütdüyünü görür və sözlərlə Paşinyanı yumşaltmağa çalışır”.
M.Zülfüqarlı qeyd etdi ki, amma ermənilər artıq Rusiyanın mənfur siyasətini bilirlər. “Mənə belə gəlir, nə qədər Paşinyan kimi insanlar var, Rusiyanın Ermənistana girməsi, ondan bir forpost kimi istifadə etməsi mümkün olmayacaq. Yəni artıq XXI əsrdir, Çar Rusiyasının, SSRİ-nin və onların davamçısı olan Putinin siyasətini hamı yaxşı dərk edir. Ona görə də bu cür pafoslu sözlərlə heç kimi aldatmaq olmaz”-deyə M.Zülfüqarlı bildirdi.
İradə SARIYEVA
