Bu günlərdə Qərbi Azərbaycan İcması Milli Məclisin sədri Sahibə Qafarovaya müraciət ünvanlayıb. Müraciətdə deyilir ki, Qərbi Azərbaycan İcması fəal beynəlxalq fəaliyyət həyata keçirərək beynəlxalq təşkilatlar çərçivəsindəki tədbirlərdə tərəf kimi iştirak edir və Qərbi Azərbaycandakı doğma yurd-yuvalarından didərgin düşmüş azərbaycanlıların Qərbi Azərbaycana qayıdış məsələsini davamlı olaraq qaldırır.
Ölkəmizə qarşı qərəzli mövqedə olan dövlətlər və beynəlxalq təşkilatlar belə, bu məsələni insan hüquqları müstəvisində tutarlı arqument kimi qəbul etməli olurlar.
Bu barədə Milli Məclisin Mətbuat və ictimaiyyətlə əlaqələr şöbəsindən məlumat verilib.
Bildirilib ki, məktubda Azərbaycan Respublikasının Milli Məclisində Qərbi Azərbaycana qayıdış məsələləri üzrə qurumun yaradılması təklifi irəli sürülür. Qeyd olunub ki, parlamentdə belə bir qurumun yaradılması, ilk növbədə, sözügedən məsələ ilə bağlı ölkədəki konsensusu nümayiş etdirəcək, həmçinin Qərbi Azərbaycan məsələsinin qanunvericilik aspektləri ilə yanaşı, parlament diplomatiyası xətti ilə də effektiv şəkildə davam etdirilməsinə imkan verəcək.
Bütün bunları nəzərə alaraq, Azərbaycan Respublikası Milli Məclisinin sədri Sahibə Qafarovanın sərəncamına əsasən, Qərbi Azərbaycandan qovulmuş azərbaycanlıların doğma torpaqlarına qayıtmaq hüququnun gerçəkləşməsinə dəstək vermək məqsədilə parlamentdə deputat Əziz Ələkbərovun rəhbərliyi ilə Qərbi Azərbaycana Qayıdış üzrə Təşəbbüs Qrupu yaradılıb.
Sərəncamda Qərbi Azərbaycana Qayıdış üzrə Təşəbbüs Qrupunun vəzifə və səlahiyyətləri öz əksini tapıb.
Milli Məclisdə Qərbi Azərbaycana Qayıdış üzrə Təşəbbüs qrupunun yaradılması yaxşı bir hadisədir.
Bütün hallarda, Qərbi Azərbaycan məsələsinin strukturlaşdırılması, xüsusilə də o qərarda deyildiyi kimi, Qərbi Azərbaycan mövzusunun həm qanunvericilik müstəvisində, həm də parlament diplomatiyası müstəvisində irəlilədilməsinə yeni perspektivlər aça bilər.
Amma daha yaxşı olmazdımı ki, Milli Məclisdəki o Təşəbbüs Qrupunun rəhbəri Qərbi Azərbaycan İcmasının özünün rəhbəri olmayaydı?
Yaxşı olmazdımı Milli Məclisdəki Təşəbbüs Qrupunun rəhbəri Əziz Ələkbərli yox, başqası olaydı? Bu, əlbəttə, onun qabiliyyətinə şübhə əlaməti deyil, o yaxşı deputatdır, yaxşı alimdir, amma həm də Qərbi Azərbaycan İcmasının rəhbəridir. Bu baxımdan Qərbi Azərbaycana Qayıdış üzrə Təşəbbüs Qrupunun rəhbərinin başqa adam olması daha yaxsi olardı. Başqa bir Qərbi Azərbaycan kökənli deputat Təşəbbüs Qrupunun rəhbəri olsaydı o daha məqbul sayılardı, bu məsələ ilə məşğul olan iki strukturumuz olardı.
Qasım Hacıyev: "Məncə, bu qrupa rəhbərlik etməyin Əziz Ələkbərliyə həvalə edilməsi də çox düzgündür"
AMEA-nın Qafqazşünaslıq İnstitutunun Qafqaz Tarixi şöbəsinin müdiri, professor Qasım Hacıyev "Bakı-Xəbər"ə bildirdi ki, Milli Məclisdə belə təşəbbüs qrupunun yaradılması çox təqdirəlayiq bir haldır. "Ona görə ki, artıq qayıdışla bağlı iş başlanıb. Bu həm dövlətimizin, həm xalqımızın iradəsini, maraqlarını əks etdirən bir məsələdir. Çünki vaxtilə baş vermiş haqsızlıqları, ədalətsizlikləri aradan qaldırmaq, Azərbaycan türklərini Qərbi Azərbaycan ərazisinə qaytarmaq vacibdir. Qərbi azərbaycanlılara zülm edilib. Biri var didərgin, qaçqın, məcburi köçkün, biri də var zorla deportasiya edilənlər. Bunlar deportasiya edilmiş, öz torpaqlarından zorla çıxarılmış adamlardır. Onların həm tarixi, həm də hüquqi əsası var ki, o torpaqlara qayıtsınlar. Əgər müasir dövrdə beynəlxalq qanunlar, təşkilatlar onlarla bağlı ədalətli mövqe tutsalar, soydaşlarımız öz tarixi yurdlarına, ata-baba ocaqlarına qayıtmalıdırlar.
