Qonşu Gürcüstanın daxili işlərinə Qərb tərəfindən müdaxilə getdikcə daha geniş vüsət alır. Bunu Avropa İttifaqının üzvü olan 13 ölkənin Avropa işləri nazirlərinin birgə bətanatı da açıq şəkildə nümayiş etdirir.
Qeyd edək ki, 13 ölkənin Avropa işləri nazirlərinin Gürcüstan məsələsi ilə bağlı birgə bəyanatı dərc olunub. Bəyanatı imzalayanlar Gürcüstanı açıq şəkildə şantaj edirlər. Bu xüsusda bəyaatda deyilir: "Gürcü xalqının əksəriyyətinin Avropayönlü yolun ictimai dəstəyinə əsaslanaraq, ölkələrimiz: Almaniya, Fransa, Polşa, həmçinin Belçika, Danimarka, Estoniya, Latviya, Litva, Lüksemburq, Portuqaliya, Finlandiya, İsveç və Çexiya əvvəldən bu yolda Gürcüstanın güclü tərəfdarı olub və yenə də onların narahatlığını bölüşür və Gürcüstanı qarşıdan gələn seçkilərin azad və ədalətli keçməsini təmin etməyə çağırırıq. Gürcü xalqı son onilliklərdə çox şeyə nail olub - Gürcüstanın 2022-ci ilin martında Avropa İttifaqına üzvlük üçün müraciət etməsi bu yolun tarixi mərhələsi olub". Nazirlər qeyd ediblər ki, Gürcüstanın Avropa İttifaqına inteqrasiyası prosesi de-fakto dayandırılıb: "Son aylar ərzində Gürcüstan Avropa İttifaqının ümumi normativ bazasına uyğun gəlməyən bir neçə qanun, xüsusən də "Xarici təsirin şəffaflığı haqqında" qanun qəbul edib. Bu qərarlara görə ölkənizin Avropa İttifaqına inteqrasiyası prosesi dayandırılıb. Hazırkı siyasi kurs davam etdikcə o dayandırılacaq. 2024-cü il iyunun 27-də Avropa İttifaqına üzv olan 27 ölkənin dövlət və hökumət başçılarından ibarət Avropa Şurası qərar verdi: Gürcüstanda baş verənlər Gürcüstanın Avropa İttifaqına üzvlüyünün faktiki olaraq dayandırılmasına səbəb oldu. Ona görə də bir şey aydın olmalıdır: Gürcüstan hökuməti kursu dəyişməsə, Gürcüstan Avropa İttifaqına üzv ola bilməyəcək. Bu aydın qərarı cüzi də olsa rahat və ya fərqli şəkildə şərh etmək ya aldatma, ya da sadəcə yalandır". Onlar həmçinin qeyd ediblər ki, hakim "Gürcü Arzusu" partiyasından olan gürcü siyasətçilərinin "görünməmiş" anti-Qərb ritorikası Gürcüstanın Qərb tərəfdaşlarına qarşı təbliğat, dezinformasiya, açıq yalan və böhtandır. Bütün bunlar təbii olaraq Gürcüstan hakimiyyəti tərəfindən sərt qarşılanıb. Gürcüstan parlamentinin sədri Şalva Papuaşvili Avropa İttifaqının 13 ölkəsinin Avropa məsələləri üzrə nazirlərinin birgə bəyanatını qarşıdan gələn parlament seçkilərinə müdaxilə adlandırıb və İttifaqın digər üzvlərinə bu mətni dəstəkləmədiklərinə görə təşəkkür edib: "Özlərinə məsuliyyətlə yanaşan və bu bəyanata qoşulmayan Avropa İttifaqının 14 ölkəsinə təşəkkür edirəm. Seçicilərin iradəsinin formalaşmasına təsir edərək Gürcüstanda seçkilərə müdaxilə təşkil edən mətnin olmaması vacibdir". Papuaşvili müqayisə üçün qeyd edib ki, oktyabrın 20-də Moldovada keçirilmiş prezident seçkiləri, Aİ-nin fikrincə, Rusiyanın görünməmiş təzyiq və hədə-qorxuları şəraitində baş tutub: "Moldovada bəyənmədiyiniz şeyi Gürcüstanda edə bilməzsiniz". Parlament rəhbəri Avropa təmsilçilərinin Gürcüstan hakimiyyətini cəfəngiyatda ittiham etməsinə də cavab verib: "Cəfəngiyata" gəlincə, cəfəngiyat işgəncə sisteminin yaradıcısı Mixeil Saakaşvilinin azadlığa buraxılması və Rusiyaya qarşı ikitərəfli sanksiyaların tətbiqi tələbidir". Papuaşvili deyib ki, söz atmaq asandır, amma yenə də onların nəticələrinə görə məsuliyyət daşımaq lazımdır: "Ölkədə və onun hüdudlarından kənarda hər kəs öz çağırışlarının, qətnamələrinin, bəyanatlarının nəyə gətirib çıxara biləcəyini başa düşməli və məsuliyyət daşımalıdır".
