Xəyal Bəşirov: "Bütün bunlar Ermənistanın çoxspektrli, təhlükəli planların tərkib hissəsinə, alətinə çevrilməsi ilə bağlı məqamları gündəmə gətirir"
Ermənistan Daxili İşlər Nazirliyinin Miqrasiya və Vətəndaşlıq Xidmətinin (MCS) yaydığı məlumata görə, bu ilin 9 ayında Ermənistan vətəndaşlığı üçün 16 060 nəfər müraciət edib. Müraciət edənlərin böyük əksəriyyəti Rusiyadandır - 7693 nəfər. Onlardan 3588 nəfəri birbaşa Miqrasiya və Vətəndaşlıq Xidmətinə (MMX), 4105 nəfəri isə konsulluq xidməti vasitəsilə müraciət edib.
"Əgər əvvəllər Ermənistan vətəndaşlığını almaq üçün hər il orta hesabla 8 min müraciət edilirdisə, Ukraynada vəziyyətin gərginləşməsindən sonra bu rəqəm bir neçə dəfə artaraq ildə orta hesabla 25 minə çatıb"- deyə xidmət rəisinin müavini Nelly Davtyan qeyd edib.
Onun sözlərinə görə, Livandan da xeyli sayda müraciət var ki, bu da münaqişənin kəskinləşməsi ilə əlaqədar Yaxın Şərq regionunda təhlükəsizlik vəziyyətinin pisləşməsi ilə bağlıdır.
Camaat Ermənistandan qaçır. Ermənistan vətəndaşları da, Qarabağdan ora könüllü köçən ermənilər də Ermənistanı tərk edib başqa ölkələrə üz tutur. Bəs bu adamlar Ermənistana niyə axışır, burada onları cəlb edən nə var?
Göründüyü kimi, vətəndaşlıq istəyənlərin arasında ukraynalılar və livanlılar xüsusi çəkiyə malikdir. Bu da müxtəlif suallar doğurur. Əsas sual budur ki, Ukrayna və Livandan gələnlər Qərbin xüsusi hazırlanmış qüvvələri ola bilərmi? Gələcəkdə Rusiyaya qarşı istifadə üçün onları Qərb hazırlayıb Ermənistana gətirə bilərmi?
"...Ermənistana təhlükəli qrupların yerləşdirilməsi prosesini də həyata keçirə bilərlər"
Siyasi Hüquq və Araşdırmalar Mərkəzinin rəhbəri Xəyal Bəşirov "Bakı-Xəbər"ə şərhində bildirdi ki, belə bir halın baş verməsi təsadüfi xarakter daşımır: "Bu məsələ əslində Qərbin Cənubi Qafazda Ermənistanla bağlı hazırladığı planların tərkib hissələrindən biridir. Ermənistanın vəziyyəti hamımıza bəllidir. Buna qədər - Azərbaycanla Ermənistan arasında İkinci Qarabağ müharibəsinə qədər də Ermənistanın siyasi-iqtisadi vəziyyəti bəlli idi. Bu müharibədən sonra Ermənistan daha ağır duruma düşüb. Ermənistan ordusu 5 milyard İkinci Qarabağ müharibəsində, 1 milyard da antiterror tədbirləri zamanı, ümumlikdə 6 milyard ABŞ dolları həcmində silah-sursatı, hərbi texnikanı qənimət kimi Azərbaycan ordusuna saxlayıb qaçdı. Təbii ki, bu da Ermənistan ordusunun həm canlı qüvvə baxımından, həm silah arsenalı baxımından darmadağın edilməsi demək idi. Bu, Ermənistanın iqtisadiyyatına da ciddi mənfi təsir göstərməmiş deyil. Eyni zamanda nəzərə alaq ki, uzun illər ərzində Ermənistan yürütdüyü siyasətlə özünü iqtisadi və siyasi blokadaya salıb, bu ölkə tam şəkildə iqtisadi, enerji, siyasi baxımdan Rusiyadan asılı vəziyyətdə olan bir dövlət olub. Bu gün Rusiyanın Ukraynada müharibə aparması səbəbindən onun özünün iqtisadiyyatı çox çətin durumdadır. Nəzərə alsaq ki, Ermənistanın siyasi, iqtisadi, enerji və digər təhlükəsizliklərini təmin edən bir dövlət özü bu cür ağır vəziyyətdədirsə, deməli, Ermənistanın özü qat-qat pis durumdadır. Təbii ki, bu proseslərdə kənar qüvvələrin rolu çox önəmlidir. Azərbaycan mümkün qədər Ermənistanla sülh prosesinə doğru addımlar atamaq istəyir, amma Ermənistan bir konstision əsasda Azərbaycana qarşı ərazi iddialarından vaz keçmək istəmir, digər tərəfdən, ATƏT-in Minsk qrupunun faktiki olaraq mövcud olmadığını nəzərə alıb, onun de-yure ləğvi ilə bağlı mövqe ortaya qoymaq istəmir. Həmçinin Ermənistan özünün kənar havadarları, himayədarları vasitəsilə silahlanır və o silahları Ermənistana bir çox hallarda pulsuz, qarşılıqsız, bəzi hallarda uzun müddətlik kreditlə və digər formalarda verirlər. Halbuki, Ermənistan iqtisadi baxımdan həmin o silahları almaq gücündə deyil. Bu da Ermənistanın silahlandırılması deməkdir. Nəzərə alsaq ki, 2022-ci ilin oktyabrından başlayaraq Ermənistanda Avropa İttifaqının mülki missiyası adı altında çoxlu sayda ölkələrin, həm də Avropa İttifaqına aid olmayan Kanadanın, ABŞ-ın ordusu, silahlıları, jandarma qüvvələri, kəşfiyyatçıları yerləşməkdədir. Bu da ondan xəbər verir ki, Ermənistanla bağlı çox ciddi plan hazırlanır. Bu planın tərkib hissəsi kimi Azərbaycana qarşı revanşist müharibə də istisna deyil. Eyni zamanda Rusiyanın nəzarətindən Ermənistanın çıxarılması, yaxud da Rusiyanın ordakı mövqeyini mümkün qədər zəiflətmək niyyəti ilə Ermənistan platsdarm kimi istifadə edilir. Bundan başqa, Yaxın Şərqdə baş verən proseslərlə bağlı ABŞ və Qərbdən olan bir sıra İsrail müttəfiqləri Ermənistandan İrana qarşı istifadə etmək niyyətlərini həyata keçirə bilərlər. Bütün bunlar Ermənistanın çoxspektrli, təhlükəli planların tərkib hissəsinə, alətinə çevrilməsi ilə bağlı məqamları gündəmə gətirir.
