Rusiya deputatı azərbaycanlılara qarşı açıq irqçiliyə keçdi...
Elşad Həsənov: “Bütün bunlar rus şovinizminin bariz nümunəsidir”
Azərbaycan və azərbaycanlılar əleyhinə açıqlama verənlərə Rusiya Dövlət Dumasının daha bir deputatı qoşulub. Mixail Matveyev adlı deputat əslən Azərbaycandan olan Cəlil Süleyman oğlu Rəfiyevin Rusiyanın Vorkuta şəhər sovetinə namizədliyinin irəli sürülməsindən narazı qaldığını bu sözlərlə ifadə edib: “Azərbaycanın hansısa aulunda doğulan, yarımçıq orta təhsili və iki kiçik tərəvəz dükanı olan birinin deputat olması yolverilməzdir”.
Birincisi, məgər Azərbaycan Mərkəzi Asiya ölkəsidir ki, orada aul olsun? Ümumiyyətlə, ölkəmizdə belə bir anlayış yoxdur. İkincisi, Duma səviyyəsində milli və irqi ayrıseçkilik təbliğatı aparılır, amma orada buna etiraz edilmir. Bunun ölkə qanunlarına zidd olduğu deyilmir. Azərbaycanlı Rusiya vətəndaşıdırsa, o yerli şəhər sovetinə namizədliyini niyə irəli sürə bilməz ki?
“Gör deputat Mixail Matveyev nə qədər savadsız adamdır ki, Azərbaycanda aul olmadığından xəbərsizdir”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, son zamanlar Rusiyada Azərbaycana qarşı irqçi xarakterli hücumlar müşahidə edilir: “Xüsusən 44 günlük Vətən müharibəsindən sonra bəzi dairələr, Duma üzvləri ölkəmizi qaralamağa başladılar. Azərbaycana qarşı sanki bir informasiya müharibəsi başladı. Xüsusən də Azərbaycana qarşı qərəzi ilə seçilən deputat Konstantin Zatulin Rusiyanın mərkəzi telekanallarında ölkəmiz əleyhinə kampaniya aparırdı, amma ona dur deyən olmurdu. Məsələ ondadır ki, Rusiyada şovinist dairələr Azərbaycanın lider dövlət olmasını, müstəqil siyasətini həzm etmir. Onlar görürlər ki, Bakı öz milli maraqlarından çıxış edərək siyasət yeridir, Avropanın enerji təchizatına töhvə verir. O da məlumdur ki, ötən ilin sonlarında Azərbaycana məxsus mülki təyyarə Rusiya səmasında vurulub. Rusiya tərəfinin buna görə üzr istəməməsi, günahkarları cəzalandırmaması iki ölkə münasibətlərində müəyyən soyuqluq yaradıb. Ən başlıcası isə təyyarənin vurulması ilə əlaqədar Azərbaycanın prinsipial mövqe sərgiləməsi, günahkarların cəzalandırılmasını tələb etməsi Rusiyada müəyyən dairələri qıcıqlandırır. Yəni həmin dairələr bunu həzm edə bilmirlər. Halbuki, burada qəbahət bir şey yoxdur. Rusiya Azərbaycana təzyiq etmək üçün müxtəlif vasitələrə əl atır. Gah Azərbaycandan olan miqrantları sıxışdırırlar, gah idxal edilən pomidorda nəsə tapırlar. Ya da hansısa Valuyev, Mixail Matveyev kimi xəstə təxəyyüllü deputatlar vasitəsi ilə irqi ayrı-seçkiliyi qızışdırırlar. Bütün bunlar rus şovinizminin bariz nümunəsidir. Prezident İlham Əliyev çox doğru olaraq Moskvada keçirilən qələbə paradında iştirak etmədi. Bu da necə deyərlər, rusların “çestinə” dəydi. Həmiyerlilərimizin faşistsayağı qaralanması həm də bununla bağlıdır. Sosial şəbəkələrdə ölkəmizə qarşı olmazın iftiralar səsləndirilir. Bir sözlə, Azərbaycan Prezidentinin müstəqil siyasət yeritməsi, dövlət maraqlarından çıxış etməsi onların xoşuna gəlmir. Gör deputat Mixail Matveyev nə qədər savadsız adamdır ki, Azərbaycanda aul olmadığından xəbərsizdir. Üstəlik, hansı millətin nümayəndəsi olmasından asılı olmayaraq hər bir ölkə vətəndaşı öz namizədliyini irəli sürə bilər. Bunlar gör necə faşistdilər ki, bunu həzm edə bilmirlər”.
Vidadi ORDAHALLI
