Tramp Səudiyyəyə 142 milyard dollarlıq silah satacaq - İranı, İsraili nə gözləyir....
Zərdüşt Əlizadə: "Mən əminəm ki, İran Səudiyyə Ərəbistanının dəstəyi ilə vurulacaq"
Donald Tramp ilk rəsmi xarici səfərini Səudiyyə Ərəbistanına etdi və səfərə silah satışı üzrə sazişi imzalamaqla başladı. Trampın təyyarəsi Ər-Riyada endikdən bir neçə saat sonra məlum olub ki, Amerika prezidenti və Krallığın ev sahibi vəliəhd şahzadə Məhəmməd bin Salman milyardlarla dəyərində Amerika silahı almaq planını hazırlayıblar.
ABŞ Səudiyyə Ərəbistanı ilə 142 milyard dollarlıq silah sazişi imzalayıb. Hətta sazişin imzalanması zamanı zalda əyləşənlər ayağa qalxıb, imzalanma mərasimini alqışlayıb və ABŞ-yə xorla dua oxuyublar - "Tanrı Amerikanı qorusun!" Yaxın Şərqi, İranı, İsraili və Türkiyəni nə gözləyir?
Baki-xeber.com saytının sualını cavablandıran politoloq Zərdüşt Əlizadə bildirdi ki, ərəb cəmiyyəti siyasi yaltaqlar, sındırılmış "ziyalılar" sürüsü ilə dolu bir cəmiyyətdir: "Elə "Tanrı Amerikanı qorusun" şüarını səsləndirənlər də onlardır. Orada çoxlu ənam, mükafat istəyən yazıçılar, şairlər, elm və mədəniyyət adamları var. Amma Mirzə Cəlil, Mirzə Ələkbər Sabir və s. kimi sözün düzünü deyənlər, həyatını xalqa həsr edənlər, ülvi amallar uğrunda döyüşən adamlar də var. Onların taleyi çox acınacaqlı olur.
Ərəb kral ailələri, qohumları və nökər-naibləri neft pulları hesabına hədsiz dərəcədə varlı yaşayırlar. Xalqı isə hökumət əlində olan imkanlar hesabına tamamilə cilovlayıb, həyati ilə barışmağa məcbur edib. Bir nəfər sözünü deyən ortaya çıxanda hökumət öz resursları ilə onun üstünə gedir və həmin vətəndaşı darmadağın edir. Bu başqalarına da görk olur.
Ərəb cəmiyyətinin artıq əxlaq meyarları da kifayət qədər deqradasiyaya uğrayıb. Artıq hakim zümrədə "eyib" sözü mövcud deyil. Yalan danışmaq, şər atmaq, məzlumu əzmək, xalqın büdcəsini oğurlamaq və s. eyib deyil. Hətta ərəb ədibləri öz əsərlərində ərəb-müsəlman cəmiyyətinin bu naqisliklərini ürək ağrısı ilə qələmə alırlar. Sıravi ərəblər, yəni bu cür varlı ölkədə ərəb xalqı pis gündə yaşayır.
Ərəb cəmiyyəti Amerikanı Yaxın Şərqin ağası hesab edir. Əslində elə realliq bundan ibarətdir.
Amerikanın Yaxın Şərqdə başqa bir müttəfiqi də var - İsrail. Onlar Xolokostdan sui-istifadə edirlər, amma özlərini faşist kimi aparırlar. Məsələn, Qəzzada 50 min adam öldürdülər. Buna bəzi vicdanlı adamlar ABŞ-də və Avropada etiraz edirdilər. Amma Amerika dövləti öz konstitusiyasına tüpürərək, ifadə azadlığını boğaraq, Fələstini müdafiə edən adamları işdən qovdurur, həbs etdirir, işlədikləri universitetlərin pulunu kəsir, viza ilə yaşayırsa vizasını ləğv edib ölkədən qovur. Bütün bunlar dünyanın demokratik dövlət nümunəsi sayılan Amerikada baş verir. Amerika prezidenti deyir ki, fələstinliləri Qəzzadan köçurmək lazımdır, yəni etnik təmizləmə aparmaq lazımdır. İsrail 80 min ərəbi pul və pasport verərək Qəzzadan çıxardıb.
Fələstinin 2,2 milyon əhalisi var idi, onun 50 mini qırılıb, 80 mini qovulub. Bu günlərdə yenidən bombalamağa başlayıblar, yəni proses davam edir. 1943-cü ildə Varşavada faşistlər yəhudiləri qırırdı, buna "Varşava getosu" deyirdilər. Mən "Varşava getosu" ilə "Qəzza getosu" arasında heç bir fərq görmürəm. İsraillilər də faşistlərdən seçilmir.
Səudiyyə Ərəbistanının yüz milyardlarla dollar vəsaiti Amerika istiqrazlarındadır. Səud sülaləsinin təhlükəsizliyini əvvəl İngiltərə imperializmi təmin edirdi. İndi isə bu missiyanı ABŞ daşıyır.
İndiyə qədər ABŞ Səudiyyə Ərəbistanının dəstəyi ilə husilərə qarşı əməliyyatlar keçirirdi, artıq husilər darmadağın olub. Hazırda hədəf İrandır. Mən əminəm ki, İran Səudiyyə Ərəbistanının dəstəyi ilə vurulacaq.
Tarixi baxımdan nəzər saldıqda görünür ki, Sovet hökuməti kimi, Amerika dövləti də süquta doğru gedir. Amma buna baxmayaraq, Amerikanın hələ zülm etmək imkanları çoxdur. Onlar İranı da vuracaqlar, Fələstin xalqını da məhv edəcəklər.
Yaxın Şərq ölkələrində pozuculuq, bölücülük və separatçılığın dəstəklənməsi, xalqların pərən-pərən salınmasında məqsəd xalqın sərvətlərini mənimsəməkdir.
Buna baxmayaraq, Yaxın Şərq cəmiyyətində də liberallar tapılır ki, onların demokratiya və liberalizm pərdəsi altinda törətdikləri haqsızlıqları müdafiə edirlər.
Turkiyəyə gəlincə, o, Amerikanın bir nömrəli müttəfiqidir, Türkiyə rəhbərləri tələb edir ki, onlara hörmətlə yanaşsınlar və türklər buna müəyyən qədər nail ola bilirlər. Məsələn, Amerika türk qiyamçılarını və PKK-nı dəstəkləyirdi ki, Türkiyəni dağıtsın. Amerika Türkiyəni cəzalandırmaq üçün ona "PATRİOT", müasir "F-16" satmadı, onu "F-35" proqramından məhrum etdi. Amerika balaca bir ölkə olan Yunanıstana "F-35" satdı, amma NATO-nun ikinci ordusuna malik Türkiyəyə satmadı. "F-35"-in istehsalı Türkiyədən Almaniyaya köçrüldü. O biri tərəfdən də Tramp deyir ki, Ərdoğan kişi adamdir və s. Hazırda Turkiyə ABŞ-nin tapşırığı ilə Suriyanı nəzarətə götürub, Livanı nəzarətə götürməyə çalışır və İraqın şimalını kurasiya edir. Bütün bunlar Amerikanın mənafeyi naminə və icazəsi ilə reallaşdırılır. Amma bunun Türkiyəyə də müəyyən xeyri var, bəhrələnə bilər. Bu işlərdə əsas məsələ Amerikanın mənafelərinin təmin edilməsidir.
Səudiyyə Ərəbistanı ABŞ-dan öz pulu ilə aldığı silahla onun mənafeyinə xidmət edəcək. Bu izdivacın əsas hədəfi Fələstin və İrandır".
Akif NƏSİRLİ