O vurğulayıb ki, Gürcüstan hazırda çox mühüm inkişaf mərhələsini yaşayır: "Gürcüstan siyasəti yavaş-yavaş ağrılı, lakin yenə də öz sözünə, hərəkətinə, xalqına və ölkəsinə cavabdehlik kimi zəruri prinsipi bərqərar edir". Gürcüstanın baş naziri İrakli Kobaxidze də Aİ-yə üzv 13 ölkənin Avropa işləri nazirlərinin Gürcüstanla bağlı birgə bəyanatı ilə bağlı jurnalistlərin sualını cavablandırıb. Baş nazirin sözlərinə görə, onların bəyanatının dəyəri yoxdur: "Dörd ölkənin xarici işlər nazirləri Tiflisdə inqilabi prosesə qoşulmaq üçün səhnəyə çıxdılar, lakin bu, uğursuz oldu. Bunların fonunda təbii ki, heç bir bəyanatın heç bir dəyəri yoxdur". Hakim "Gürcü Arzusu-Demokratik Gürcüstan" partiyasının təsisçisi və fəxri sədri Bidzina İvanişvili "Imedi" televiziya kanalına müsahibəsində seçkilərə müdaxilə cəhdlərini yolverilməz hal adlandırıb: "Biz seçkilərdə qalib gələcəyik və ölkədə sabitlik bərqərar olunacaq. Gürcüstan xalqı oktyabrın 27-dən etibarən öz evlərində sakit yatacaqlar. Mən hadisələri qabaqlayıb sizə deyirəm ki, seçki günü fövqəladə heç nə baş verməyəcək, seçkilərdən sonrakı ikinci gün çox sakit keçəcək. Lakin burada vurğulamaq istəyirəm ki, hər növbəti günü şərti olaraq "ikinci gün" adlandırmaq olar. Ona görə də biz ehtiyatlı olmalıyıq. Çünki qarşıdakı vaxtlarda çox gərgin geosiyasi vəziyyət yaranacaq. Buna görə çox diqqətli olmalıyıq". Gürcüstan parlamentinin deputatı Savalan Mirzəyevin sözlərinə görə, Avropa İttifaqı Gürcüstanla bağlı artıq bir neçə qərar və qətnamə qəbul edib. Bu, açıq-aşkar daxili siyasətimizə müdaxilədir və bir növ söz azadlığını məhdudlaşdırmaqdır. Onun sözlərinə görə, Qərb ölkələri çalışırlar ki, hakim partiyanın rəhbərlərinə sanksiyalar tətbiq etsinlər: "Fikrimcə, bu bir növ onların müxalifətə humanitar dəstəyidir. Onlar çalışırlar müxalifət maksimum dərəcədə qalib gəlsin. Müxalifətin isə yerli xalqdan dəstəyi yoxdur. Ona görə də ölkədən kənardakı qüvvələrə müraciət edirlər ki, hansısa formada xaos yaradılsın, asayiş pozulsun. Amma onlar buna nail ola bilməyəcəklər". O əlavə edib ki, bir neçə aydır Qərb Gürcüstanda hakimiyyət dəyişikliyinə şərait yaratmağa çalışır. Bu da ikinci cəbhənin açılmasına xidmət edir: "Bir neçə dəfə ölkə rəhbərliyi bəyan edib ki, bizim ikinci cəbhə açmağa ehtiyacımız yoxdur. Əsas məqsədimiz ölkədə sülh və sabitliyin bərqərar olması, ölkənin inkişafı üçün ən gözəl şərait yaratmaqdır".
Samirə SƏFƏROVA
