Məhəmməd Əsədullazadə: "Belə yanaşma yarımçıq xarakterli olduğu üçün maraqlarımıza uyğun deyil"
Məlum olduğu kimi, Amerika Birləşmiş Ştatlarının Prezidenti Cozef Bayden Azərbaycan Prezidenti İlham Əliyevə məktub ünvanlayıb.
Məktubda ABŞ Prezidenti bir sıra məqamlara toxunub. Prezident Bayden qeyd edib ki, ölkəsi sülh prosesinə dəstək verməyə hazırdır: "Sizi əmin etmək istəyirəm ki, ABŞ əsrlər boyu davam edən münaqişəyə nəhayət son qoyacaq Azərbaycan ilə Ermənistan arasında dayanıqlı və ləyaqətli sülhün əldə edilməsinə dəstək verməyə hazırdır. Sülh sazişi Azərbaycanın suverenliyinin və ərazi bütövlüyünün təmin edilməsi ilə yanaşı, bütün regionu transformasiya edəcək, Avropa və Mərkəzi Asiya arasında daha çox ticarətə, sərmayə qoyuluşuna və bağlılığa xidmət göstərək. Dünyanın diqqətinin COP29 ilə bağlı Bakıya yönəldiyi bir vaxtda qlobal ictimaiyyətə sülhə sadiqliyinizi nümayiş etdirmək üçün misilsiz imkana maliksiniz. Bildiyiniz kimi, sülh sazişinin razılaşdırılmamış bəndlərinə dair işin yekunlaşdırılması hər iki tərəfdən kreativlik və güzəşt tələb edəcək. Lakin əminəm ki, bu imkandan yararlanmağa davam edəcəksiniz. Mən Sizi cari ildə sazişi yekunlaşdırmağa dəvət edirəm".
Bayden deyir ki, sülh sazişinin razılaşdırılmamış bəndlərinə dair işin yekunlaşdırılması hər iki tərəfdən kreativlik və güzəşt tələb edəcək. Razılaşdırılmamış maddələr bəllidir. Bu, Ermənistan Konstitusiyasında və digər hüquqi aktlarda dəyişikliklərdir. Bir də ATƏT-in Minsk Qrupunun buraxılmasıdır. Belə olan halda hansı kompromisdən söhbət gedə bilər? Azərbaycan nəyi kompromisə getməlidir və ümumiyyətlə gedə bilərmi?
"ABŞ sülh müqaviləsinin razılaşdırılmış bəndlər üzrə imzalanmasında maraqlıdır"
Sözügedən məsələni "Bakı-Xəbər"ə şərh edən politoloq Məhəmməd Əsədullazadə bununla bağlı bir sıra məqamlara toxundu: "ABŞ-ın Azərbaycandan Ermənistanla COP29-a kimi "Aralıq sülh" müqaviləsi bağlanmasını istəməsi öz maraqları çərçivəsində yanaşmadı. ABŞ Prezidentinin xüsusi köməkçisi və Milli Təhlükəsizlik Şurasının Avropa üzrə baş direktoru Maykl Karpenteri Prezident İlham Əliyev qəbul edib. O, Azərbaycanla son günlər davam edən siyasi böhrana son qoymaq və Ermənistanla sülh müqaviləsinin COP29-a kimi imzalanması ilə bağlı Vaşinqtonun mesajını çatdırıb. ABŞ Azərbaycanla Ermənistan arasında sülh müqaviləsinin razılaşdırılmış bəndlər üzrə imzalanmasında maraqlıdır. Belə yanaşma yarımçıq xarakterli olduğu üçün maraqlarımıza uyğun deyil. Bayden istəyir ki, Azərbaycan öz tələblərindən geri çəkilsin. Prezident İlham Əliyev ABŞ rəsmisi ilə görüşündə Ermənistan Konstitusiyanın sülh müqaviləsinə əsas əngəl olduğunu vurğuladı. Çünki Ermənistan Konstitusiyası və qanunvericiliyində Azərbaycana qarşı ərazi iddiaları yer alır. Prezident M. Karpenterə COP29 kimi "Aralıq sülh" müqaviləsi olmayacağı mesajını verərək, nöqtəni qoymuş oldu. Demək olar ki, ABŞ rəsmisi Bakıdan əliboş qayıdacaq. Ümumiyyətlə, Vaşinqtonla Bakı arasında siyasi böhran məhz Ermənistanla Azərbaycan arasında sülh müqaviləsi üzrə aparılan danışıqlarda Bakının prinsipial mövqeyindən irəli gəlir. Prezident Baydenin Prezident Əliyevə məktubu sülh müqaviləsinin tezliklə bağlanmasını özündə ehtiva edir. Görünür, Ag Evdə düşünürlər ki, tezliklə sülh bağlansa Birləşmiş Ştatların Cənubi Qafqazda siyasəti güclənəcək".
Vidadi ORDAHALLI
