Arzuxan Əlizadə: “Prinsipcə, danışıqların hansısa fundamental nəticəyə gətirib çıxarmayacağı bəlli idi”
Məlum olduğu kimi, Rusiya ilə Ukrayna arasında İstanbulda keçirilən danışıqların ikinci raundu, demək olar, nəticəsiz başa çatıb. Rusiya öz təkliflər memorandumunu təqdim edib. Memorandumda Ukraynadan dörd vilayətdən imtina edilməsi və prezident seçilməsi şərti irəli sürülür. Burada atəşkəs və sülhün üzərindən xətt çəkən əsas tələb məhz Rusiyanın Ukraynadan öz ərazilərindən imtina tələb etməsidir.
Bir sözlə, qeyd-şərtsiz atəşkəslə bağlı razılaşma əldə edilmədi. Yalnız əsirlərin dəyişdirilməsi ilə bağlı razılaşma oldu ki, əslində bu, mayın 16-da İstanbulda əldə edilən razılaşmanın davamı idi. Bu tərəfdən əsirlər dəyişdirilir, o tərəfdən müharibə davam etdiyi üçün əsir düşmə halları davam edir. O cümlədən, ölən və yaralıların sayı təzədən artır. O baxımdan bu, danışıqlar prosesində uğur əldə edilməsi sayıla bilməz. Danışıqlar gedə-gedə Rusiyanın hava limanları, Ukrayna od tutub yanır.
“İstənilən danışıqların mənasız məcrada inkişafı daha çox insan ölümünə səbəb olur”
Sözügedən məsələyə aydınlıq gətirən AMİP sədri, millət vəkili Arzuxan Əlizadə “Bakı-Xəbər”ə açıqlamasında bildirdi ki, prinsipcə, danışıqların hansısa fundamental nəticəyə gətirib çıxarmayacağı bəlli idi: “Ən azından ona görə ki, Rusiyanın bunda maraqlı olmadığı ortadadır. Rusiya azacıq bunda maraqlı olsaydı, həm mayın 16-da, həm də sonuncu dəfə gedən danışıqlarda hücumları azaldardı. Ancaq Rusiya nəinki hücumları azaltmadı, əksinə, daha intensiv formada Ukrayna şəhərlərini atəşə tutdu və cəbhədə hücumların sayını artırdı. Ukrayna yaxşı bilirdi ki, budəfəki danışıqlarda bir nəticə əldə edilməyəcək. Ona görə də Rusiyanın dərinliklərində yerləşən hərbi hava bazalarına güclü dron zərbələri endirdi. Danışıqlarda hansısa irəliləyişə ümid olsaydı, fikrimcə Kiyev buna getməzdi. Çünki atəşkəsdə ən ən çox maraqlı olan tərəf Ukraynadır. Putin isə danışıqlarda maraqlı deyil. Bəs Putin danışıqlarda niyə maraqlı deyil? Bunun bir neçə səbəbi var. Başlıca səbəb odur ki, üç il üç aydır müharibə getsə də, Putun Donbası tam ələ keçirə bilməyib. Digər tərəfdən, atəşkəs getsə, ondan sonra yenidən müharibəyə başlamaq Rusiya üçün asan olmayacaq. Çünki bu zaman Ukrayna mövqelərini möhkəmləndirəcək. Həm də Rusiya cəmiyyəti də gedən müharibədən yorulub. Hazırda buna rus cəmiyyəti etiraz edə bilməsə də, atəşkəsdən sonra Kreml yenidən müharibəyə başlayarsa, bu, Rusiya cəmiyyətində narazılığı açıq müstəviyə keçirə bilər. Üstəlik, atəşkəs başlasa, bunun uzadılması gündəmə gələcək. Bu zaman situasiya dəyişəcək və yeni reallıqlar yarana bilər. Bütün bunların fərqində olan Putin atəşkəsə getmək istəmir. Çünki situasiya dəyişərsə, bu, Putinin də sonunu gətirə bilər. İstənilən danışıqların mənasız məcrada inkişafı daha çox insan ölümünə səbəb olur”.
Vidadi ORDAHALLI
