Bəhruz Quliyev: “Diplomatik nümayəndəliklərin məhkəmə proseslərində iştirakı həm də şəffaflığın göstəricisidir”
Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəməsi davam etdirilir. Məhkəmə prosesi zamanı təqsirləndirilən şəxslər və şahidlər ifadə verir.
Maraqlıdır, Xocalı faciəsi ilə bağlı məhkəmə prosesinə Bakıdakı bütün diplomatik korpus nümayəndəlikləri cəlb edilə bilərmi?
“Ermənistanın Azərbaycana qarşı həyata keçirdiyi hərbi təcavüz təkcə region üçün deyil, bütövlükdə beynəlxalq hüquq və humanizm prinsipləri üçün ağır nəticələr doğurub”
“Səs” qəzetinin baş redaktoru, siyasi ekspert Bəhruz Quliyev “Bakı-Xəbər”ə şərhində bildirdi ki, Ermənistanın Azərbaycana qarşı həyata keçirdiyi hərbi təcavüz təkcə region üçün deyil, bütövlükdə beynəlxalq hüquq və humanizm prinsipləri üçün ağır nəticələr doğurub: “Xüsusən də Xocalı faciəsi bəşəriyyətə qarşı törədilmiş ən dəhşətli soyqırımı aktlarından biri kimi tarixə düşüb. Bu cinayətlərin beynəlxalq tribunal səviyyəsində qiymətləndirilməsi və hüquqi məsuliyyətin təmin olunması Azərbaycanın prinsipial mövqeyidir. Bu gün ölkəmizdə Ermənistanın törətdiyi müharibə cinayətləri, insanlıq əleyhinə əməllərlə bağlı məhkəmə prosesi aparılır. Şübhəsiz ki, bu prosesin gedişinə Bakıdakı diplomatik korpus nümayəndəliklərinin dəvət olunması tamamilə mümkündür və məqsədəuyğundur. Çünki dünya ictimaiyyətinin obyektiv informasiya alması, faktları yerində görməsi, şahidlərin ifadələrini eşitməsi beynəlxalq ictimaiyyətin doğru mövqe formalaşdırması üçün vacibdir. Azərbaycan dəfələrlə bəyan edib ki, biz regionda ədalətli və davamlı sülhün tərəfdarıyıq. Bununla yanaşı, sülhün əsası yalnız ədalət üzərində qurula bilər. Ədalətin bərqərar olması isə cinayətkarların məsuliyyətə cəlb edilməsi, beynəlxalq hüququn aliliyinin təmin olunması ilə mümkündür. Bu baxımdan, diplomatik nümayəndəliklərin məhkəmə proseslərində iştirakı həm şəffaflığın göstəricisidir, həm də beynəlxalq birliyin Ermənistanın törətdiyi vəhşiliklərə biganə qalmamasına çağırışdır”.
Həmsöhbətimiz bildirdi ki, sülh prosesində Azərbaycanın mövqeyi aydındır və prinsipialdir: “Biz sülh istəyirik, lakin heç vaxt ədaləti unutmadan, tarixi həqiqətləri təhrif etmədən. Xocalı soyqırımı, işğal dövründə törədilmiş terrorçuluq aktları və digər cinayətlər bu gün beynəlxalq ictimaiyyətin gözü qarşısında hüquqi müstəvidə sübuta yetirilir. Biz inanırıq ki, dünya birliyi bu həqiqətləri görəcək və haqqın yanında dayanacaq”.
Günel CƏLİLOVA
