Hüseyn İbrahimov: "Belə mövqe digər ölkənin daxili işinə qarışmaq anlamına gəlir"
İndi də İsveçrə parlamenti ermənilərə vəkillik etmək eşqinə düşüb. İsveçrə Federal Assambleyası ölkə hökumətini bir il ərzində "Dağlıq Qarabağ" münaqişəsi ilə bağlı beynəlxalq sülh konfransı təşkil etməyə çağıran qətnamə qəbul edib.
Qətnamədə parlamentarilər konfransın məqsədini beynəlxalq aktorların iştirakı ilə və ya nəzarəti altında erməni əhalisinin öz tarixi vətənlərinə təhlükəsiz şəkildə qayıtması ilə bağlı Azərbaycan və "Dağlıq Qarabağ" erməniləri arasında dialoqun qurulması kimi qeyd ediblər. Federal Məclisin deputatları, həmçinin, Avropa Parlamentinin 2024-cü il 12 mart tarixli qətnaməsinə istinad edərək, Azərbaycanı "Dağlıq Qarabağ" erməniləri ilə dialoqa başlamağa çağırıblar. Ən nəhayət, Qətnamə müəllifləri münaqişənin sülh yolu ilə həlli və "Dağlıq Qarabağ"ın erməni əhalisinin hüquqlarının müdafiəsinə yönəlmiş danışıqların yeni formatının yaradılmasının zəruriliyini vurğulayıblar.
"İsveçrə, bəzi Avropa ölkələri kimi, erməni separatizmi məsələsində beynəlxalq hüquqdan irəli gələn tələbləri pozur"
Sözügedən məsələni "Bakı-Xəbər"ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, İsveçrə kimi bir ölkənin parlamentinin bu cür sərsəm tələblə çıxış etməsi heç bir əndazəyə sığmır: "Məsələ ondadır ki, İsveçrə 1848-ci ildən özünü bitərəf ölkə elan edib. Belə bir ölkənin parlamentinin Qarabağla bağlı sərgilədiyi mövqe digər ölkənin daxili işinə qarışmaq anlamına gəlir. Dünyada 200 müstəqil dövlət var. Hansısa ölkə öz ərazisində separatizmə son qoyursa, belə çıxır həmin ölkə qanunu pozur? Belədirsə, o zaman Avropa İttifaqı üzvləri, o cümlədən qurumda təmsil olunmayan bitərəf İsveçrə İspaniyada Bask və Kataloniya separatçılarına münasibətdə niyə susurlar? İsveçrə bəzi digər Avropa ölkələri kimi erməni separatizmi məsələsində beynəlxalq hüquqdan irəli gələn tələbləri pozur. İsveçrə Federal Assambleyasının çağırışı Azərbaycanın beynəlxalq hüquqla tanınan ərazi bütövlüyünə hörmətsizlikdir. Ən azından, Azərbaycanda "Dağlıq Qarabağ" söz birləşməsi yoxdur və bu, tarixə qovuşub. Azərbaycanda Qarabağ və Şərqi Zəngəzur var. Ona görə də yaxşı olardı ki, adları düzgün desinlər. Digər başlıca məqam isə ondan ibarətdir ki, Qarabağ ermənilərini kimsə oradan zorla çıxarmayıb. Onlar öz istəkləri ilə Qarabağı tərk ediblər. Həmin vaxt Qarabağda Rusiya sülhməramlıları olub və onlar üçüncü tərəf olaraq buna şahiddilər. O baxımdan, İsveçrə parlamenti məsələni doğru-düzgün araşdırmadan hökm verə bilməz və buna haqqı da yoxdur. Bu, həm də onu göstərir ki, İsveçrə parlamenti erməni lobbisinin maraqlarına oynayır".
Vidadi ORDAHALLI
