ABŞ Ermənistan ilə yüksələn hərbi əlaqələri tərifləyib və Rusiyanın regiondakı zərərli təsirinə qarşı çıxmağa çağırıb. Bu barədə ABŞ Qərargah Rəisləri Birləşmiş Komitəsinin sədri general Çarlz Braun Ermənistanın Baş qərargah rəisi Edvard Asryan ilə Vaşınqtonda görüşü zamanı söyləyib.
Görüşdə tərəflər Ermənistanın hərbi sahəsinin müasirləşdirilməsinə aid təşəbbüsləri müzakirə ediblər. Bu səylərə dəstək verilməsini təklif edən general Braun Rusiyanın regiondakı ziyanlı təsirindən narahatlıq bildirib, bu fəaliyyətə qarşı mübarizənin vacibliyini vurğulayıb. Ermənistanın Müdafiə Nazirliyi görüşə aid yekun bəyanatda getdikcə uzaqlaşdığı müttəfiqi Rusiyanın adını çəkməyib. Ermənistan ordusunda dəyişiklər və islahatlara dəstəyini təsdiqləyən ABŞ bu yaxınlarda Ermənistan Müdafiə Nazirliyinə hərbi müşavirini təyin edəcəyini açıqlayıb. Asryanın ABŞ-də görüşdüyü üç generaldan biri Mayk Miller xarici silahlı qüvvələrin təlim, məsləhət və təchizat məsələləri ilə məşğul qurumuna başçılıq edir. İki ölkənin hərbçiləri iyulda Ermənistanda bu il artıq ikinci birgə təlimlər keçirib. Birgə sülhməramlı əməliyyatlara aid təlimləri ölkəyə səfər edən üç amerikalı general izləyib. Rəsmi Moskva Rusiya-Ermənistan münasibətlərinin pişləşməsi fonunda keçirilən təlimləri pisləyib. Onlar bu təlimlərin iki ölkə münasibətlərinə növbəti zərbəni vuracağını deyib. Həmçinin əlavə ediblər ki, bununla Ermənistan öz təhlükəsizliyini daha böyük risk altına atır. Baş nazir Nikol Paşinyan fevralda ölkəsinin Rusiyanın aparıcı rol oynadığı Kollektiv Təhlükəsizlik Müqaviləsi Təşkilatındakı üzvlüyünü dondurub. O, Ermənistanın hərbi alyansı tərk edəcəyini dəfələrlə söyləyib. Bunlar fonunda Ermənistanın ABŞ silahları ilə təmini geniş vüsət alır. Xatırladaq ki, mətbuatın məlumatına görə, avqustun 2 və 3-də ABŞ-ın Rumıniya və Yaxın Şərqdəki hərbi bazalarından İrəvanın "Zvartnos" hava limanına iki hərbi təyyarə enib. Qeyd olunub ki, iki təyyarədən birində İran ərazisindən buraxılan raketlərin və başqa uçan aparatlarının trayektoriyalarını izləyən xüsusi qurğular olub. Bu zaman İran ərazisindən İsrailə mümkün hücum risqi xüsusilə nəzərə alınıb. Gətirilən qurğular Ermənistanın İranla sərhədində yerləşdirilib. ABŞ bu cihazları idarə edəcək heyətin sayını 30-50 nəfərə çatdırıb. Rusiya və İranın diqqətini İranla sərhəddə yerləşdiriləcək şəxsi heyətə cəlb etməmək üçün hərbçilər diqqətlə seçilib - onların əksəriyyəti Amerika ordusunda xidmət edən erməniəsilli ABŞ vətəndaşlarıdır, həmçinin postsovet ölkələrindən Ştatlara köçmüş slavyan və Qafqaz kökənli insanlardır. Şəxsi heyət Ermənistan Silahlı Qüvvələrinin hərbi geyimi ilə təchiz olunub və onun Zəngəzurdakı hərbi bazasında yerləşdirilib. Bütün bunlar region üçün ciddi təhdid yaradır. Hazırda görünən odur ki, ABŞ Ermənistanı Cənubi Qafqazda forpostu etməyə çalışır və bu istiqamətdə aktiv fəaliyyətə keçib. Son vaxtlar okeanın o tayından diplomatların, missionerlərin İrəvana səfərləri bir-birini əvəzləyir.
Bu günlərdə Ermənistan Təhlükəsizlik Şurasının katibi Armen Qriqoryan və ABŞ Müdafiə Kəşfiyyat İdarəsinin Avropa-Avrasiya Regional Mərkəzinin rəhbəri Patrik Prayor İrəvanda keçirilən görüşdə Ermənistanla ABŞ arasında əməkdaşlıq istiqamətlərini müzakirə ediblər. Tərəflər, xüsusilə, ikitərəfli gündəliyin bir sıra məsələləri ətrafında fikir mübadiləsi aparıblar. Ermənistanın təhlükəsizlik sisteminin modernləşdirilməsi üçün gələcək əməkdaşlığın istiqamətlərini müəyyən ediblər. O da faktdır ki, Azərbaycanın Qarabağ problemini öz gücü ilə həll etməsi, daha sonra Gürcüstanın müstəqil siyasət yoluna qədəm qoyması Qərbin Cənubi Qafqazda əl-qolunu bağladı. Nəticədə ABŞ və Avropa İttifaqı Cənubi Qafqazda manevr imkanlarını itirdi. Belə olan halda Qərb bölgəyə daxil olmaq üçün ən zəif bəndi – Ermənistanı oyuncağa çevirmək planını işə saldı. Rusiyadan incik düşən Paşinyan isə ölkəsinin qapılarını Qərbə taybatay açdı. Nəticədə Qərbin xeyir-duası ilə regionda sabitliyin pozulması yönündə təxribatlara start verilir. Ermənistan könüllü şəkildə bu prosesdə vasitəçi rolunu oynayır. Bütün bu planların əsası isə cari ilin aprelin 5-də qoyulub və artıq reallaşmaq üzrədir. Qeyd edək ki, Brüsseldə üçtərəfli ABŞ-Avropa Komissiyası-Ermənistan görüşündə qonşu dövlətə hərtərəfli yardımlar ayrılması qərara alınıb. Rəsmi Bakı buna etirazında bəyan etdi ki, görüş bölgədə sülh və təhlükəsizlik baxımından inklüziv deyil, Ermənistan sabitlik əleyhinə addımlarla şirnikləndirilir, gözlənilən neqativ nəticələr üçün məsuliyyət İrəvan və onun bu format üzrə tərəfdaşlarının üzərinə düşür. Lakin ABŞ üçün görünür ki, bu əhəmiyyət kəsb etmir. Ermənistan məqsəd üçün qurban seçilir.
Ramil QULİYEV
