Avropanın əsas qüvvəsi Ukraynanın NATO üzvlüyünü dəstəklədi...
Əli Orucov: "Ukrayna NATO-ya üzv qəbul olunarsa, bu, Alyansla Rusiyanın birbaşa müharibəsi demək olardı ki, bu da ağlabatan deyil"
NATO-nun Haaqada keçiriləcək sammiti öncəsi mövqelərin əlaqələndirilməsi məqsədilə Vilnüsdə keçirilən sammitdə Baltikyanı, Şimali və Mərkəzi Avropa ölkələri Ukraynanın NATO-ya daxil olması ilə bağlı öhdəliklərini bir daha təsdiqləyiblər. Vilnüs sammitində onlar sülhə maraq göstərməyən Rusiyaya təzyiqləri davam etdirəcəklərinə söz veriblər.
NATO üzvü olan Şimali və Mərkəzi Avropa, eləcə də Baltikyanı ölkələr Ukraynanın alyansa qoşulmasını dəstəkləyiblər. Bu barədə Polşa, Rumıniya və Litvanın iyunun 2-də Vilnüsdə Buxarest Nine və Şimali Avropa ölkələrinin sammitinin yekunları üzrə dərc olunmuş birgə bəyanatında deyilir.
Onların sözlərinə görə, sammitdə iştirak edən ölkələr Ukraynanın Şimali Atlantika Alyansına gələcək üzvlüyünü qətiyyətlə dəstəkləyirlər.
Sənəddə qeyd edildiyi kimi, Rusiya Ukraynada sülhün bərqərar olmasına həqiqi maraq göstərməyib. Buna görə də sammitdə iştirak edən ölkələr Rusiya Federasiyasının cilovlanması, xüsusən də Aİ-nin yeni sanksiyalarının dəstəklənməsi üçün səyləri daha da gücləndirmək niyyətində olduqlarını bəyan etdilər.
İclasda iştirak edən Ukrayna prezidenti Vladimir Zelenski tərəfdaşlara göstərdikləri köməyə görə təşəkkür edib və artıq dörd ildir Rusiyanın işğalından müdafiə olunan ölkəsinə yardım göstərməyə çağırıb. "Silah istehsalı həlledici əhəmiyyət kəsb edir. Ukrayna artıq silaha olan tələbatının 40%-ni ödəyə bilər, lakin sabit maliyyə axınına ehtiyac var", - o deyib.
Zelenski vurğulayıb ki, Ukrayna ordusunun cəbhə xəttindəki hərəkətləri, xüsusilə dron texnologiyalarına investisiyaların effektivliyini nümayiş etdirir.
Yəni Avropanın əsas qüvvələri Ukraynanın NATO-ya üzvlüyünu, Kiyevə yardımları davam etdirməyi və Rusiyaya sanksiyaların gücləndirilməsini dəstəklədi. Bu, vəziyyəti dəyişməyə qadir qərardırmı?
Məsələ ilə bağlı baki-xəbər.com-a açıqlamasında politoloq Əli Orucov bildirdi ki, Ukraynanın NATO-ya üzvlüyü indiki halda mümkün və real görünmür: "Əgər Ukrayna NATO-ya üzv qəbul olunarsa, bu, Alyansla Rusiyanın birbaşa müharibəsi demək olardı ki, bu da ağlabatan deyil.
Şimal qonşumuzun Ukraynaya hərbi təcavüzünə gətirdiyi səbəblərdən biri də məhz Kiyevin NATO üzvülüyünə qəbul ediləcəyi ilə bağlıdır. Halbuki, NATO-da əsas söz sahibi olan Birləşmiş Ştatlar Ukraynanın bu alyansa üzvlülüynə qarşıdır. Nəinki Ukraynanın, hətta Gürcüstan və Moldovanın da həmin hərbi blokda olmasını arzu etmir. Ancaq Qərb Rusiya işğalını durdurmaq üçün Ukraynaya hər cür dəstəyini bundan sonra da davam etdirməlidir və etdirəcək də. Əgər bu dəstək vaxtında və lazımı səviyyədə göstərilsəydi, vəd olunan silahlar vaxtında Kiyevə çatdırılsaydı, cəbhə xəttində mənzərə indiki kimi olmazdı.
Hadisələrin dramatik inkişafı bir daha sübut etdi ki, Kremli diplomatik danışıqlar və güzəştlərlə durdurmaq mümkün deyil və onun daha geniş, qlobal ambisiyaları var. Rusiyanın Ukraynada qalib gəlməsi dünyanın siyasi və geopolitik nizamını təhlükəli həddə dəyişəcək. Xüsusən də Moskva postsovet, Mərkəzi və Şərqi Avropada təsirini və nüfuzunu bərpa etmək üçün hərəkətə keçəcək.
Adıçəkilən bölgələr son 200 il ərzində Rusiya və SSRİ imperiyasının təsir dairəsində olub və Kreml indi də həmin coğrafiyanı öz təsir dairəsi hesab edir. Ona görə də NATO üzvləri olan Mərkəzi və Şərqi Avropa ölkələri təhlükənin ciddiliyini daha yaxşı anlayır. Moskvada imperiyapərəst qüvvələr bu iddialarını gizlətmirlər və açıq şəkildə bəyan da edirlər. Əgər Ukrayna hərbi cəhətdən üstünlük əldə edə bilərsə və cəbhə xəttində vəziyyət tam Kiyevin xeyrinə dəyişərsə, bu, Qərbin təhlükəsizlik arxitekturasının qorunmasına təminat yaradar. Bunun üçün Qərb Ukraynanın müdafiə gücünü artırmağın və silah istehsalının genişlındirilməsinin qayğısına qalmalıdır. Doğrudur, Tramp administrasiyasının Ukrayna-Rusiya müharibəsinə yönəlik sistemli və ardıcıl siyasi xətt yürütməməsi qərbli müttəfiqlərini çətin duruma salıb. Lakin Qərbin tədricən müdafiə qabiliyyətini artırması istiqamətində atdığı addımlar ilkin nəticələrini verməkdədir. Rusyanın Ukraynada məğlubiyyəti Qərbin də xilası anlamına gəlir. Qərb məcburdur ki, özünü də xilas etsin".
Dəniz NƏSİRLİ
