Gürcüstanda müxalifət tərəfdarları parlament seçkisinə az qalmış ölkənin Avropa İttifaqına (Aİ) inteqrasiyasına dəstək məqsədilə paytaxtda yürüş keçiriblər. Gürcüstan və Aİ-nin bayraqlarını daşıyan bir neçə min yerli sakin Tiflisin beş müxtəlif rayonundan "Gürcüstan Avropa İttifaqını seçir" başlığı altında yürüş keçirib. Yürüşdən sonra etirazçılar musiqi konsertinin keçirildiyi şəhərin mərkəzindəki Azadlıq Meydanına toplaşıblar.
Aksiyanı qeyri-hökumət təşkilatları təşkil edib. Onu da qeyd edək ki, aksiyanı prezident Salome Zurabişvili, eləcə də əsas müxalifət partiyaları dəstəkləyib. Tribunada çıxış edən Zurabişvili Gürcüstanın Aİ-yə daxil olaraq yaxşı tərəfdaş və müttəfiq olacağını deyib. O, tribunadan Ukrayna prezidenti Vladimir Zelenski və Moldova prezidenti Maya Sanduya müraciət edərək onlara qələbə arzulayıb: "Ukraynanın Rusiya təcavüzünə qarşı mübarizəsi həm də Gürcüstanın azadlığı uğrunda mübarizədir. Buradan, sizin adınızdan Zelenskiyə üz tutub, "onun bizim üçün mübarizə apardığını və qalib olacağını bilirik" demək istəyirəm. Və biz birlikdə Avropaya gedəcəyik. Maya, bu gün, sənin qələbə günün və Avropa referendumunun qələbə günü olacaq. Biz birlikdə Avropaya girəcəyik!". Zurabişvili bir neçə dəfə deyib ki, oktyabrın 26-da vətəndaşlar Rusiya ilə Avropa arasında seçim edəcəklər. O, açıq söyləyib ki, avrointeqrasiyanın davam etməsi üçün dörd avropapərəst partiyanı dəstəkləmək vacibdir. Həmin dörd partiya Zurabişvilinin təşəbbüsü ilə "Gürcüstan xartiyası"nı imzalayıblar. Sənəddə seçkidən sonra müvəqqəti hökumət yaradılması, kompleks islahatların aparılması, "xarici agent" qanununun ləğvi, azad və ədalətli şərtlərlə növbədənkənar seçkilərin keçirilməsi nəzərdə tutulur. Maraqlıdır ki, onalrın faəliyyətinə Qərbdən hər cür dəstək verilir. Bu fonda hakim "Gürcü Arzusu" partiyası qarşıdan gələn seçkiləri hərb və sülh arasında həyati seçim kimi təqdim edir. Baş verənləri şərh edən gürcü ekspert David Çikelidze qeyd edir ki, hələlik Gürcüstanda seçkiöncəsi vəziyyət sabitdir, sakitlik hökm sürür: "Siyasi partiyalar sərbəst şəkildə təbliğat aparır, əhali ilə görüşlər keçirirlər. Bu zaman onlar heç bir problemlə qarşılaşmırlar. Lakin təəssüflər olsun ki, radikal müxalifət partiyaları Mərkəzi Seçki Komissiyasına (MSK) qarşı məqsədli şəkildə təzyiq və diskriminasiya kampaniyası aparırlar". Onun sözlərinə görə, oktyabrın 11-də MSK işçilərinə "sms" göndərərək onlara vəzifələrindən istefa vermələri üçün təzyiq göstərilməsi yolverilməzdir: "Burada Qərbin də böyük rolu var. Təəssüflər olsun ki, Qərb dövlətlərində Gürcüstanın daxili işlərinə maraq həddindən artıq çoxdur. Həmin dövlətlərin səfirlərinin söylədiklərindən bəlli olur ki, hazırkı Gürcüstan hakimiyyəti onlar üçün qəbuledilməzdir və onlar çalışırlar ki, "Gürcü Arzusu" iqtidar partiyasını nüfuzdan salsınlar. Onlar xaricdən Gürcüstandakı seçkilərə və ölkənin daxili işlərinə kobud müdaxilə ilə buna çalışırlar. Mən ümid edirəm ki, hakimiyyət bu təzyiqlərin öhdəsindən gələcək. Necə olur ki, Moldovadakı seçkilərə kim müdaxilə etsə, Moldovanın ona layiqli cavab verməyə haqqı var deyirlər. Amma Gürcüstanın işlərinə qarışanlara cavab verəndə bizə təzyiq edilir?! Burada qeyd etmək yerinə düşər ki, əgər "Gürcü Arzusu" bu seçkilərdə qalib gəlməsə, ümumiyyətlə, Qafqazda vəziyyət dəyişəcək, partlayış baş verəcək və bu, bütün region ölkələrinə mənfi təsir edəcək. Amma ümid edirəm ki, nə olursa-olsun, Gürcüstan ilə Azərbaycan arasında heç nə dəyişməyəcək. Tarix boyu Gürcüstan və Azərbaycanın çox yaxşı əlaqələri olub. "Gürcü Arzusu" hakimiyyətə gəldikdən sonra münasibətlər strateji tərəfdaşlıq səviyyəsinə yüksəlib. Bizim yaxın qonşuluq, dostluq, qardaşlıq əlaqələrimiz biri-birinə uyğun gəlir. Bunu baş nazir İrakli Qaribaşvilinin və Azərbaycan prezidenti İlham Əliyevin görüşündən sonra birgə bəyanatları da bir daha təsdiq edir. Biz Gürcüstanda yaşayırıq və hər kəslə ünsiyyətdə oluruq. Çoxluq istəyir ki, ölkədə sülh olsun. Bu isə o deməkdir ki, çoxluq "Gürcü Arzusu" partiyasının siyasətini dəstəkləyir. Ümid edirəm ki, "Gürcü Arzusu" bu seçkilərdə 55-60 faiz səs toplaya biləcək və parlamentdə konstitusion çoxluğu qazana biləcək".
