Erməni kilsəsi Bakı ilə sülh danışıqlarını öz əlinə almaq iddiasındadır...
Elşən Manafov: “Bu, Azərbaycana diplomatik kanallarla təzyiq vasitələrini artırmaq istəklərindən irəli gəlir”
Bütün ermənilərin katolikosunun təklifi ilə Ümumdünya Kilsələr Şurası “Dini etiqad azadlığı: erməni mənəvi, mədəni və tarixi irsinin qorunması” mövzusunda beynəlxalq konfrans təşkil edib.
Konfransda çıxış edən bütün ermənilərin katolikosu Türkiyənin hərbi dəstəyi ilə Azərbaycanın guya “cinayət törətdiyini”, “Artsaxı” işğal etdiyini və erməni əhalisini oradan tamamilə qovduğunu bəyan edib. Bundan əlavə, o, Azərbaycanın Ermənistanın strateji əhəmiyyətli sərhəd ərazilərini “zəbt” etdiyini və sülh sazişinin bağlanması prosesində yeni tələblər irəli sürməkdə davam etdiyini vurğulayıb.
Göründüyü kimi, Katalikos ənənəvi və murdar xislətinə xas olaraq suyu bulandırmağa çalışır. Bu dəfə Katalikos sülh danışıqlarında yeni şərtlərdən dəm vurur. Məgər o, sülh danışıqlarında iştirak edir? Bu kimi məsələlərin katalikosa nə dəxli var?
“Ermənistanın millətçi və revanşist müxalifəti ilə iş birliyində olan Katolikos 2-ci Qarağin...”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov hesab edir ki, erməni Qriqoriyan kilsəsinin başçısı katolikos 2-ci Qarağinin təşəbbüsü ilə İsveçrənin paytaxtı Berndə Umumdünya Kilsələr Şurası Qarabağda (Artsaxda) erməni mədəni irsinə və “arstax” ermənilərinin dini etiqadına rəsmi Bakı tərəfindən guya zorakılıq və dini dözümsüzlüyün tətbiqi ilə əlaqədar yaranmış şəraiti müzakirəyə çıxarılması növbəti düşmənçilik və pozuculuq fəaliyyətidir: “Erməni kilsəsinin bu tədbirin təşkili ilə bağlı məsələdə beynəlxalq birliyə, o cümlədən, dünya katolik və protestant kilsəsinin rəhbərlərinə Ermənistanın Azərbaycanla apardığı danışıqlarla bağlı yanlış məlumat verməklə Avropa kilsə xadimlərinin, Avropa siyasətçiləri vasitəsilə rəsmi Bakıya təhdidlərin gücləndirilməsinə nail olmaq istəyir. Yəni bu, Azərbaycana diplomatik kanallarla təzyiq vasitələrini artırmaq istəklərindən irəli gəlir. Ermənistanın millətçi və revanşist müxalifəti ilə iş birliyində olan Katolikos 2-ci Qarağin Paşinyanın "Real Ermənistan" konsepsiyasını bölüşmür. Onu Ermənistanın milli təhlükəsizlik maraqları baxımından zərərli sayır, rəsmi İrəvanı Azərbaycanla danışıqlarda "təslimçi mövqe" sərgiləməkdə ittiham edir. Erməni kilsəsi əvvəla dünyəvi dövlət sayılan Ermənistanın siyasi sistemini və dövlət quruluşunu bu yolla təhdid edir. Digər tərəfdən bəllidir ki, erməni diasporasının və Qərbdəki qlobalist dairələrin konyuktur maraqlarından çıxış edir, geosiyasi sifarişi yerinə yetirir. Digər tərəfdən Paşinyana ünvanlanmış bəlli ittihamlar əvvəla, daxili auditoriyaya hesablanıb. Məsələ ondadır ki, bu, Paşinyanın seçkilərdə müxalifətə məğlub olmasına xidmət məqsədi güdür. Digər tərəfdən Azərbaycanla sülh danışıqlarını pozmaq, militarist və millətçı əhval ruhiyyənin erməni cəmiyyətinə təsirini gücləndirmək məqsədi daşıyır”.
Vidadi ORDAHALLI
