Ermənilər hələ də xəyal dünyasından ayrılmaq, uydurduqları saxtakarlıqların onları hansı vəziyyətə saldığını görmək istəmirlər. O qədər yalan danışıblar, saxtakarlqılar ediblər ki, özləri o yalanın toruna düşüblər. Bilirik ki, ermənilər uzun illərdir Sərdarabad döyüşlərində qazandıqları “qələbə” ilə öyünürlər.
Hətta erməni mediasında iddia edilir ki, guya 1918-ci ilin mayında Sərdarabad döyüşü bunların "şanlı tarixi"nin əsas səhifələrindən birini təşkil edir. Ermənilərin yazıçısı, siyasətçisi və diplomatı adlandırdıqları Avetis Ağaronyan daha böyük saxtakarlıq edərək heç bir əsas olmadan
Sardarabad döyüşünü “XX əsrin Avarayrı” adlandırıb. Guya 1918-ci ildə türk ordusu “üzərində” qazandıqları “qələbə" erməniləri ikinci "soyqırımdan" xilas edib, eyni zamanda, "təxminən 6 əsr əvvəl itirilmiş dövlətçiliyi bərpa etməyə" imkan verib. Bunların hansı dövlətçilikdən danışdıqları məlum deyil.
İddia edirlər ki, guya 1918-ci ilin fevralında rus ordusunun Qafqaz cəbhəsindən çıxarılmasından "istifadə edən" türklər (Oktyabr inqilabından sonra Rusiyanın Birinci Dünya müharibəsindən geri çəkilməsini nəzərdə tuturlar) "hücuma keçərək" bütün "Qərbi" və "Şərqi Ermənistan"ı, Gümrünü və sairi "işğal" ediblər (?), ermənilər də guya onlara qarşı vuruşublar. Bu azmış kimi, Qars, Sarıqamış, Ərzincan kimi şəhərlərin də onlara "aid olduğunu" və Osmanlının oranı tutduğunu yazırlar. O qədər ağ yalan yazırlar ki, adam bu toplumun yalan uydurmaq məharətinə təəccüb etməyə bilmir. Guya mayın 21-dən 28-ə qədər gedən döyüşlərdə türk qoşunları "məğlub" olub, 3500-ə yaxın insan həyatını itirib. "Mayın 28-də isə Erməni Milli Şurası Birinci Ermənistan Respublikasının yaradıldığını elan edib".
Onu da yazırlar ki, bu döyuşdə ermənilərlə yanaşı minə yaxın rus əsgəri iştirak edib, bunu da rus erməni “qardaşlığının” göstəricisi kimi qeyd edirlər.
Qasım Hacıyev: “Sərdarabad döyüşü ruslarla osmanlılar arasında olub və bu döyüşü ermənilərin öz adlarına çıxması saxtakarlıqdır”
Professor Qasım Hacıyev "Bakı-Xəbər"ə bildirdi ki, ermənilər Osmanlıya xəyanət ediblər, bu tarixi faktdır. Q.Hacıyev qeyd etdi ki, Ermənistan adlı dövlətin də hansı şəraitdə, hansı xalqın torpaqları üzərində yaradıldığı bütün dünyaya məlumdur. "Sərdarabad döyüşü olub, amma məsələ ermənilərin uydurduğu şəkildə deyil. Ermənilər bizim ərazilərə köçürüldükdən sonra Çar Rusiyasının təbəəliyini qəbul etdilər. Çünki İngiltərə Osmanlı ilə münasibətləri pozmamaq üçün erməniləri qəbul etmədi, onlar da Rusiyanın ətəyindən yapışdılar. Ruslara arxalanıb, rus ordusunun içində osmanlılara qarşı döyüşlərdə iştirak ediblər, əsasən xəfiyyəliklə məşğul olublar. Amma onların xüsusi şücaət göstərməkləri, igidlik və qəhrəmanlıqları barədə deyilənlər hamısı əfsanədir”-deyə Q.Hacıyev qeyd etdi.
