İbrahim Rüstəmli: "Əslində isə vəziyyət tamam başqa cürdür"
Uzun illər Qazaxın Ermənistanın işğalında olan 7 kəndindən 4-nün Azərbaycana qaytarılmasından sonra ermənilərin narahatlığı daha da artıb. O biri kəndlərin də geri qaytarılacağı barədə ehtimalların olması onları lap çox əndişəyə salıb.
İşğal nəticəsində sahibləndikləri torpaqların təkrar öz sahibinə qaytarılmasını istəməyən ermənilər yalandan hay-küy salır, mətbuata yalan məlumatlar verirlər.
Tavuşlu jurnalist Voskan Sarkisyan məlumat yayıb ki, Kirants (Xeyrimli) sakinləri payız əkinini aparmayıblar. "Kirants sakinlərindən soruşdum ki, sərhədin bu hissəsində əminamanlıq və təhlükəsizlik hiss edirlərmi? Orada Azərbaycan əsgərləri görünür, azərbaycanlılar bu ərazidə ziyafət çəkirlər".
O yazır ki, Azərbaycana verilən 64 hektar əkin sahəsində, keçən ildən fərqli olaraq, Kirants sakinləri Azərbaycanın iki qalası arasındakı ərazidə, ümumiyyətlə payız səpinini aparmayıblar.
Erməni tərəf iddia edir ki, Azərbaycana 64 hektar əkin sahəsi verilib. Necə yəni Kirantsda 64 hektar əkin sahəsi Azərbaycana verilib?
"...Erməni əhalisinin bu əsassız naharatlığı qəsdən dilə gətirilir"
Tanınmış ekspert İbrahim Rüstəmli "Bakı-Xəbər"ə "İlk növbədə onu demək istəyirəm ki, proseslər hər hansı bir Ermənistan vətəndaşının, yaxud əkinçisinin istəyi ilə həyata keçirilmir. Bu, dövlət başçıları, dövlət rəsmiləri səviyyəsində layihələşdirilmiş məsələlərdir. Bu gün Azərbaycanla Ermənistan arasında sülh sazişinin imzalanması, əlbəttə, region üçün, Cənubi Qafqaz üçün xüsusi əhəmiyyət daşıyır"-deyə bildirdi.
İ.Rüstəmli qeyd etdi ki, Ermənistanla Azərbaycan arasında sülh müqaviləsinin imzalanması vacib məsələdir. Ekspertə görə, delimitasiya və demarkasiya zamanı iki ölkə arasında sərhəd xəttinin keçdiyi yerlərin dəqiqləşdirilməsi sülh üçün əsas prioretet, əsas zəmin rolunu oynayır. "64 hektar, yaxud ondan çox və ya az hektar olan əkin, yaxud otlaq sahəsinin digər əraziyə keçməsi əldə olunacaq razılaşmanın, bağlanacaq sülh müqaviləsinin fonunda o qədər də böyük əhəmiyyət daşımır. Bu baxımdan, fikrimcə, ermənilərin bu cür narahatlıq keçirməsinin əsası yoxdur. O vaxt Paşinyan onlardan vəziyyətlərinin necə olduğunu soruşub, onlar da deyiblər ki, biz o ərazilərə baxıb narahat oluruq, həyəcan keçiririk. Əslində isə vəziyyət tamam başqa cürdür. Vəziyyət ondan ibarətdir ki, Azərbaycan tərəfi ümumiyyətlə sülhü dəstəkləmək işində kifayət qədər konseptual addımlar atır və konseptual addımlar da sülhün bərpasında əsas amil, əsas şərtdi. Çıxışlarımızda dəfələrlə qeyd etmişik ki, İlham Əliyev Azərbaycan Prezidenti və Ali Baş Komandan olaraq 44 günlük Vətən müharibəsini uddu, işğalçı üzərində qələbə qazandı, indi sülhü itirmək istəmir. Çox ciddi bir məsələdir. Təbii, burda biz üçüncü, dördüncü