Sahil Kərimli: “Rusiya Paşinyan hakimiyyətinə qarşı çox ciddi təsirlər və təzyqilər göstərmək niyyətini ortaya qoyub”
Ermənistanın baş naziri Nikol Paşinyanın erməni kilsəsinə qarşı müharibə elan etdiyi məlumdur. 2018-ci ildən kilsə ilə Paşinyan arasında baş verən qarşıdurma bu gün də davam edir. Paşinyanla Qriqoryan kilsəsinin səngimək bilməyən müharibəsinə həm daxili, həm də xarici qüvvələr qoşulub, onlar daha çox kilsəni müdafiə etməklə məşğuldurlar.
Ermənistandakı bəzi siyasilər erməni Qriqoryan kilsəsini təhqir etdiyinə və bu qurumun işinə müdaxilə etdiyinə görə Nikol Paşinyana qarşı cinayət işinin açılmasını da istəyirlər. Hətta bununla bağlı Ermənistanın baş prokuroruna da müraciət edilib.
Rusiya Erməniləri İttifaqı da Paşinyana qarşı mübarizə edənlərin tərəfində yer alıb və bu qurum da erməni kilsəsinin müdafiəçisi kimi çıxış edib.
Belə ki, Rusiya Erməniləri İttifaqı dünya xristianlarının Rəbbin dirilməsi bayramını qeyd etdiyi günlərdə Paşinyanın dilindən erməni Qriqoryan kilsəsinin ruhanilərinə qarşı səslənən təhqiramiz ifadələri qəbuledilməz hesab etdiyini bəyan edib.
Bəyanatda bildirilir ki, əsas qanununda kilsə ilə dövlətin ayrılması prinsipini təsbit edən bir ölkənin baş naziri ilk dəfə deyil ki, konstitusiya prinsiplərinə təcavüz edir. “Ermənistan Respublikası bütün ermənilərin katolikosunun seçilməsində həlledici söz sahibi olmalıdır”.
Baş verənlər daha çox ictimaiyyəti real çağırışlardan, ekzistensial təhdidlərdən və problemlərdən yayındırmağa yönəlmiş manevrə bənzəyir, onların həlli Ermənistan hökumətinin qayğısı olmalıdır. “...Paşinyanın Erməni Apostol Kilsəsinə (əslində erməni Qriqoryan kilsəsi-İ.S) qarşı açıq və həyasızcasına işlətdiyi nalayiq ifadələr, ilk növbədə, məqsədini unudaraq erməni kimliyinə və dövlətçiliyinə qarşı biabırçı səlib yürüşünün başında dayanan ölkənin baş naziri institutunu dəyərdən salır” - deyə bəyanatda bildirilir.
Bəyanatdan da göründüyü kimi Rusiya Erməniləri İttifaqı Paşinyana qarşı səfərbər edilib və bu qurum ona yönəlik ittihamlar irəli sürür.
Məsələnin arxasında Rusiya dayana bilərmi?
“Rusiya Erməniləri İttifaqının Paşinyana qarşı elan etdiyi bu müharibənin arxasında Rusiyanın mərkəzi hakimiyyəti dayanır”
Politoloq Sahil Kərimli “Bakı-Xəbər”ə bildirdi ki, son aylar Rusiyanın Cənubi Qafqazda fəallaşmaq, xüsusilə də Ermənistan üzərindən yeni geosiyasi gedişlər etmək istəkləri daha çox sezilir. “Biz hazırda Rusiya tərəfindən Ermənistan hakimiyyətinə qarşı təzyiqlər edildiyini açıq-aydın şəkildə görürük. Məlum olduğu kimi, Paşinyan hakimiyyətə gəldiyi gündən indiyə qədər Qərb və Avropa meyilli siyasət həyata keçirib. Bir növ ABŞ-ın, xüsusilə də Avropa İttifaqının (Aİ) bir sıra ölkələrinin təzyiqi altında öz siyasətini müəyyənləşdirib”.
S.Kərimlinin sözlərinə görə, bu siyasət də həm Ermənistanın müttəfiqi olaraq, həm də Ermənistanda çox böyük təsir imkanlarının və rıçaqlarının olduğu ölkə kimi Rusiyanı ciddi şəkildə narahat edib, hiddətləndirib. “Nikol Paşinyanın Rusiyaya belə zərbə vurması, ona arxa çevirməsi, Qərbyönümlü mövqe tutması Rusiyada qıcıq doğrub. Rusiya da son dövrlərdə bu istiqamətdə çox ciddi addımlar atmağa başlayıb və Ermənistanın yenidən Rusiyanın təsiri altına qaytarmaq üçün çox ciddi cəhdlər göstərdiyini görürük. Xüsusilə də bir neçə gün bundan əvvəl Rusiya xarici işlər naziri Sergey Lavrovun da Ermənistana səfər etməsi, bir çox görüşlər keçirməsi, danışıqlar aparması və hətta müəyyən təxribatçı bəyanatlar səsləndirməsi də bunun bariz nümunəsi kimi qiymətləndirilə bilər. Nikol Paşinyanın hakimiyyətdən devrilməsi istəyi, Rusiya meyilli qüvvələrin, xüsusilə də Köçəryan, Sərkisyan və digər radikalların aktivləşdirilməsi, onların yenidən ayaqlandırılması bunu göstərir ki, Rusiya Paşinyan hakimiyyətinə qarşı çox ciddi təsirlər və təzyqilər göstərmək niyyətini ortaya qoyub. Bu təsirlər artıq açıq-aşkar görünür. Hətta Paşinyanın qarşıdakı seçkilərdə də hakimiyyətdən uzaqlaşdırılması məsələsi aktuallaşıb. Rusiyanın birbaşa boyunduruğu altında olan Ermənistandakı müəyyən siyasi dairələrin indidən fəallaşdırılması bunu göstərir ki, Rusiya Paşinyan hakimiyyətini devirmək niyyətindədir. Əgər Paşinyan Qərb meyilli siyasətini yenidən davam etdirəcəksə bu onun sonunu gətirən əsas amillərdən biri olacaqdı”.
S.Kərimli bildirdi ki, Rusiya Erməniləri Təşkilatı adlı bir qurum son günlər Paşinyana qarşı ağır ittihamlar irəli sürür: “Rusiya Erməniləri İttifaqının Paşinyana qarşı elan etdiyi bu müharibənin arxasında Rusiyanın mərkəzi hakimiyyəti dayanır. Yəni Rusiyada yaşayan ermənilər bu ağır ittihamedici bəyanatla Paşinyana təsir etməyə çalşırlar. Bu da sözsüz ki, Rusiyanın sifarişi ilə həyata keçirilir. Bu ittifaq erməni kilsəsini bəhanə edib Rusiyanın göstərişi ilə Paşinyanı hədəfə alırlar” - deyə S.Kərimli bildirdi.
İradə SARIYEVA
