Ramil Məmmədli: “Ermənistanın hərbi sahədə Parislə qurduğu yaxınlığı Londonla da quracağı real görünmür”
Ermənistan və Böyük Britaniya iki ölkə arasında əməkdaşlığın inkişafı üçün hərbi attaşelər təyin edə bilər. Erməni mediasının yaydığı məlumata görə, bu məsələ Berlində Ermənistanın müdafiə naziri Suren Papikyan ilə Böyük Britaniyanın silahlı qüvvələr naziri Lyuk Pollard arasında keçirilən görüşdə müzakirə olunub.
Görüş zamanı Ermənistan və Böyük Britaniya arasında müdafiə sahəsində əməkdaşlığın əsas istiqamətləri və onların inkişaf perspektivləri, həmçinin regional və beynəlxalq təhlükəsizlik məsələləri müzakirə edilib.
Onu da qeyd edək ki, S.Papikyan Berlində işgüzar səfərdədir. O, səfər çərçivəsində BMT-nin sülhməramlı məsələlərə dair nazirlər görüşünün rəsmi açılış mərasimində iştirak edib.
O da məlumdur ki, Fransadan fərqli olaraq, İngiltərə ilə Ermənistan arasında xüsusi yaxınlıq yoxdur. Ən azından ona görə ki, Böyük Britaniyada güclü erməni lobbisi yoxdur. Üstəlik, orada yaşayan ermənilərin sayı da digər Avropa ölkələri ilə müqayisədə çox azdır. Maraqlıdır, Ermənistanla Böyük Britaniya arasında hərbi müstəvidə nə baş verir?
“Bu ilin martında Azərbaycanda ilk dəfə Böyük Britaniya hərbi attaşesinin təyin edilməsi erməniləri narahat edir”
Sözügedən məsələni “Bakı-Xəbər”ə şərh hərbi ekspert Ramil Məmmədli hesab edir ki, hərbi attaşelər məsələsinin müzakirə edilməsi London və İrəvanın hərbi müstəvidə yaxınlaşacağı anlamına gəlmir: “Əvvəla, Ermənistan Azərbaycanın bir sıra Avropa ölkələri ilə yaxın əlaqələr qurmasından narahatdır. Görəndə ki, Azərbaycan bəzi Avropa ölkələri ilə yaxın siyasi-iqtisadi tərəfdaşlıq qurur, həmən rəsmi İrəvan həmin ölkələrlə təmasları intensivləşdirir. Məsələn, Ermənistan İtaliyanın Azərbaycanla hərbi müstəvidə əməkdaşlığından çox narahatdır. Böyük Britaniyaya gəldikdə isə, bu ölkənin Azərbaycanla olan əməkdaşlığı müqayisəolunmaz dərəcədə böyükdür. Xəzər dənizində bir sıra iri layihələrin operatoru olan BP şirkətinin və onun tərəfdaşlarının Azərbaycandakı layihələrə investisiyaları indiyə qədər 85 milyard dollar təşkil edib. Bunun böyük hissəsi İngiltərənin BP şirkətinin payına düşür. Bu baxımdan Ermənistanın hərbi sahədə Parislə qurduğu yaxınlığı Londonla da quracağı real görünmür. Məsələnin kökündə əsasən digər faktor var. İş ondadır ki, bu ilin martında Azərbaycanda ilk dəfə Böyük Britaniya hərbi attaşesi təyin edilib. Bax, erməniləri narahat edən budur. Paşinyan hakimiyyəti istəyir ki, İngiltərə ilə qarşılıqlı hərbi attaşelər təyin edilsin. Daha çox Ermənistanda Böyük Britaniyanın hərbi attaşesi fəaliyyət göstərsin. Son illər onsuz da Ermənistan bəzi Avropa ölkələrinin Zəngəzurda konsulluqlarının açılmasına xüsusi önəm verir. Qərblə yaxınlaşma fonunda Ermənistanda hərbi attaşelərin sayının artırılması da gündəmdədir. Böyük Britaniya ilə bu yöndə müzakirələrin aparılması da bununla əlaqədardır. Ancaq bunun ciddi nəticələrinin olacağını düşünmürəm. Ən azından ona görə ki, İngiltərənin Cənubi Qafqazda yaxın tərəfdaşı Ermənistan yox, Azərbaycandır”.
Vidadi ORDAHALLI