O ki qaldı Milli Məclisdə Qərbi Azərbaycana Qayıdış üzrə Təşəbbüs Qrupunun yaradılmasına, bu çox müsbət haldır. Məncə, bu qrupa rəhbərlik etməyin Əziz Ələkbərliyə həvalə edilməsi də çox düzgündür. Ona görə ki, Əziz Ələkbərli başqalarından fərqli olaraq illərdir ki, bu təbliğatla məşğul olur, bu da bir günə, beş günə ortaya gələn məsələ deyil. Dövlətimiz, dövlət başçımız bu məsələyə ona görə diqqət ayırdı ki, xalq bunu istəyir, xalqın da önündə gedən ziyalılar bu məsələdə həmişə fəal iştirak edib. O cümlədən də Əziz Ələkbərli bu istiqamətdə hər zaman aktiv olub. El dili ilə desək, yazıları, çıxışları, təbliğatı ilə bu yolda can qoyub. Bu məsələnin inkişafına, bu səviyyəyə gəlib çıxmasına töhfə verib. Həm Qərbi Azərbaycan İcmasının, həm də Təşəbbüs Qrupunun olması ayrı-ayrı strukturlar kimi görünsə də, amma məqsəd birdir. Fikrimcə, Əziz Ələkbərli bu işdə çox fəaldı, bütün imkanlarından istifadə edərək bu işə can yandırır. Hesab edirəm ki, onun bu qrupun da rəhbəri olması heç nəyə ziyan etməz, əksinə, xeyir edər. Çünki məqsədə doğru gedəndə onun ətrafındakılar da onunla birgə bu məqsədə qulluq etsələr məsələni axıra qədər irəli apara bilən bir şəxsdir. Mən ona inanıram. Hesab edirəm ki, Təşəbbüs Qrupuna da onun rəhbərlik etməsi çox yaxşıdır"-deyə Q.Hacıyev bildirdi.
Mübariz Göyüşlü: "Düşünürəm ki, işlərin bölünməsi və daha çevik, effektiv qərarların qəbulu baxımından Hikmət Babaoğluna bu işi həvalə etmək olardı"
Müasir İnkişaf Birliyinin sədri Mübariz Göyüşlünün fikri isə belədir: "Hesab edirəm ki, Əziz Ələkbərlinin həqiqətən də çox bacarıqlı, savadlı, qabiliyyətli bir alim, ictimai xadim, deputat, hər zaman Azərbaycan dövlətinə, dövlətçiliyinə sadiq bir şəxs kimi çox təqdirəlayiq fəaliyyətləri var. Biz bunun şahidi olmuşuq və oluruq da. Qərbi Azərbaycan İcmasının formalaşmasında, təşkilatlanmasında, bu səviyyəyə gəlib çıxmasında da onun, təbiidir ki, əvəzsiz rolu var. Amma əlbəttə, bu proseslə bağlı Təşəbbüs Qrupunun rəhbərliyini başqa bir adama da həvalə etmək olardı. Yəni doğrudan da, istər Qərbi azərbaycanlılar, istər icmanın özündə, istərsə də Milli Məclisdə kifayət qədər Qərbi Azərbaycan mövzusunu bilən savadlı, peşəkar alimlərimiz, ictimai xadimlərimiz, siyasətçilərimiz var. Yəni o torpaq çox böyük ziyalılar yetişdirib. Bu gün də onlar var. Əziz müəllimin Qərbi Azərbaycan İcmasına rəhbərlik etmək kimi bir ağır işi də gördüyünü nəzərə alsaq, düşünürəm ki, Təşəbbüs Qrupuna rəhbərliyi başqa bir deputata da həvalə etmək olardı. Məsələn, mən millət vəkili Hikmət Babaoğlunun adını qeyd edə bilərəm. Düşünürəm ki, siyasətçi, jurnalist, elm-təhsil adamı, tədqiqatçı, professor, millət vəkili, ziyalı kimi Hikmət Babaoğlu bu yükü çəkə biləcək bir şəxsiyyətdir. Bunu işlərin bölünməsi baxımından qeyd edirik. Əlbəttə, biz nə Əziz Ələkbərlini Hikmət Babaoğlu, Hikmət Babaoğlunu da Əziz Ələkbərli ilə qarşı-qarşıya gətirib müqayisə etmirik. Sadəcə olaraq düşünürəm ki, işlərin bölünməsi və daha çevik, effektiv qərarların qəbulu baxımından Hikmət Babaoğluna bu işi həvalə etmək olardı. Bir tərəfdən Qərbi Azərbaycan İcması, bir tərəfdən də Təşəbbüs Qrupu bu şəkildə çalışa bilərdi".
İradə SARIYEVA
