Sahil Kərimli: “Bu ittifaq çərçivəsində ölkələrin milli təhlükəsizliyinin müdafiəsi, ümumiyyətlə xaricdən gələn təhdidlərin və təhlükələrin zərərsizləşdirilməsi istiqamətində də Azərbaycan...”
Türkiyənin Azərbaycandakı səfirliyində 30 avqust - Zəfər bayramı münasibətilə keçirilən tədbirdə Azərbaycan Müdafiə nazirinin müavini - Azərbaycan Ordusunun Baş Qərargah rəisi general-polkovnik Kərim Vəliyev deyib ki, cari il ərzində ümumilikdə 30-dək hərbi təlim keçiriləcək.
O bildirib ki, eyni zamanda, 70-dən artıq konfrans, seminar, kurs və məşq keçirilib: “İlin sonunadək bu tədbirlərin sayının artırılması və miqyasının genişləndirilməsi nəzərdə tutulur. Bundan əlavə, Azərbaycan və Türkiyə orduları, eləcə də dost ölkələrin hərbi qulluqçularının iştirakı ilə keçirilən təlimlərə də xüsusi diqqət yetirilir. Sentyabr ayında ölkəmizdə Azərbaycan, Türkiyə, Özbəkistan, Qazaxıstan, Pakistan və Qətərin xüsusi təyinatlılarının iştirakı ilə “Sonsuz Qardaşlıq” çoxmillətli təliminin keçirilməsi nəzərdə tutulub”.
Bu nə əməkdaşlıq formatıdır, hansı zərurətdən doğub və hansı perspektivə malikdir?
“Bu gün dünyada baş verən proseslər, yeni qütbləşmələr bu cür əməkdaşlıq formatlarını zəruri edir”
Siyasi ekspert Sahil Kərimli “Bakı-Xəbər”ə bildirdi ki, son illər Azərbaycan həm türkdilli dövlətlər, həm də digər müsəlman ölkələri ilə müxtəlif istiqamətdə əlaqələrini daha da genişləndirir və bu yöndə çox praqmatik siyasət həyata keçirilir: “Azərbaycan daim türkdilli, eləcə də digər müsəlman ölkələri ilə münasibətlərin dərinləşməsinə, inkişafına və hərtərəfli əməkdaşlıq perspektivlərinin açılmasına cəhd edən bir ölkə olub. Azərbaycan daim birləşdirici və bu istiqamətdə xoşniyyətli bir ölkə kimi siyasət həyata keçirib. Türk Dövlətləri Təşkilatının təşkilatlanması, əlaqələrin inkişafı və bundan sonra da müsəlman ölkələri ilə də müəyyən əməkdaşlıq formatlarının yaradılması, gələcəkdə perspektiv əlaqələrin təməlinin qoyulmasında da Azərbaycan çox mütərəqqi siyasət həyata keçirir.
Bu formatda da məqsəd ilk növbədə həm siyasi, həm iqtisadi əlaqələri dərinlışdirməkdir. Bu yöndə təhlükəsizlik məsələləri də əsas önəm daşıyan amillərdən biridir”.
S.Kərimli vurğuladı ki, bu gün dünyada təhlükəli tendensiyalar mövcuddur, qanlı toqquşmaların, müharibələrin artması böyük faciələrə gətirib çıxarıb. “Dövlətlərin təhlükəsizlik məsələsi də çox böyük önəm daşıyır. Bu baxımdan, Azərbaycan həm türkdilli dövlətlərlə, həm də digər müsəlman ölkələri ilə təhlükəsizliklə bağlı ortaq əməkdaşlıq formatları üzərində işləyir. Daha dəqiq desək, dost və qardaş ölkələrlə ittifaq qurulur. Bu ittifaq çərçivəsində ölkələrin milli təhlükəsizliyinin müdafiəsi, ümumiyyətlə xaricdən gələn təhdidlərin və təhlükələrin zərərsizləşdirilməsi istiqamətində də Azərbaycan öz niyyətlərini ortaya qoyur, dost-qardaş ölkələrlə, xüsusilə Türkiyə, Özbəkistan, Qazaxıstan, Pakistan və Qətərin xüsusi təyinatlıları ilə birgə təlimlərin keçirilməsi ilə bağlı məsələ də bu əlaqələrin bariz nümunəsi kimi göstərilməlidir.
Əlbəttə, təhlükəsizliyin qorunması, xaricdəki düşmənlər tərəfindən gələn təhdidlərin neytrallaşdırılması istiqamətində çox böyük səylər ortaya qoyulmalıdır. Çünki bu gün dünyada baş verən proseslər, dünyadakı yeni qütbləşmələr bu cür əməkdaşlıq formatlarını zəruri edir.
Hesab edirəm ki, türkdilli ölkələrin və digər müsəlman dövlətlərinin iştirakı ilə ərsəyə gələn bu yeni format olduqca perspektivlidir. Dost-qardaş dövlətlərin milli təhlükəsizliyinin qorunması baxımından birgə səylərin göstərilməsu zərurət kimi meydana çıxıb”-deyə S.Kərimli qeyd etdi.
İradə SARIYEVA
