Tramp erməni lobbisindən qəti üz döndərdi - ABŞ erməniləri yanıb-yaxılır...
Bəhruz Quliyev: “Bu onu göstərir ki, Ermənistan Tramp administrasiyası üçün prioritet ölkələr sırasında yer almır”
Son 100 gün ərzində Trampın komandası ilə Ermənistan hakimiyyətinin təmasları xüsusi nəticə vermədiyindən, ikitərəfli münasibətlərdə aktiv iştirakı təmin etmək mümkün olmayıb.
Bu barədə Amerika Tədqiqatları Erməni Mərkəzi məlumat yayıb.
Mərkəz qeyd edib ki, buna görə də Ermənistan hakimiyyəti ABŞ administrasiyası ilə əməkdaşlıq qurmaq üçün alternativ yollar axtarmaq qərarına gəlib: “Dünyanın bir sıra ölkələrində olduğu kimi, Ermənistanda da prezident Trampın Ermənistana münasibətinin necə olacağı ilə bağlı narahatlıqlar var idi və bu münasibətin onun ilk prezidentlik dövründəki yanaşmasından fərqlənib-fərqlənməyəcəyi sual altında idi. Trampın prezidentliyinin birinci dövrü Ermənistan-ABŞ münasibətlərinin inkişafı və qarşılıqlı təmaslar baxımından olduqca zəif dinamika ilə xarakterizə olunurdu. Bu səbəbdən onun hazırkı dövrdəki siyasətinin əvvəlki dövrdən nə dərəcədə fərqlənəcəyini anlamaq mühüm əhəmiyyət daşıyıb”.
Göründüyü kimi, Ermənistan Trampın birinci prezidentliyi dövründə ABŞ üçün maraqlı olmayıb. Həmin siyasət Trampın ikinci prezidentliyi dövründə də özünü göstərir.
“Vaşinqtonla münasibətləri canlandırmaq üçün yeni strategiyalar formalaşdırmağa çalışırlar, lakin...”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, Ermənistan Tramp hakimiyyəti üçün önəmli əhəmiyyət kəsb etmir: “Əvvəlcədən qeyd edim ki, Amerika Tədqiqatları Erməni Mərkəzinin yaydığı son məlumata əsasən, Donald Trampın ikinci prezidentlik dövrünün ilk 100 günü ərzində Ermənistan hakimiyyəti ilə Trampın komandası arasında baş tutan təmaslar konkret nəticə verməyib. Bu isə ABŞ-Ermənistan münasibətlərində nəzərəçarpacaq aktivliyin müşahidə olunmamasına gətirib çıxarıb. Məlum olub ki, yaranmış durumu nəzərə alan Ermənistan rəhbərliyi ABŞ administrasiyası ilə əməkdaşlığı inkişaf etdirmək üçün alternativ kanallar axtarmağa başlayıb. Bildirilir ki, Trampın Ermənistana münasibəti ilə bağlı suallar hələ də açıq qalır. Onun birinci prezidentlik müddətində Ermənistan-ABŞ əlaqələrinin zəif inkişaf dinamikası fonunda bu siyasətin indiki dövrdə dəyişib-dəyişməyəcəyi məsələsi Ermənistan üçün strateji əhəmiyyət kəsb edir. Hazırkı vəziyyət onu göstərir ki, Ermənistan Tramp administrasiyası üçün prioritet ölkələr sırasında yer almır. Trampın birinci prezidentliyi dövründə müşahidə olunan passiv münasibət bu dəfə də davam edir. Ermənistanın narahatlığı, eyni zamanda, ABŞ-ın Cənubi Qafqaz siyasətindəki rolu və bu siyasətdə Ermənistanın yerinə dair aydınlıq çatışmazlığı ilə bağlıdır. Ermənistanın diplomatik dairələri alternativ tərəfdaşlıq formatları axtarışı ilə yanaşı, Vaşinqtonla münasibətləri canlandırmaq üçün yeni strategiyalar formalaşdırmağa çalışırlar. Lakin Tramp administrasiyasının mövcud siyasətində ciddi dəyişiklik baş vermədiyi təqdirdə, Ermənistan-ABŞ əlaqələrinin yaxın dövrdə inkişaf göstərəcəyi ehtimalı zəif olaraq qalır”.
Vidadi ORDAHALLI
