Rusiya prezidenti Vladimir Putin bu gün İstanbulda Ukrayna ilə keçiriləcək danışıqlarda Rusiyanı təmsil edəcək heyəti təsdiqləyib.
Kremlin açıqlamasına görə, Rusiya nümayəndə heyətinə Putinin müşaviri Vladimir Medinski başçılıq edəcək. Medinski 2022-ci ildə də İstanbul danışıqlarında Rusiya tərəfinin baş müzakirəçisi olub.
Nümayəndə heyətinə xarici işlər nazirinin müavini Mixail Qaluzin, Baş Qərargah Baş İdarəsinin rəisi İqor Kostyukov və müdafiə nazirinin müavini Aleksandr Fomin daxildir.
Rusiya mediası yazır ki, bu şəxslər Rusiyanın həm diplomatik, həm də hərbi sahədə ən yüksək səviyyəli qərar qəbul edən kadrlarını təmsil edir.
Nümayəndə heyətinin ekspertlər siyahısına isə Rusiya Baş Qərargahının İnformasiya İdarəsinin rəis müavini Aleksandr Zorin, Prezident Administrasiyasının Humanitar dövlət siyasəti şöbəsinin rəis müavini Yevgeniya Podobreyevskaya, Xarici İşlər Nazirliyinin MDB ölkələri ilə əlaqələr üzrə məsul 2-ci idarənin rəisi direktoru Aleksandr Polişçuk və Müdafiə Nazirliyi, Beynəlxalq Hərbi Əməkdaşlıq Baş İdarəsinin rəis müavini Vladimir Şevtsov daxildir.
Putinin İstanbula gedib-getməyəcəyi isə hələlik açıqlanmayıb. Kreml də bu barədə konkret açıqlama verməkdən yayınır. Ancaq bir sıra mənbələr Putinin İstanbula getməyəcəyini bildirir. Bir ABŞ rəsmisinin mediaya verdiyi açıqlamaya görə, ABŞ prezidenti Donald Tramp da danışıqlar üçün İstanbula gəlməyəcək.
Qeyd edilir ki, Medinskinin yenidən baş müzakirəçi kimi təyin olunması Kremlin 2022-ci ildə dayandırılan İstanbul prosesini həm simvolik, həm də məzmun baxımından davam etdirməkdə maraqlı olduğunu göstərir.
Danışıqların əsasını həmin dövrdə layihə kimi hazırlanmış saziş mətni təşkil edəcək. Ancaq son üç ildə baş verən proseslərə uyğun olaraq, tərəflərin yeni qaydalar və dəyişikliklər tələb edəcəyi də gözlənilir.
TAHİR
