Ermənistanda hakimiyyətlə kilsə daxilində qarşıdurma davam edir. Belə görünür ki, baş nazir Nikol Paşinyan Erməni Apostol Kilsəsinin rəhbərliyini, konkret olaraq II Qaregini taxtından salmaqda israrlıdır. Məhz belə bir vaxtda Paşinyan II Qareginə qarşı daha bir sərt ittiham irəli sürüb. O qeyd edib ki, II Qareginin subaylıq andını pozduğu və övladının olduğu məlum olarsa, o, bütün ermənilərin katolikosu ola bilməz.
Paşinyan hər kəsin şəxsi və ailə həyatının məxfiliyinə hörmətlə yanaşdığını bildirib: “Lakin bütün ermənilərin katolikosunun bu cür şəxsi həyatı ola bilməz. Mən bu problemi Erməni Apostol Kilsəsinin davamçısı kimi qaldırıram, çünki bunu mənəvi təhlükəsizlik problemi kimi görürəm. Bu sözləri həm də Ermənistanın baş naziri kimi deyirəm, çünki bunu dövlət təhlükəsizliyi problemi kimi görürəm”. Ekspertlər qeyd edir ki, Ermənistan hökumətinin başçısının əlində faktlar var. Bununla da o, II Qaregini küncə sıxmağa çalışır. Qeyd edək ki, bundan əvvəl Paşinyan və həyat yoldaşı Anna Akopyan Facebook səhifələrində Erməni Apostol Kilsəsinin nümayəndələrinə qarşı kəskin alçaldıcı ifadələrlə çıxış ediblər. bu günlərdə Paşinyan sosial şəbəkələrdə beş post paylaşaraq, din xadimlərini, senzurasız ifadə istifadə edərək, Ermənistanda neçə yepiskopun nikaha girməməklə bağlı anda sadiq olduğunu soruşub. Baş naziri həyat yoldaşı da dəstəkləyib, o da öz səhifəsindəki yazılarda din xadimlərini müxtəlif günahlarda ittiham edib. İndi II Qareginin subaylıq andını pozması məsələsi Paşinyanın növbəti hücumu hesab olunur. Baş nazirin Apostol Kilsəsinin liderliyinə namizədlərin xarakter yoxlanışından keçməsi ilə bağlı iddiası da Ermənistanda şok effekti yaradıb.Təhsil naziri Janna Andreasyan Nikol Paşinyanın nöqteyi-nəzərini dəstəkləsə də, icra hakimiyyətinin dövlətin katolikos seçkisində iştirakını necə təsəvvür edəcəəyinə aydınlıq gətirməyib. Konstitusiya Erməni Apostol Kilsəsinin müstəsna missiyasını təsbit edir. Dövlətlə kilsə arasında münasibətləri tənzimləyən qanun kilsənin özünüidarəsini tanıyır. Andreasyan qeyd edib: “Bütün suallar vaxtında öz cavabını alacaq. Kilsə də daxil olmaqla, islahatlara ehtiyac olduğu aydındır. Əgər siz bu problemləri görmürsünüzsə, onda üzr istəyirəm, çünki problemlər göz qabağındadır”. Konstitusiya üzrə ekspert Vardan Poqosyan isə istisna etmir ki, hökumət öz məqsədinə nail olmaq üçün yeni konstitusiya layihəsindən Erməni Apostol Kilsəsinin müstəsna missiyasını tanıyan müddəanı çıxaracaq və bunun əvəzinə katolikos seçkilərində dövlətin iştirakı mexanizmlərini müəyyən edəcək: “Bu, təbii ki, bizim milli və kilsə ənənələrimizə tamamilə zidd addım kimi qiymətləndiriləcək. Yüksək rüsvayçılıq heyrətləndiricidir, bunu hətta Paşinyan və onun əlaltılarından gözləmək belə çətindir. Erməni kilsəsinin əleyhinə bu cür danışan ancaq bizim düşmənlərimizdir”. Parlamentin müxalifətdəki “Hayastan” fraksiyasının üzvü Lilit Qalstyan Paşinyanın kilsə ilə bağlı açıqlamalarını kimliyi məhv etməyə yönəlmiş hərəkət adlandırır: “Bizim şəxsiyyətimizin qorunması və qorunub saxlanması Nikol Paşinyanın yürütdüyü siyasətin əksinədir, bu siyasət yalnız Azərbaycan və Türkiyəni sevindirmək siyasətidir. Kilsə bu gün ən yüksək nüfuza malik milli qurumdur. Paşinyanın təxribatlarına baxmayaraq, erməni xalqının rəğbətini və sevgisini davam etdirən bir qurumun olduğunu görəndə o,sadəcə şok vəziyyətində deyil, əksinə, çaşqınlıq içindədir". Müxalifətçi deputatın fikrincə, dövlətin katolikosun seçilməsi ilə heç bir əlaqəsi yoxdur: “Buradakı seçkini keçirən məclis həm dünyəvi hissədən, həm də ruhanilərdən ibarətdir, dövlətin orada işi yoxdur, oradakı erməni xristian icması öz ali patriarxını seçir”. Baş nazirin aparat rəhbərinin müavini Taron Çaxoyan isə qeyd edir: “Allaha andını inkar edənlər ruhani ola bilməzlər”. Belə bir vaxtda Ali Ruhani Şura bütün ermənilərin katolikosu II Qareginin sədrliyi ilə keçirilən iclasda, özlərinin dediyi kimi, “son günlərdə baş nazirin qızışdırdığı biabırçı anti-kilsə kampaniyasının” dayandırlmasını tələb ediblər. Bununla bağlı Ali Ruhani Şuranın bəyanatında deyilir: "Ermənistanın baş naziri Erməni Apostol Kilsəsinə qarşı növbəti kampaniyaya başlayıb, dövlət xadiminə yaraşmayan sözlər, təhqirlər və ittihamlarla özünü qanundan üstün tutur. Təhqir və nalayiq ifadələrlə dolu nəşrlər elementar insan hüquqlarına zidd, əsaslı insan haqları, dini zəmində kobud pozuntulardır. Bu anti-kilsə mövqeyi açıq-aydın siyasi məqsədlərlə diktə edilib və milli həyatda və beynəlxalq dairələrdə hörmət qazanan erməni kilsəsi və ruhanilərinin nüfuzunu aşağı salmaq, kilsənin səsini susdurmaq və onun ictimai təsirini azaltmaq cəhdidir. Bu cür hərəkətlər cəmiyyəti parçalayır, millətin ruhunu və yüksək vətənpərvərlik şüurunu zəiflədir. Bu cür qınaq doğuran təşəbbüslər Azərbaycan təbliğat maşını tərəfindən erməni xalqına və erməni kilsəsinə yönəlmiş böhtan və saxta ittihamlarla müəyyən qədər bağlı olmaqla, xarici anti-erməni qüvvələrin ambisiyalarına xidmət edir. Erməni kilsəsi üzərinə götürdüyü öhdəlikləri dərk edərək, mənəvi xilaskarlıq missiyasını, dövlətin və millətin ali maraqlarının, müqəddəs dəyərlərimizin qorunmasını güdərək əzmlə davam etdirəcək”.
Nahid SALAYEV
