Sahil Kərimli: “İran erməni təxribatına qarşı susmamalı, mövqe bildirməlidir ki...”
Azərbaycanın Xankəndi şəhərində keçirilən İqtisadi Əməkdaşlıq Təşkilatının (ECO) 17-ci Zirvə görüşündə İran prezidenti Məsud Pezeşkianın da iştirak etməsi Ermənistanı ciddi naharat edir.
Azərbaycana qarşı düşmən mövqeyi ilə seçilən və İran-Azərbaycan münasibətlərini mütəmadi olaraq qaralamağa çalışan, bizə qarşı şər-böhtan kampaniyası aparan İranşünas Vardan Voskanyan yenə də öz işindədir. Voskanyan iddia edir ki, Məsud Pezeşkianın Xankəndi səfəri guya İranın ictimai-siyasi dairələrində kəskin tənqidlərə və ciddi reaksiyalara səbəb olub, guya “sosial şəbəkələrin farsdilli seqmentində “#siyasi_iflas” həştəqi ilə prezidentin istefası prosesinin başlanmasına çağıran yazılar yayılıb”.
İran hökuməti belə yalançı erməni təbliğatçılarına niyə reaksiya vermir? İranda nə vaxtsa Pezeşkianın Qarabağ səfərinə etiraz olundu?
“İran hökuməti, rəsmi dairələri bu cür təxribatçı qüvvələri yerindəcə boğmalıdır, cəzalandırmalıdır, onların təxribatçılıq davranışlarının qarşısını müvafiq qaydada almalıdır”
Siyasi ekspert Sahil Kərimli “Bakı-Xəbər”ə bildirdi ki, ermənipərəst dairələrin bu cür təxribatçı açıqlamaları İranla Azərbaycan arasındakı münasibətləri gərginləşdirməyə xidmət edir: “Görünən odur ki, bu cür iftira dolu fikirlər ermənilərin İranla Azərbaycan arasında münasibətləri gərginləşdirmək üçün atdığı növbəti addımdır. Son aylarda Azərbaycanla İranın hərtərəfli əməkdaşlığı, münasibətlərinin istiləşməsi və dərinləşməsi, təbiidir ki, Ermənistanın radikal dairələrini çox ciddi narahat edir. Çünki İran çox uzun illər Ermənistana dəstək vermiş, Ermənistanı müdafiə etmiş ölkə imici qazanıb, onun belə bir imici formalaşıb. Amma Azərbaycan Prezidenti İlham Əliyevlə İran prezidenti Məsud Pezeşkianın son dövrlərdə sıx təmasları, İranla Azərbaycan arasında münasibətlərin istiləşməsi və inkişaf etməsi, eyni zamanda da Pezeşkianın Azərbaycana səfərlər etməsi, sonuncu dəfə də Xankəndidə keçirilən Zirvə görüşünə qatılması Ermənistandakı dairələri çox narahat edir”.
S.Kərimli qeyd etdi ki, artıq Ermənistan oyundankənar vəziyyətə düşdüyünü yaxşı anlayır. Onun bildirdiyinə görə, yəni Ermənistandakı dairələr, təxribatçı qruplaşmalar görürlər ki, İran artıq Ermənistanı dəstəkləmir, Ermənistanın yanında deyil, daha çox Azərbaycanla münasibətlərə üstünlük verir, bu da onları ciddi narahat edir. Hazırda İranın Azərbaycanla münasibətlərə üstünlük verəməsinin təsadüfi olmadığını deyən S.Kərimli qeyd etdi ki, çünki Azərbaycan regionda çox böyük güc və nüfuz sahibidir və İran da Azərbaycanın yaratdığı reallıqları düzgün qiymətləndirir, dəyərləndirir: “Bu baxımdan artıq İran da işğalçı və radikal meylli Ermənistanın yox, bölgədə sülh və təhlükəsizliyə çalışan Azərbaycanın yanında olduğunu bir daha nümayiş etdirir. O ki qaldı bu cür təxribatçı dairələrə İran hökumətinin nümayəndələri tərəfindən reaksiya verilməməsinə, bu da təəssüf doğurur. İran erməni təxribatına qarşı susmamalı, mövqe bildirməlidir ki, onlar öz yerlərini bilsinlər. Hesab edirəm, İran hökuməti, rəsmi dairələri bu cür təxribatçı qüvvələri yerindəcə boğmalıdır, cəzalandırmalıdır, onların təxribatçılıq davranışlarının qarşısını müvafiq qaydada almalıdır. Azərbaycan tərəfi İrandan bunu gözləyir. Qənaətimə görə, İran da vəziyyəti düzgün qiymətləndirəcək və bu cür təxribatçı və İran-Azərbaycan münasibətlərinə kölgə salmaq, zərbə vurmaq istəyən qüvvələri anındaca yerində oturdacaq”.
İradə SARIYEVA
