Faiq Ələkbərli: "Paşinyan hökuməti işin ciddiliyini anlayır və bilir ki, bu cür saxtakarlıqlarla, qeyri-real məsələlərlə, miflərlə irəli gedə bilməyəcəklər"
Ermənilər "Arsax irsi" uydurmasından heç cür əl çəkmək istəmirlər. Guya ki, Qarabağda erməni irsi var imiş. Hansı "irsdən" danışırlar, özləri də bilmirlər. Gah "Qarabağın xristian irsinin məhv edildiyini", gah da "erməni irsinin dağıdıldığını" iddia edirlər. Anlamırlar ki, Qarabağın xristian irsinin onlara heç bir aidiyyəti yoxdur, digər tərəfdən də, o irs onlara məxsus olsaydı onlara qarşı saxtalaşdırma aktları həyata keçirməzdilər, işlərinə yaramayanları dağıtmazdılar. Bu gün Ermənistanda bir qrup var ki, əsassız olaraq Azərbaycanı hədəfə alır və bizi "erməni irsini dağıtmaqda" ittiham edir.
Ermənistan hakimiyyəti də, müxalifəti də bir qayda olaraq Qarabağdan könüllü getmiş ermənilərdən ciddi şəkildə sui-istifadə edib özlərinə xal qazanmaq istəyir. Bu öz yerində, amma bəzi məsələlər də var ki, orada ortaq məxrəcə gələ bilmirlər. Məsələn,
oktyabrın 18-də Ermənistan parlamentində müxalifətçi deputatların təşəbbüsü ilə "Bakı Arsaxın tarixi və mədəni irsini məhv edir" mövzusunda keçirilən absurd müzakirəyə Ermənistan hökumətinin rəsmiləri qatılmaqdan imtina edib.
Saxta ittihamlar və əsassız iddiaların əks olunduğu iclasın təşəbbüskarlardan biri, Ermənistan paralamentinin müstəqil deputatı Taquhi Tovmasyan qeyd edib ki, iclasa Xarici İşlər Nazirliyi, Ədliyyə Nazirliyi və Təhsil, Elm, Mədəniyyət və Mədəniyyət nazirliklərinin nümayəndələri dəvət edilib. "Amma ilk iki şöbənin nümayəndələri dərhal iştirakdan imtina etdilər, Təhsil və Elm Nazirliyinin nümayəndələri əvvəlcə razılaşdılar, lakin sonra iclasın başlamasına bir saat qalmış gəlməyəcəklərini bildirdilər. Bu o deməkdir ki, hər ehtimala qarşı müxalifət deputatlarının çağırdığı müzakirəyə qatılmamaq üçün siyasi sifariş var. Amma biz üzülmürük, onlarsız müzakirə edəcəyik, müraciətimizi beynəlxalq aləmə göndərəcəyik, Ermənistan hökumətinin səlahiyyətinə aid olan bütün problemləri qeydə alacağıq və onların həllində ardıcıllıq nümayiş etdirəcəyik", - deyə Tovmasyan bildirib.
Ermənistanın rəsmi qurumlarının boykot etdiyi iclasda artıq tarixdən silinən və onların diriltmək istədiyi "Artsax hökumətinin üzvləri və mədəniyyət sahəsinin nümayəndələri", erməni Qriqoryan kilsəsinin "Arsax yeparxiyasının" "rəhbəri", "yepiskop" Vrtanes Abrahamyan, BMT-nin İrəvan ofisinin və ATƏT-in Minsk Qrupunun həmsədr ölkələrinin səfirliklərinin nümayəndələri iştirak edib.
Müxalif "Ermənistan" fraksiyasından olan deputat Anna Qriqoryan deyib ki, hökumət strukturlarının nümayəndələrinin bu müzakirədə iştirakdan imtina etməsi təkcə müxalifətin təşəbbüsü ilə keçirilən dinləmələrlə bağlı demarş deyil, həm də Ermənistana bir mesajdır ki, bir dövlət, ümumiyyətlə, "Artsaxda" "tarixi və mədəni dəyərlərin" "qorunub saxlanması məsələsi ilə məşğul olmur, bu məsələni prioritet hesab etmir.
Guya Qarabağda onların "tarixi-mədəni dəyərləri" varmış (?).
