Ramil Məmmədli: "Şarmazanov Serj Sarkisyanın tulasıdır"
Ermənistan Respublika Partiyasının Ali Qurumunun üzvü Eduard Şarmazanov yazıb ki, 2020-ci il oktyabrın 19-da Paşinyan "Artsaxın" azəriləşdirilməsinə yaşıl işıq yandırıb: "Düz dörd il əvvəl Rusiya prezidenti V.Putin Ermənistan və Azərbaycan tərəflərinə müharibəni dayandırmaq təklifi ilə çıxış edib, onun üçün naməlum səbəblərə görə erməni tərəfdaşlar bunu rədd ediblər".
Gələcək təslimiyyət simvolu oktyabrın 19-da qanlı və fəlakətli müharibəyə son qoymaq təklifini niyə rədd etdi?
Şarmazanov yazır ki, Putinin fikrincə, onun təklifi qəbul edilsəydi, Şuşa ermənilərin nəzarətində qalmalı, azərbaycanlı qaçqınların geri qayıda bildiyi yerlər olmalı, cənub hissəsindəki kiçik ərazilər Azərbaycana verilməli id: "Oktyabrın 19-da parlamentdənkənar qüvvələrlə görüşündə Paşinyan bildirib ki, müharibənin dayandırılması təklifi müstəsna olaraq "5+2" variantına aiddir. Yəni 19 oktyabr təklifinə görə Şuşanın düşmənə verilməsindən söhbət gedə bilməzdi. Üstəlik, oktyabrın 19-da Paşinyana müharibənin məğlubiyyətlə nəticələnəcəyi artıq aydın idi. Və bütün bunlardan sonra o, müharibənin daha az insan və ərazi itkiləri ilə dayandırılması təklifini rədd etdi".
Maraqlıdır, həqiqətən Paşinyan 19 oktyabrda niyə müharibəni dayandırmadı? Və ya bunu dayandıra bilərdi?
"Paşinyan Azərbaycan Ordusunun sürətlə irəliləməsinin davamlı olacağını düşünmürdü"
Sözügedən məsələni "Bakı-Xəbər"ə şərh edən hərbi ekspert Ramil Məmmədli Şarmazanovun fikirlərinə birmənalı yanaşmadı: "Əvvəla, Şarmazanov Serj Sarkisyanın tulasıdır. Çox vaxt erməni mediasında Sarkisyanın fikirlərini o ifadə edir. Şarmazanovun təmsil olunduğu partiya Ermənistanda sosial dayaqlarını 6 ildən çoxdur itirib. Bunlar Rusiyanın vassalı olmağa hazır olan siyasi qüvvələrdir. Bəli, 19 oktyabrda Paşinyan sülhə razı olmayıb. Ona görə ki, Nikol azərbaycanlıların Şuşa şəhərinə qayıtmasında maraqlı olmayıb. Digər tərəfdən, Paşinyan Azərbaycan ordusunun sürətlə irəliləməsinin davamlı olacağını düşünmürdü. Hesab edirdi ki, qış yaxınlaşdıqca hücum dinamikası zəifləyəcək və bu, həm ermənilərə vaxt qazandıracaq, həm də xarici təzyiqlar üzündən Azərbaycan geri çəkiləcək. Ancaq bunun tam əksi baş verdi. Oktyabrın 20-də Zəngilan şəhəri, 25-də isə Qubadlı şəhəri şanlı ordumuz tərəfindən azad edildi. Daha sonra ordumuz Şuşaya doğru sürətlə hərəkət etməyə başladı. Başqa bir tərəfdən, Şarmazanov deyir ki, cənub hissəsində kiçik bir ərazi Azərbaycana verilməli idi. Bu belə deyil. Çünki 19 oktyabra qədər Zəngilan və Qubadlı şəhərləri azad edilməmişdi. Üstəlik, Ağdam, Laçın, Kəlbəcər işğal altında idi. İstənilən halda təşəbbüs bizim tərəfdə olduğu üçün Prezident İlham Əliyev hansısa yarımçıq razılaşmaya getməzdi. Çünki Ali Baş Komandan Ermənistanın hiyləgər gedişlərinə bələd idi. Yaxşı bilirdi ki, belə vəziyyətdə Ermənistan üzərinə götürdüyü öhdəliklərə əməl etməz. Ona görə də qəti mövqe ortaya qoydu ki, bütün ərazilər azad edilməlidir".
Vidadi ORDAHALLI
