Arzuxan Əlizadə: “Rusiya ilə bağlı məqam xarakterlidir və real təsirə malik deyil”
BRICS ölkələrinin liderləri Rio-de-Janeyroda keçirilən sammitin bəyannaməsini qəbul ediblər.
Bəyannamədə bir sıra məsələlərə toxunulub. Uzun bəyannamədə Rusiyanın Ukraynadakı müharibəsi ilə bağlı müəyyən məqamlara toxunulub. Sənəddə Ukraynanın may və iyunda Rusiya infrastrukturuna endirdiyi zərbələr pislənib, mülki itkilər qeyd edilib və bu cür hərəkətlərə ən sərt şəkildə qarşı çıxdığı bildirilib: “Münaqişənin dialoq və diplomatiya yolu ilə sülhlə “Biz gözləyirik ki, Ukrayna üzrə hazırkı səylər Ukrayna üzrə davamlı sülh nizamlanmasına gətirib çıxaracaq”.
Rusiyanın xarici işlər naziri Sergey Lavrov bildirib ki, iyulun 6-dan 7-dək Rio-de-Janeyroda keçirilən BRICS sammitinin iştirakçıları Ukraynadakı münaqişənin əsas səbəblərini başa düşdüklərini nümayiş etdiriblər: “Bəyannamədə və çıxışlarda sammitin bir çox iştirakçıları Ukrayna böhranı ilə bağlı balanslı, obyektiv mövqelər ifadə etdilər və münaqişənin əsas səbəblərini başa düşdüklərini nümayiş etdirdilər”.
Göründüyü kimi, BRICS Rusiyanı tam müdafiə elədi. Ukraynanın Rusiyanın körpü və dəmiryollarına hücumu pisləyib. Bu baxımdan artıq BRICS Rusiya tərəfindən müharibəyə qoşulmuş sayıla bilərmi?
“Bəyannamədə Ukrayna ilə bağlı məqam olsa da bu, BRICS-in müharibəyə qoşulması anlamına gəlmir”
Sözügedən məsələ ilə bağlı fikirlərini “Bakı-Xəbər”lə bölüşən AMİP sədri, millət vəkili Arzuxan Əlizadə hesab edir ki, Rio-de-Janeyro bəyannaməsində Ukrayna ilə bağlı məqam olsa da bu, BRICS-in müharibəyə qoşulması anlamına gəlmir: “Əvvəla, Braziliyada keçirilən BRICS sammiti ən sönük tədbir idi. Ona görə ki, üzv ölkələrin bir neçəsi dövlət başçısı səviyyəsində ora getməmişdi. Nə Rusiya prezidenti Vladimir Putin, nə Çin dövlət başçısı Braziliyaya getmədi. Putin tədbirə onlayn formatda qatıldı. Rusiyanı Rio-de-Janeyro şəhərində xarici işlər naziri Sergey Lavrov təmsil edib. Putin həbs olunacağından qorxduğu üçün Braziliyaya getmədi. Çünki Braziliyə Roma statusuna qoşulub. BRICS-in bəyanatı forml xarakterli idi və hansısa real təsir gücünə malik deyil. Rusiya ilə bağlı məqam da bu baxımdan formal xarakterlidir və real təsirə malik deyil. Hazırda BRICS öz sıralarında 10 ölkəni birləşdirir: Braziliya, Rusiya, Hindistan, Çin, Cənubi Afrika Respublikası (CAR), Misir, İndoneziya, İran, Birləşmiş Ərəb Əmirlikləri (BƏƏ), Efiopiya. Bunların heç biri Rusiya tərəfində vuruşmaq niyyətində deyil. Rusiya tərəfində vuruşan Şimali Koreyadır, bu ölkə də BRICS-də təmsil olunmur. BRICS üzvü olan Hindistan heç vaxt ABŞ əleyhinə olan qərarlara imza atmaz. Çünki iki ölkə arasında çox yaxın münasibətlər mövcuddur. Bu baxımdan hesab etmirəm ki, BRICS Rusiya tərəfindən müharibəyə qoşulub”.
Vidadi ORDAHALLI