Q.Hacıyev onu da vurğuladı ki, ermənilərin Sərdarabad döyüşünü “Avarayr”la müqayisə etməsi də onların növbəti saxtakarlığından başqa bir şey deyil. 600 il əvvəl ermənilərin heç bir yerdə dövlətinin olmadığını deyən Q.Hacıyev qeyd etdi ki, onlar başqa dövlətlərin himayəsində yaşayıblar. “Sərdarabad döyüşü ruslarla osmanlılar arasında olub və bu döyüşü ermənilərin öz adlarına çıxması saxtakarlıqdır, onlar o döyüşlərdə ancaq xəfiyyəliklə məşğul olublar. Heç o zaman Ermənistan adlı saxta dövlət belə yox idi. Ermənilərin heç bir dövləti yox idi və onlar rusların himayəsinə sığınıb Osmanlıya arxadan zərbə endirirdilər”-deyə Q.Hacıyev qeyd etdi.
Məhərrəm Zülfüqarlı: “Sərdarabad döyüşü rus-türk cəbhəsində gedən döyüşlərdən biridir, bu döyüşdə də Osmanlı təbəəsi olan ermənilər yaşadıqları dövlətə xəyanət edib rusların tərəfindən döyüşüblər”
Professor Məhərrəm Zülfüqarlı da “Bakı-Xəbər”ə bildirdi ki, ermənilər Sərdarabad döyüşünü təhrif edirlər. “Dəfələrlə deyildiyi kimi, dünyada vətəni olmayan üç xalq-yəhudilər, qaraçılar və ermənilər tarix boyu dövlət yaratmaq arzusu ilə yaşayıblar. Bu arzularını da reallıq kimi qələmə vermək istəyirlər. Akademik Ziya Bünyadov keçən əsrin 80-ci illərində bu proseslər başlayanda belə bir fikir söyləyib ki, ermənilərin qısa müddətdə 4-cü əsrdə, 380-ci ildə kiçik bir “dövləti” olub, bu “dövlət” qonşular tərəfindən ləğv olunandan sonra isə onların dünyaya yayılması başlayıb. Ermənilər harda yaşayırlarsa oranı özlərinə Vətən hesab etməyə və oranın tarixini saxtalaşdırmağa başlayırlar.
Ermənilərin Kiçik Asiya yarımadasında yaşaması, Türkmınçay müqaviləsindən sonra ruslar tərəfidən Qafqaza, xüsusən də Azərbaycan ərazisinə köçürülməsi faktları artıq dünyaya məlumdur.
Qaldı ki, Birinci Dünya müharibəsində gedən döyüşlərə. Bu döyüşlər rus imperiyası ilə Osmanlı imperiyası arasında olub. Yəni rus-türk cəbhəsində döyüşlər gedərkən ermənilər yaşadıqları Osmanlı dövlətinə xəyanət edib bu döyüşlərdə rusların tərəfinə keçiblər və arxadan Osmanlı qoşunlarına zərbə vurublar. İndi 1914-1918-ci illərdə rus-türk cəbhəsində gedən döyüşləri ermənilər özlərinin apardığı döyüş kimi qələmə verirlər. Guya ermənilərin dövləti olub, bunlar döyüş aparıblar. Bu tamamilə yanlış məlumatdır, yalandır. Sərdarabad döyüşü rus-türk cəbhəsində gedən döyüşlərdən biridir, bu döyüşdə də Osmanlı təbəəsi olan ermənilər yaşadıqları dövlətə xəyanət edib rusların tərəfindən döyüşüblər”.
M.Zülfüqarlının sözlərinə görə, Birinci Dünya müharibəsi bitdikdən sonra Cənubi Qafqazda yaranmış yeni respublikalar 1918-ci ilin yanvarından başlayaraq tanınmışdır. “Sərdarabad döyüşü zamanı və 1914-1918-ci illərdə rus-türk cəbhəsində gedən döyüşlərdə ermənilər yalnız ruslar tərəfindən iştirak ediblər. Sərdarabad döyüşündən danışarıqsa burda ermənilərin rusların tərəfinə keçib Osmanlıya etdikləri xəyanəti qeyd etmək olar. Ermənilərin, cırtdan dövlət kimi Ermənistanın guya Osmanlıya qarşı müharibə aparması hamısı nağıllardır. Ermənilər rus-Osmanlı müharibəsində özlərini tərəf kimi göstərməklə saxtakarlıq edirlər”.
M.Züıfüqarlı qeyd etdi ki, Paşinyanın erməniləri dəfələrlə nağıllardan, əfsanələrdən uzaqlaşıb reallıqla barışmalı, hesablaşmalı olduqlarını qeyd ediblər. M.Zülfüqarlının sözlərinə görə, amma çox təəssüf ki, ermənilər yenə də reallıqdan uzaq iddialarla, nağıl və əfsanələrlə özlərini aldadırlar.
İradə SARIYEVA
