Rusiya Azərbaycana sanksiyalar hazırlayır? - Aranı gərginləşdirmək istəyənlərin yeni cəhdləri...
Rəsul Cahangirli: “Rusiya buna getsə, bu onlara baha başa gələcək”
Moskva Cənubi Qafqaz və Mərkəzi Asiyada rusdilli əhaliyə qarşı “təzyiqlərin artdığı” iddiası ilə bu ölkələrə qarşı sərt sanksiya paketi hazırlayır.
Kreml bu ölkələrdə rus dilindən istifadənin məhdudlaşdırılması ilə bağlı qanunların qəbulunu “dil hüquqlarının pozulması” kimi qiymətləndirir.
Moskva tərəfindən müzakirəyə çıxarılan əsas tədbirlər bunlardır:
- vizaların tətbiqi;
- pul köçürmələrinə məhdudiyyətlər (bu, əsasən, Rusiyada işləyən miqrantlara ciddi təsir göstərəcək);
- əmək kvotaları;
- rus şirkətlərinin iştirakı ilə həyata keçirilən logistika və infrastruktur layihələrinin dayandırılması.
Sanksiyaların əsas hədəfində Tacikistan, Özbəkistan, Qırğızıstan və Cənubi Qafqaz ölkələri dayanır. Bundan əlavə, Rusiya sərhədyanı bölgələrdə hərbi təlimlər və “ruslara təhlükə yaranacağı təqdirdə humanitar müdaxilə” də daxil olmaqla, güc tətbiqi ssenarilərini də istisna etmir.
Sözügedən məsələyə aydınlıq gətirən ekspert Rəsul Cahangirli “Bakı-Xəbər”ə açıqlamasında bildirdi ki, Rusiya buna getsə, bu onlara baha başa gələcək: “Bunlar gör başlarını necə itiriblər ki, nə etdiklərini bilmirlər. Məsələ ondadır ki, Ukraynaya təcavüzlə əlaqədar Rusiya ciddi sanksiyalar altındadır. Avropa İttifaqının demək olar bütün üzvləri, qurumda təmsil olunmayan digər ölkələri Rusiyaya qarşı sanksiyalarda fəal iştirak edirlər. Bunlar nəinki Rusiya ilə iqtisadi-ticarət əlaqələrini dayandırıblar, həm də hava məkanını bu ölkənin üzünə bağlayıblar. Quru yolu əlaqələrini kəsiblər. Ancaq nə Cənubi Qafqaz ölkələri, nə də Orta Asiya ölkələri Rusiyaya qarşı sanksiyalara qoşulmayıb. Əksinə, bir sıra məsələlərdə Rusiya bu ölkələr vasitəsilə sanksiyaları dəlir, bu ölkələr üzərindən bir sıra vacib texniki avadanlıqları əldə edir. Rusiya əmək bazarındakı çatışmazlıqları məhz sözügedən ölkələrin əmək miqrantları hesabına təmin edir. Paradoksal məqam odur ki, Orta Asiya ölkələri Rusiyanın yaratdığı iqtisadi, hərbi bloklarda təmsil olunur, amma Moskva bu ölkələri sanksiya ilə hədələyir. Tutaq ki, Rusiya Cənubi Qafqaz və Orta Asiya ölkələrinə qarşı sanksiyalar qəbul etdi. Bu ölkələr də analoji cavab addımları atdılar. O zaman Rusiyanın vəziyyəti necə olacaq? Məsələn, Cənubi Qafqaz və Orta Asiya ölkələri hava məkanını Rusiyanın üzünə bağladılar, bu zaman nə olacaq? Cavab çox sadədir, Rusiya tamamilə təcrid oluna bilər. Bu ölkələrdə bazarları, tranzit yolları itirəcək. Bütün bunlar isə nəticə etibarı ilə Rusiyanın iqtisadiyyatını çökdürəcək”.
Vidadi ORDAHALLI
