Məhəmməd Əsədullazadə: “İstənilən halda Ermənistana inanmaq, etibar etmək olmaz”
Ermənistan Xarici İşlər Nazirliyinin yaydığı bəyanatda rəsmi İrəvanın üçüncü dövlətlərin Ermənistan ərazisindən digər ölkələrə qarşı hərbi əməliyyat üçün istifadə etməsi ehtimalını rədd etdiyi bildirilib.
Bu bəyanat ilk baxışdan Ermənistanın baş naziri Nikol Paşinyanın Azərbaycana üstüörtülü mesajı kimi təəssürat yaradır. Çünki Rusiyanın Gümrüdəki 102-ci hərbi bazasına yeni müqaviləli hərbçilərin cəlb olunması barədə məlumatlar yayılır. Məsələ burasındadır ki, bu məlumatlar Rusiya-Azərbaycan münasibətlərinin gərginləşməsi fonunda yayılıb. Yəni belə bir təsəvvür yarana bilər ki, Kreml Gümrüdəki hərbi bazanı Azərbaycan əleyhinə gücləndirib.
Bütün bunların fonunda Ermənistanın bu sahədəki səmimiyyətinə nə dərəcədə inanmaq olar? Ermənistan nə dərəcədə bu işdə ardıcıl olacaq və öz ərazisindən imkan verməyəcək ki, üçüncü ölkələrə qarşı istifadə edilsin? Özü də burada söhbət təkcə Azərbaycana qarşı olmaqdan getmir. Qərb ölkələrinin əlində İrana qarşı istifadə məsələsi də var. Yaxud da Gürcüstana qarşı Rusiyanın mənafeyi naminə istifadə məsələsi var. Bir sözlə, Ermənistan bu siyasətində nə dərəcədə ardıcıl olacaq?
“Geosiyasi şərtlər dəyişib və bu zaman Paşinyan hansısa səhv buraxsa, bu ona baha başa gələcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, son vaxtlar Rusiyanın Cənubi Qafqaz siyasətində aktivlik müşahidə edilir: “Təsadüfi deyil ki, son günlər Rusiya Gümrüdəki 102-ci hərbi bazasını gücləndirməklə məşğuldur. Bu, əsasən Zəngəzur dəhlizi ilə bağlıdır. Ümumiyyətlə, Rusiya Cənubi Qafqaz və Mərkəzi Asiya siyasətində korrektlər etməyə başlayır. Ukraynada hərbi və siyasi məqsədlərinə çata bilməyən Kreml öz geosiyasi mövqelərini möhkəmləndirmək üçün Azərbaycan, Ermənistan, Qazaxıstan, Özbəkistan və Gürcüstana bir çox istiqamətlərdə təzyiqlər edir. Rusiya çalışır ki, Qərbin Zəngəzur dəhlizində iştirakçılığının qarşısını alsın. Düşünmürəm ki, Gümrü bazasındakı güclənməni konkret olaraq Azərbaycana hücum məqsədi üçün istifadə etsin. Ancaq məsələ ondadır ki, Ermənistan tərəfi də bundan ehtiyatlanır. Paşinyan narahatdır ki, seçkilərə bir neçə ay qalmış 102-ci hərbi bazada fəallaşma son nəticədə onun güc yolu ilə devrilməsi ilə nəticələnə bilər. Erməni tərəfi daha çox bundan narahatdır. Təbii ki, istənilən halda Ermənistana inanmaq, etibar etmək olmaz. Ancaq hazırkı dönəmdə Paşinyan müharibənin əleyhinədir. Çünki geosiyasi şərtlər dəyişib və bu zaman hansısa səhv buraxsa, bu ona baha başa gələcək. Rusiya regionda kommunikasiya və resurslar uğrunda mübarizə aparır. Hər vasitə ilə çalışır ki, regionu əlində saxlasın. Gümrüdə də məhz buna görə hərbi bazasını gücləndirir. Ancaq Rusiya nə qədər çalışsa da, dünya dəyişir”.
Vidadi ORDAHALLI