dövlətlərin, başda ABŞ olmaqla Qərbi, başda Fransa olmaqla Avropanı götürdükdə, ciddi müdaxiləsi ilə üz-üzə qalmışıq, çox təhlükəli gedişlər baş verir. ABŞ-a aid hərbi təyyarələrin əraziyə enməsi, silah-sursat gətirməsi, təbii ki, bu silah-sursatı müşayiət edən şəxsi heyətin İrəvana-tarixi Azərbaycan torpaqlarına gəlməsi sıradan bir məsələ deyil. Götürək Fransanı, bu ölkənin xüsusi təyinatlıları Ermənistan ordusuna dağlıq şəraitdə təlim keçəcəklər, onlara dağlıq ərazidə döyüşməyin sirrlərini öyrədəcəklər. Əlbəttə, bütün bunların fonunda kiçik bir kənddə bir qrup mülki əhalinin, sivilin hay-küyü o qədər də böyük əhəmiyyət daşımır. İlk növbədə ona görə ki, Azərbaycan tərəf sülhü dəstəkləmək, sülhə nail olmaq yolunda lazım olan bütün prosesləri, bütün tədbirləri, bütün addımları çox real şəkildə həyata keçirir"-deyə bildirən İ.Rüstəmli qeyd etdi ki, Azərbaycanın keçirdiyi 23 saatlıq antiterror tədbirlərində bir nəfər də olsun mülki əhalinin burnu qanamayıb. "İndi də Azərbaycan nəyə görə mülki əhaliyə silah qaldırmalıdır? Onlar niyə bizdən təhlükə hiss etməlidir? Bizim torpaqlarımız 30 il Ermənistanın əsarəti altında qaldı, onlar Xocalıda, Ağdabanda, Çaylıda, hər yerdə azərbaycanlılara qarşı soyqırım siyasəti yeritdilər. Amma Azərbaycan belə dövlət də, belə xalq da deyil. Azərbaycan istədiyinə nail olub, bundan sonra da istədiyinə nail olacaq. Amma bu mülki əhalini faciəsi bunun üzərindən heç vaxt baş verməyəcək. Bölgədə çox həssas proseslər gedir. Ermənilər heç vaxt erməni dilində danışmayıblar, ya fransız dilində, ya ingilis, ya da rus dilində danışıblar. Yəni onlar istəyirlər ki, Azərbaycan tərəfi sülhə mane olan bir addım atsın. Amma onlar bunu görməyəcəklər. Çünki Azərbaycan vahid siyasi xətt həyata keçirir. Azərbaycanın əsas məqsədi Qərbi Zəngəzurdu, ona da biz nail olacağıq, quru yolumuzu bərpa edəcəyik. Azərbaycan tərəfdən erməni əhali üçün heç bir problem yoxdu, ola da bilməz. Mən bu məsələyə münasibət bildirərkən ilk növbədə onu demək istəyirəm ki, erməni əhalisinin narahatlığına əsas yoxdur, ikincisi, əkin və otlaq sahələrinin sərhədlərin keçdiyi ərazilərə düşməsi təbii prosesdir, siyasi prosesdir. Bu prosesdə 5, 10, 20 hektar artıq əhəmiyyət daşımır, əkin sahəsi, yaxud otlaq sahəsi statusunu itirir. Mən elə bilirəm ki, erməni əhalisinin bu əsassız naharatlığı qəsdən dilə gətirilir. Halbuki, Azərbaycanın erməni mülki əhalisinə qarşı silahlı hücum həyata keçirmək fikri yoxdur, bunların dediyi mənasız fikirlərdir, bəhanələrdir, ölkəmizin belə bir fikri olmayıb, olmayacaq da. Azərbaycanın əsas məqsədi odur ki, sülhə aparan bütün vasitələrdən istifadə etsin, sülhə aparan yol isə silahsız bir prosesdir, Azərbaycan isə bu prosesdə özünü, həmişə olduğu kimi, punktual aparır"-deyə İ.Rüstəmli qeyd etdi.
İradə SARIYEVA
