Məlum olduğu kimi, Bakı şəhərində yerləşən 207 nömrəli tam orta məktəbin direktoru Yaqut Müseyibli işdən çıxarılıb. Direktor yayılan səs yazısında "Son zəng"ə görə pul yığmağı tapşırır.
Rəsmi açıqlamada deyilir ki, direktor fəaliyyətində yol verdiyi nöqsanlara görə vəzifəsindən azad edilib.
İşdən çıxarılan direktor daha bir vəzifə daşıyırmış.
O, məntəqə seçki komissiyasının sədridir.
Belə ki, Yaqut Müseyibli 20 saylı Nərimanov II seçki dairəsinin 21 saylı məntəqəsinə rəhbərlik edirmiş.
Yaqut Müseyiblinin bu hərəkəti onun neçə illər seçki prosesində fəaliyyətinə hansı dərəcədə kölgə salır və seçkinin həmin məntəqədə legitimliyinə şübhə oyadır? Həmin məntəqədə son seçkilərin nəticələri ləğv oluna bilərmi?
Azər Həsrət: “Biz bilmirik ki, sabiq direktor seçkini saxtalaşdırıbmı...”
Siyasi şərhçi Azər Həsrət “Bakı-Xəbər”ə bildirdi ki, ümumiyyətlə təhsil işçilərinin seçki prosesində iştirakı məqbul deyil: “Mən bir neçə il əvvəl belə bir təşəbbüsü dilə gətirmişdim ki, ümumiyyəylə təhsil işçilərini seçki prosesindən kənarlaşdırmaq lazımdır. Bilirsiz niyə? Ona görə ki, haqq-nahaq hər seçkidə bir də görürsüz ki, xüsusən müxalif kəsimdən olanlar bir müəllim, pedaqoq tapırlar və onun ətrafında kampaniya aparıb bütövlükdə təhsil sektorunu gözdən salırlar. “Adını “saxtalaşdırma etdi”, “seçkiyə müdaxilə etdi” qoyurlar və sair. Yəni bu cü məqamlar nəticə etibarı ilə bizim təhsilin gözdən salınmasına səbəb olur.
Azərbaycan artıq sabit bir dövlətdir, biz səksəkəli dövrləri arxada qoymuşuq, torpaqlarımızı işğaldan azad edib ərazi bütövlüyümüzü təmin etmişik. Bütün bunların fonunda seçkinin idarəolunması sahəsində də islahatlara gedilməlidir. Bir sıra ölkələrdə olduğu kimi Azərbaycan da bu prosesi daxili işlər orqanlarına həvalə edə bilər. Yəni məktəblər, müəllimlər artıq seçki prosesindən uzaqlaşdırılmalıdır.
Görürsüz, seçkiyə dəxli olmayan bir məsələ baş verib və bəlli olur ki, bu direktor həm də seçki məntəqəsi sədridir, onun ətrafında da xüsusən antiazərbaycan qüvvələr təbliğat qururlar və təbliğat qurmaq üçün də əllərində bəhanə var ki, təhsil işçiləri seçkini saxtalaşdırır, seçkiyə müdaxilə edir.
Biz bilmirik ki, sabiq direktor seçkini saxtalaşdırıbmı, müdxailə edibmi? Şəxsən mənim məlumatım yoxdur. Ancaq ümumiləşdirərək təhsil işçilərininin “seçki saxtakarlığı” etdiyi haqda rəy yaradılır. Necə deyərlər, qurunun oduna yaş da yanır”.
A.Həsrətin fikrincə, bu səbəbdən də Azərbaycanda seçkinin təşkili ilə bağlı yeni baxışa ehtiyac var, bunun üçün yeni alternativlər tapılmalıdır ki, təhsil sektoru bütövlükdə seçkidən uzaqlaşdırılsın, heç bir zərurət olmadan təhsil və təhsil işçiləri hədəfə alınmasın. “Məncə, bu, çıxış yolu kimi təklif edilə bilər. Amma bu direktorla bağlı məsələyə gəlincə, bizim əlimizdə olanlar sosial mediada, mətbuatda paylaşdılanlardır, müvafiq təhsil qurumunun açıqlamasıdır. Əlbəttə, araşdırmalar aparılacaqsa və bütövlükdə bu faktlar təsdiqini tapacaqsa uyğun qərarın qəbul edilməsi də yerinə düşəcək. Şəxsən mənim qarşıma alternativlər də çıxıb, valdeynlərdən də, müəllimlərdən də ona hiylə qurulduğunu, şər atıldığını iddia edənlər var. Bir tərəfdə də insanlar var ki, açıq şəkildə iddia edir ki, onlardan pul, rüşvət tələb olunub, ortada səs yazısı var. Bu məsələlər müvafiq qurumlar tərəfindən ətraflı şəkildə araşdırılmalıdır. Təhsil, məktəb müqəddəs yerdir, oraya haram qatmaq olmaz. Orda direktordan tutmuş üzü aşağıya qədər elə adamlar işləməlidir ki, o adamlar bu cür məsələlərdə adlarının hallandırılmasına yol verməsinlər. Yəni bu cür qara-qura işlərə bulaşmasınlar. Üstəlik də seçki komissiyasında sədr olurlar, seçki prosesində iştirak edirlər. Orda da görürsüz ki, kiçik bir texniki problem olanda əleydarlar təhsil sektorunu hədəfə almağa başlayır”.
Həmin dairədən seçilmiş deputatın bu direktorun səs yazısına münasibəti necədir?
Samir Vəliyev: “Bu haqda məlumatım yoxdur”
20 saylı Nərimanov II seçki dairəsindən deputat seçilən Samir Vəliyev “Bakı-Xəbər”ə bildirdi ki, bu məktəb direktorunun səs yazısının yayılması barədə məlumatsızdır. “Bu haqda məlumatım yoxdur. Onun işdən çıxarılmasına yəqin ki, Elm və Təhsil Nazirliyi qərar verib. Amma mənim bu xanım haqqında, onun nəyin əsasında işdən çıxarılması barədə ümumiyyətlə məlumatım yoxdur. O seçkiyə görə işdən çıxarılmayıb ki, deyirsiz başqa məsələyə görə çıxarılıb”.
İradə SARIYEVA