Düşünürəm ki, bu gün Ermənistana o şəxslərin köçməsinin səbəbi məhz süni şəkildə onların ora yerləşdirilməsi ilə bağlıdır. Ərazilərimiz işğal altında olanda Qarabağa və digər yerlərimizə süni şəkildə Suriyadan, Livandan, Liviyadan, eləcə də başqa ölkələrdən ayrı-ayrı qrupların gətirilməsi və yerləşdirilməsi məhz o zaman da belə təhlükəli planların həyata keçirilməsi ilə bağlı idi. Amma bu gün artıq o ərazilər onların nəzarətindən çıxıb. Buna görə də Ermənistanın öz ərazisindən müxtəlif niyyətlər üçün istifadə etmək istəyən qüvvələr var".
X.Bəşirovun sözlərinə görə, nəzərə alsaq ki, Ermənistan Sovetlər ittifaqından qopduqdan sonra onun üç milyon və yaxud daha çox əhalisi vardı. X.Bəşirov qeyd etdi ki, indi o əhalinin sayı gəlib beş milyona çıxmalı olduğu halda, verilən məlumatlara görə, əhali sayı 2 milyondan da aşağıdır. "Bu da ondan xəbər verir ki, ermənilər Ermənistandan köç edirlər. Qarabağdan Ermənistana köçmüş şəxslərin bir hissəsi də elə dərhal tranzit ölkə kimi Ermənistandan istifadə edib xaricə, Avropa ölkələrinə getdilər. Fikrimcə, bu məqamları nəzərə alsaq, bu bir daha ondan xəbər verir ki, Ermənistan vasitəsilə bu gün bu niyyətlərini həyata keçirmək istəyirlər. Gələcəkdə hansı məqsədlərlə istifadə olunacaq, biz onu növbəti proseslərdə görə bilərik. Hər halda görünən odur ki, Ermənistandan öz niyyətləri üçün istifadə etmək istəyən qüvvələr var. Bu qüvvələr, təbii ki, Ermənistana təhlükəli qrupların yerləşdirilməsi prosesini də həyata keçirə bilərlər. Elə qruplar ki, onlar nəzarətsiz olsunlar və gələcəkdə məhz kənar qüvvələrin nəzarəti altında fəaliyyət göstərsinlər. Necə ki, biz İraqda, Suriyada və digər ərazilərdə İŞİD kimi qruplaşmaları görmüşdük, başqa qruplaşmaların şahidi olmuşduq. Sanki onlar elə görünürdülər ki, tam nəzarətsiz qruplardır, amma faktiki olaraq onlar kənardan idarə olunurdular. Bu gün Ermənistan ərazisində də elə qüvvələrin yerləşdirilməsi ilə bağlı təhlükəli niyyətlər var ki, bunlar nəticəsində gələcəkdə Ermənistan vasitəsilə müxtəlif planların həyata keçirilməsi mövqeyi ortaya qoyula bilər. Hər bir halda bunlar Cənubi Qafqaz üçün çox təhlükəli məqamlardır və düşünürəm ki, məhz bu məqamlar bir daha, şərti də olsa, sərhədlərimizin gücləndirilməsi missiyamızı daha tez həyata keçirməklə bağlı tələsməyimizə səbəb olur"-deyə bildirən X.Bəşirovun sözlərinə görə, təəssüflər olsun ki, bu gün Ermənistan mümkün və qeyri-mümkün olan yollarla sülhdən yayınmağa çalışır. O hesab edir ki, şübhəsiz, bu da həmin o kənar qüvvələrin təsiri ilə həyata keçirilən prosesdir. Müsahibimizin sözlərinə görə, Ermənistan həmin o qüvvələrin diqtəsi ilə sülhdən yayınmaqla, əslində onların planlarının daha qısa müddət ərzində və daha münbit şəraitdə həyata keçməsinə şərait yaradır. Hər bir halda X.Bəşirov düşünür ki, bu, qonşu dövlətlər, Cənubi Qafqaz üçün də təhlükəli planlardır. "Amma nəzərə almaq lazımdır ki, bu təhlükəli planların ən böyük zərbəsi Ermənistan dövlətinin özünə və erməni xalqına dəyəcək. Az öncə qeyd etdiyim kimi, biz bunu Suriyanın, İraqın nümunəsində gördük"-deyə X.Bəşirov qeyd etdi.
O bildirdi ki, bu təhlükəli planlardan daha çox Ermənistan və erməni xalqı əziyyət çəkəcək.
İradə SARIYEVA