Digər ekspert, parlamentin deputatı İrakli Kadaqişvili də çəsələtə eyni prizamadan yanaşır: "Seçkilərlə bağlı əsas müşahidəçi vəzifəsini yerinə yetirən ATƏT-in müşahidə missiyası ilkin hesabatını təqdim edib. Sənəddə də qeyd edilib ki, seçki öncəsi vəziyyət çox sabitdir. Gürcüstan Mərkəzi Seçki Komissiyası və onun regional bölmələri işlərini düzgün qurublar və seçkilərə tam hazırdırlar. Vətəndaşların sərbəst və azad səsvermələri üçün hər cür şərait yaradılıb, mətbuat azad fəaliyyət göstərir". Onun sözlərinə görə, sənəddə yalnız ölkədə böyük siyasi qütbləşmənin olduğu qeyd edilir: "Mənim fikrimcə bunun da ən böyük səbəblərindən biri Gürcüstanın daxili işlərinə, seçki prosesinə kənardan, xüsusən də xaricdən müdaxilənin olmasıdır. Əgər bəzi kobud, yersiz müdaxilələr olmasa siyasi qütbləşmə də o qədər böyük olmaz. İndi qarşıda yalnız bir məsələ dayanıb, bu da səsvermənin normal şəraitdə, azad, şəffaf və demokratik təşkilidir. Seçkilərdən sonra həyat öz axarı ilə gedəcək və Gürcüstan yenə də demokratik inkişafını davam etdirəcək". Deputat bildirib ki, Ukrayna-Rusiya müharibəsi başladıqdan sonra cəmiyyət bir çox şeyin şahidi oldu: "Bəzi qüvvələr Gürcüstanı Rusiya ilə müharibəyə cəlb etmək istəyirlər. Amma Rusiya ilə qarşıdurma Gürcüstan üçün məqbul deyil və yolverilməzdir. Gürcüstan Ukraynanın ərazi bütövlüyünü və suverenliyini tam dəstəkləyir, amma biz Rusiya ilə ikinci cəbhəni aça bilmərik. Xüsusilə də nəzərə almalıyıq ki, Gürcüstan ərazilərinin də 20 faizi işğal olunub. Ona görə də Gürcüstan sülh yolu ilə gedir və seçkilərdən sonra da yolunu bu istiqamətdə davam etdirməlidir. Bütün cəhdlərimizə baxmayaraq bəzi Qərb dövlətləri, onların Gürcüstandakı diplomatik missiyalarının rəhbərləri kobud, həqiqəti əks etdirməyən, yalan məlumatlarla dolu bəyanatlar verir, bizə qarşı sanksiyalar tətbiq edirlər. Bütün bunlar Gürcüstanın suveren hüquqlarının kobudcasına pozulması deməkdir. Eyni zamanda, bu addımlar Avropa demokratiyasının, strateji tərəfdaşlığın norma və prinsiplərinə, diplomatik etiketə uyğun gəlmir. Bütün bunlara baxmayaraq Gürcüstan hökuməti və gürcü xalqı öz taleyini özü həll edir və seçkilərdə növbəti 4 ildə kimin hakimiyyətdə olacağına özü qərar verəcək". Onu da qeyd edək ki, "Gürcü Arzusu" xaricdən maliyyələşən QHT və medianın fəaliyyətini məhdudlaşdıran, eləcə də "LGBT propaqandası" əleyhinə qanunlar qəbul edib. Bunu bəhanə edən Brüssel və Vaşinqton cəza tədbirlərinə əl atıb. Aİ Gürcüstanın bloka üzvlük prosesini dondurub, Vaşinqton sanksiyalara əl atıb.
Nahid SALAYEV
