Ramil Məmmədli: “Bu, onu göstərir ki, istənilən halda ermənilər separatçı meyllərin tərəfdarıdılar”
Məlum olduğu kimi, 2024-cü ilin fevralından Rusiya-Ukrayna müharibəsi bütün şiddəti ilə davam edir. Sözügedən müharibədə hər iki tərəf böyük itkilər verir.
Çox maraqlıdır, Ukraynada azərbaycanlılarla ermənilərin sayı aşağı-yuxarı eynidir. Yarım milyonadak azərbaycanlı, bir o qədər də erməni bu ölkənin vətəndaşıdır. Ancaq qəribədir ki, müharibə başlayandan dəfələrlə hansısa azərbaycanlının həlak olması ilə bağlı məlumatlar yayılsa da, ermənilərlə bağlı belə məlumatlar yoxdur. Heç erməni internet resurslarında belə, buna rast gəlmirik. Ancaq ermənilər Rusiyada ayrıca erməni batalyonu yaradıb Ukraynaya qarşı vuruşurlar. Söhbət ermənilərdən ibarət “Arbat” (“Armyanskiy batalyon”) muzdlu batalyonundan gedir. Rusiya və işğal altındakı Abxaziya ermənilərindən təşkil olmuş “Arbat” muzdlu batalyonu 2023-cü ildə Moskvada erməni kilsəsindən birbaşa döyüşlərə yola salınıb. Ukraynaya qarşı savaşan erməni muzdluların komandiri keçmiş “Vaqner” döyüşçüsü Ayk Qasparyandır.
“Həqiqətən də erməni əsilli Ukrayna vətəndaşlarının bu ölkənin müdafiəsində iştirakını görmürük”
Sözügedən məsələni “Bakı-Xəbər”ə şərh edən hərbi ekspert Ramil Məmmədlinin fikrincə, bütün bunlar ermənilərin kimdən tərəf olduqlarını ortaya qoyur: “Bu, onu göstərir ki, istənilən halda ermənilər separatçı meyllərin tərəfdarıdılar. Bu, həmin ermənilərdir ki, 90-cı illərdə “Baqration” batalyonu yaradıb Abxaziya separatçıları ilə birlikdə Gürcüstana qarşı vuruşublar. İndi isə ermənilər Rusiya ilə birlikdə Ukraynaya qarşı vuruşurlar. Burada təəccüblü bir şey görmürəm. Çünki ermənilər hər zaman belə olub. Müharibə başlayandan sonra hardasa 10 milyon nəfərin Ukraynanı tərk edib. Ermənilərin çoxu ya ölkəni tərk edib, ya da Ukraynanın qərb vilayətlərinə yerləşiblər. Donbasda yaşayan ermənilər isə Rusiyanın tərəfinə keçiblər. Baxmayaraq ki, Ukraynada ermənilərə qarşı hansısa ayrı-seçkilik olmayıb. 2014-2021-ci ildə Ukraynanın daxili işlər naziri Arsen Avakov adlı erməni əsilli şəxs olub. Bütün bunlara baxmayaraq, ermənilər Ukraynaya xəyanət etdilər. Bu ölkənin ərazi bütövlüyünün qorunmasına töhvə vermirlər. Həqiqətən də erməni əsilli Ukrayna vətəndaşlarının bu ölkənin müdafiəsində iştirakını görmürük. Halbuki, Ukraynada azərbaycanlılarla yanaşı, digər millətlərin necə vuruşduğu və həlak olması ilə bağlı məlumatlar yayılır. Əgər onların içində ermənilər olsaydı, Qərbpərəst mövqedən çıxış edən erməni siyasi dairələri bundan propaqanda məqsədi üçün istifadə edərdilər. Guya ki, ermənilər Rusiya təcavüzünə qarşı Ukrayna ilə eyni mövqedədilər. Ancaq göründüyü kimi, ermənilər Rusiyanın təcavüzünü dəstəkləyirlər”.
Vidadi ORDAHALLI