"…Ermənistanın bugünkü və gələcək varlığı məhz bu qondarmalıqdan, saxtakarlıqdan əl çəkməkdən keçir"
Bu qondarma mövzu üzrə iclasın keçirilməsində iştirakdan Ermənistan hökumətinin nümayəndələrinin imtina etməsi, onu boykot etməsinə münasibət bildirən AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru, siyasi şərhçi Faiq Ələkbərli baki-xeber.com-a dedi ki, görünür, artıq Ermənistan hökuməti reallığı qəbul edir və bu kimi qondarma tədbirlərin sülh prosesinə mane olduğunun fərqindədir. "Bu qondarma tədbiri hökumətin boykot etməsi anlaşılandır. Çünki rəsmi İrəvan, Paşinyan hökuməti işin ciddiliyini anlayır və bilir ki, bu cür saxtakarlıqlarla, qeyri-real məsələlərlə, miflərlə irəli gedə bilməyəcəklər. Ermənistanın indiki hökuməti də özündən əvvəlki hökumətlərin saxtalarlıqlarını, qondarma iddialarını, uydurmalarını davam etdirəcəksə onlar bu bölgədə ümumiyyətlə yer tapa bilməyəcəklər. Yəni bu gün əllərində-ovuclarında olan, məkrli planlarla, havadarlarının köməyilə ələ keçirdikləri Azərbaycan ərazisindəki hazırda Ermənistan adlanan respublika və ya coğrafiyadan da məhrum ola bilərlər. Paşinyan hökuməti daha ağıllı və soyuqqanlı tərpənərək bu məsələlərdən uzaq durmağa çalışır və çalışmalıdır. Çünki həm Azərbaycanla Ermənistan arasında sülh müqaviləsinin bağlanması, həm də dediyimiz kimi, Ermənistanın bugünkü və gələcək varlığı məhz bu qondarmalıqdan, saxtakarlıqdan əl çəkməkdən keçir. Ona görə də Paşinyan hökumətinin nümayəndələrinin parlamentdə müxalifətçi deputatların təşəbbüsü ilə keçirilən bu qondarma mövzulu iclasda iştirak etməməsi doğru bir addımdır. Özü də erməni müxalifəti bu iclası Azərbaycanının dövlət müstəqilliyinin bərpası günü keçirib. Bu da təsadüfi deyil. Bu işi həyata keçirənlər bu kampaniya ilə bir tərəfdən Azərbaycanı qaralamaq məqsədi güdür, digər tərəfdən də Paşinyan hökumətini zərbə altında qoymaq istəyirlər. Ermənistandakı revanşist qüvvələr bu amillərdən istifadə edib hakimiyyətə gəlmək niyyəti güdürlər. Bunlar boş və mənasız cəhdlərdir.
Azərbaycan öz tarixi torpaqlarına sahib çıxır. Azərbaycanın tarixi torpaqları Qarabağla məhdudlaşmır, bunu Ermənistanın hökuməti də, müaxlifəti də, onları himayə edən qüvvələr də yaxşı bilir. Mənə elə gəlir ki, bu kimi addımlar Azərbaycanın öz tarixi torpaqlarına sahib çıxmasını daha çox yaxınlaşdırır. Bu baxımdan, hər halda Paşinyan hökuməti nisbətən təmkinli və soyuqqanlı davranaraq, heç olmasa əllərində-ovuclarında olan hazırkı 29 min kvadrat kilometri itirməməyin mübarizəsini aparır. Amma hökumət, yaxud hakimiyyətə can atanlar tərəfindən Azərbaycana qarşı böhtanlar, uydurmalar davam edərsə bu onlar üçün çox ağır nəticələrə gətirub çıxaracaq"-deyə müsahibimiz qeyd etdi.
F.Ələkbərli bildirdi ki, Ermənistan parlamentinin müxalifətdən olan deputatlarının keçirdikləri iclasda qaldırdıqları məsələ tamamilə reallıqdan uzaqdır.
"Erməni tərəfin Azərbaycanın qondarma və bütün anlamlarda artıq tarixin səhifəsindən silinmiş "Arsaxın" olmayan mədəni irsini guya "məhv etməsi" barədə iddiası qətiyyən qəbuledilməzdir. Çünki reallıqda nə "Arsax" vardı, nə də onun "mədəni irsi" ola bilərdi. Qarabağdakı irs bütövlükdə Azərbaycan xalqına məxsusdur və ermənilər işğal dövründə o irsi saxtalaşdırıblar. Çar Rusiyası tərəfindən ərazilərimizə köçürülən haylara Sovet dövründə hansısa qondarma bir nəsə yaratdılar, orda eyni zamanda hayların "mədəniyyətini" yaratmağa cəhd etdilər. Son nəticədə SSRİ dağıldıqdan sonra hər şey aydın oldu. Keçən əsrin 80-ci illərinin sonlarında xarici qüvvələrin əli və Ermənistanın himayədarlığı ilə qondarma "Dağlıq Qarabağ" oyuncaq rejimi yaratdılar. Ancaq bütün bunlar saxta və qondarma olmaqdan başqa bir şey deyildi. Çünki ordakı bütün mədəni irs Azərbaycan xalqına məxsusdur, oranın tarixi də Azərbaycan türkləri ilə bağlıdır. Qarabağın xristian irsi Azərbaycan türklərinin sərvətidir, tarixidir, mədəniyyətidir. Burada əsasən islam mədəniyyəti örnəkləri var, qismən də xristianlıq dövrünü əks etdirən abidələrdir. Bilirik ki, türklərin qədim inancı ola Tenqriçiliyə, Tanrıçılığa aid abidələr də orada ola bilərdi".
İradə SARIYEVA
