İllər uzunu türk dünyasında birmənalı qəbul edilməyən Fətullah Gülən artıq həyatda yoxdur. Bu adam Allahın ona verdiyi zəkadan türk dünyasına və daha çox Türkiyəyə qarşı istifadə etdi və bu da son...
Bir gün Nəsirəddin Tusi uzaq səfərə çıxıbmış. Yolda susayır və adamlarına tapşırıq verir ki, ətrafı axtarın, buralarda çeşmə mütləq var. Axtarışa gedənlər gələndə deyirlər ki, içməli su çeşməsi tapmadıq, amma bir qarpız bostanı var, ordan qarpız alıb susuzluğumuzu dəf edə bilərik. Belə də edirlər. Bostançının qarpız dərməyi N.Tusinin diqqətini cəlb edir. Çünki bostançı eyni ölçüdə və rəngdə olan yanaşı qarpızın birini dərir, o birinə isə dəymirdi. Tusi soruşur ki, niyə özünə əziyyət verirsən, bir tərəfdən dər gətir. Bostançı deyir ki, hələ bu qarpızların hamısı dəyməyib, içində kalı çoxdur. Bu söz dahi mütəfəkkiri bir qədər də təəccübləndirir - bostançı eyni ölçüdə, eyni rəngdə olan qarpızın yetişdiyini haradan bilir? Tusi bostançının kal hesab etdiyi bir neçə qarpızı kəsirdirir və görürlər ki, bostançi zərrə qədər də yanılmır. Bu haləti görən dahi mütəfəkkir deyir: "Başın yaxşı başdır, amma heyif ki, bu vaxta qədər qarpıza işləyib..." Fətullah Gülən haqqında da bu zərb-məsəl keçərlidir. Fətullah Gülən nail olduğu təfəkkürünü türk dünyasının inkişafına həsr etsəydi, xalqının, millətinin tərəqqisinə böyük töhfə vermiş olardı. Heyif ki, o, Amerikanın türk xalqına qarşi işləyən alətinə çevrildi və xalqına qarşı işləyən siyasi terror təşkilatı yaratdı. Bu da sonu, vətənsiz, məzarsız bu dünyaya gözlərini yumdu... Ölümü də terror ilğımı kimi gah doğruldu, gah yalanlandı. Məzarının belə yeri gizlin saxlanıldı. Bu yəqin insanın əməlinə uyğun gələn Allah qismətidir, hərə öz əkdiyini biçəcək...
Gələn xəbərlərə görə, Fətullahçı Terror Təşkilatının (FETÖ) lideri Fətullah Gülən ABŞ-da dünyasını dəyişib. Gülənin ölümündən əvvəl Pensilvaniya ştatında Luke Xəstəxanasında müalicə aldığı bildirilirdi. Xəstəxana mənbələrindən əldə edilən məlumata görə, xəstəxanada dünyasını dəyişənlərin adları arasında terror təşkilatı liderinin də adı var. Gülənin qaldığı 251 nömrəli otaq evakuasiya olunarkən xəstəxanada olanlar bildirdilər ki, bu yaxınlarda bəzi adamlar Güləni müşayiət edənləri görməyə gəliblər.
Türkiyənin xarici işlər naziri Hakan Fidan FETÖ lideri Fətullah Gülənin ölümü ilə bağlı verdiyi açıqlamada kəşfiyyat mənbələrinin bu vəziyyəti təsdiqlədiyini bildirib.
Fidan, Gülənin ölümünün təşkilatın gəncləri aldatmaq və öz dəyərlərinə xəyanət etmə üsullarına təsirini azaltmalı olduğunu ifadə edərək deyib: "Kəşfiyyat mənbələrimiz ölümü təsdiqləyir. Bu qaranlıq təşkilatın lideri öldü. Millətimizin terrorla mübarizədə qətiyyəti davam edəcək. Bu xəbər bizi rahatlamağa və özündən razı salmağa əsas vermir. Bu, nadir hallarda rast gəlinən bir təhlükə idi. Gənclərimiz aldadılaraq onlara qoşulub, onları "müqəddəsliyinə xəyanət edən maşına çevirib". Mən onları bu xəyanətdən əl çəkməyə dəvət edirəm".
Türkiyə Milli Müdafiə Nazirliyi (MSB) də Fətullahçı Terror Təşkilatının (FETÖ) lideri Fətullah Gülənin həyatını itirdiyini açıqlayıb. Açıqlamada deyilir: "Bu xain vətənsiz öldü, o, nümunədir. Başda FETÖ olmaqla, bütün terror təşkilatlarına qarşı mübarizəmiz qətiyyətlə davam edəcək".
Fətullahçı Terror Təşkilatının lideri Fətullah Gülənin dünyasını dəyişməsini ilk dəfə təşkilatın mətbuat orqanları "son xəbər" olaraq açıqlayıb. Gülənin harada dəfn ediləcəyi maraq doğurur.
Keçmiş kəşfiyyat hesabatlarında yazılır ki, Fətullah Güləndən ümidini kəsən təşkilat rəhbərlərinin məzar yerini də hazırladığı bildirilib.
Təşkilat Pensilivaniyada yerləsən 9 ha. sahəni alaraq ərazini qəbiristanlığa çevirib. Onu "Yad Qəbiristanlıq" adlandırırdılar. ABŞ-da dünyasını dəyişən digər təşkilat üzvləri də burada dəfn edilib. Məlumata görə, həmin ərazidə FETÖ lideri Fətullah Gülən üçün hazırlanmış məzar yeri iki sərv ağacının arasındadır.
Xəbərdə qeyd edilir ki, FETÖ üzvlərinin liderin dəfn edilməsi üçün Pensilvaniyadakı qərargahından 5 kilometr aralıda torpaq aldıqları öyrənilib. Türkiyədə çevriliş cəhdindən sonra ABŞ-a qaçıb dünyasını dəyişənlər də burada dəfn edilib.
FETÖ terror qruplaşmasının lideri Fətullah Gülənin ölümündən sonra təşkilata rəhbərlik uğrunda mübahisələrin başladığı bildirilir.
Məlumata görə, ABŞ və Avropada bu məsələ ilə bağlı müzakirələr aparılır. Təşkilatın fəaliyyəti üçün ayırılan milyonlarla vəsait və Güləndən qalan çox sayda mülklərin kimin nəzarətinə veriləcəyi hələlik bəlli deyil. İddialara görə, boşalan rəhbərlik postu uğrunda daxili çəkişmələr güclənib.
Lakin əvvəl gələn məlumatlara görə, Fətullah Gülən vəsiyyət edibmiş ki, onun cənazəsini Türkiyəyə gətirib, anasının yanında dəfn etsinlər.
Akif NƏSİRLİ
