"Qərbin gürcü elektoratına mesajı artıq tam dəqiqdir. Qərbdəkilər deyirlər ki, insanlar küçələrə çıxmalı və guya "oğurlanmış səsləri müdafiə etməlidirlər". Nəticədə qərbyönlü radikallar hakimiyyətə gəlməlidir". Belə bir açıqlama ilə gürcü politoloq Arno Xıdırbeqişvili çıxış edib.
O qeyd edir ki, Gürcüstan müxalifəti və qeyri-hökumət təşkilatları Qərbin sifarişi ilə gənclərin bir hissəsini siyasi fəaliyyət baxımından "şikəst" edib: "Qərbdəkilər istəyir ki, bu gənclər 27 oktyabrda küçəyə çıxsınlar. Xüsusən də tələbələr qlobalistlərin beşikdən zombi etdiyi adamlardır. Valideynlərinə deyirlər ki, biz Avropa tərzində, Avropada yaşamaq istəyirik". Xatırladaq ki, Gürcüstanda növbəti 4 il ərzində ölkəni kimin idarə edəcəyini müəyyən edəcək parlament seçkiləri oktyabrın 26-na təyin edilib. İlk dəfə seçkilər yalnız proporsional sistem üzrə, yəni partiya siyahıları əsasında və geniş miqyasda elektron texnologiyalardan - səslərin yoxlanılması və hesablanması aparatlarından istifadə edilməklə keçiriləcək. Hazırda hakim "Gürcü Arzusu-Demokratik Gürcüstan" partiyasının reytinqi yüksəkdir. Bu partiyanın müstəqil və çoxşaxəli siyasət yürütməsi isə Qərbdə müsbət qarşılanmır. O səbəbdən Gürcüstana təzyiqlər davam edir. Gürcüstan parlamentinin hakim partiyadan olan azərbaycanlı deputatı Savalan Mirzəyev bu fonda qeyd edir: "Artıq 12 ildir ki, Gürcüstan xalqının etimadını qazanırıq. Sağ olsun gürcü xalqı, bizə hakimiyyətdə qalmağa şərait yaradır. Ümidvaram ki, oktyabrın 26-da da biz yüksək faizlə xalqın dəstəyini yenidən qazanacağıq. Aparılan sosioloji sorğuların ilkin nəticələri bu inamı daha da artırır. Son sorğuda respondentlərin 60 faizindən çoxu hakim "Gürcü Arzusu-Demokratik Gürcüstan" partiyasını dəstəkləyib". Onun sözlərinə görə, əhali hakim partiyanın siyasi kursunu yaxşı bilir: "Hər kəs yaxşı bilir ki, bizim əsas məqsədimiz ölkədə sülhün qorunub saxlanılması və ölkəni inkişaf etdirməkdir". Deputat deyib ki, Avropa İttifaqı Gürcüstanla bağlı artıq bir neçə qərar və qətnamə qəbul edib: "Bu, daxili siyasətə müdaxilə sayılıb və söz azadlığını məhdudlaşdırmaq kimi qiymətləndirilib. Qərb ölkələri çalışırlar ki, hakim partiyanın rəhbərlərinə sanksiyalar tətbiq etsinlər. Fikirimcə, bu da bir növ onların müxalifətə humanitar dəstəyidir. Onlar çalışırlar müxalifət maksimum dərəcədə qalib gəlsin. Müxalifətin isə yerli xalqdan dəstəyi yoxdur. Ona görə də ölkədən kənardakı qüvvələrə müraciət edirlər ki, hansısa formada xaos yaradılsın, asayişi pozsunlar. Amma onlar buna nail ola bilməyəcəklər". Onun sözlərinə görə, Qərb bir neçə aydır ki, Gürcüstanda hakimiyyət dəyişikliyi yaratmaq istəyir: "Ölkə rəhbərliyi dəfələrlə bəyan edib ki, bizim ikinci cəbhə açmağa ehtiyacımız yoxdur. Əsas məqsəd ölkədə sülh və sabitliyin bərqərar olması, ölkənin inkişafı üçün ən gözəl şəraitin yaradılmasıdır". Deputatın sözlərinə görə, bu gün Gürcüstan-Azərbaycan əlaqələri heç zaman olmadığı qədər yüksək səviyyədədir: "İki ölkə arasındakı münasibətlər digər ölkələr üçün nümunədir. Hər iki ölkə liderlərinin bəyanatlarında da bu aydın görünür. Düşünürəm ki, məhz bu hakimiyyətin dövründə ikitərəfli münasibətlər daha da inkişaf edib və möhkəmlənib. Hakim partiyanın nümayəndəsi, parlamentlərarası dostluq qrupunun üzvü olaraq görürəm ki, bütün işlərə maksimum şəkildə məsuliyyətlə yanaşılır ki, bütün sahələrdə əlaqələrimiz inkişaf etsin".
Bu arada onu da qeyd edək ki, Qərb Gürcüstan prezidenti Salome Zurabişvili vasitəsilə ölkədə qarşıdurma yaratmağa daha çox "stavka" etməyə başlayıb. Müxalifətə açıq dəstək verən Zurabişvili parlament seçkiləri günü, yəni oktyabrın 26-da prezident administrasiyasının binasında həmin gün baş verəcəkləri izləmək üçün koordinasiya platforması yaradılacağını bəyan edib. Zurabişvili eyni zamanda əlavə edib: "O zaman biz qələbəni birlikdə qeyd edəcəyik". Hakimiyyət tərəfdarları Zurabişvilinin bu sözlərinə aydınlıq gətirməsini gözləyir. Qeyd olunur ki, Zurabişvilinin indidən seçkilərin nəticələrini bəyan etməsi hansısa məkrli plandan xəbər verir. Tiflisin meri Kaxa Kaladze bu məsələyə münasibət bildirib: "Gürcüstan prezidentinin müxalifətlə əməkdaşlığının heç bir əhəmiyyəti yoxdur. Bu müxalifətin, istər birləşmiş, istərsə də parçalanmış, istər Salome ilə, istərsə də onsuz, istər Şalikonun çardağı ilə, istərsə də onsuz sıfıra bərabər şansı var. Onların heç bir imkanları yoxdur, reallıq budur. Bu reallığı təhrif etmək, cəmiyyətə başqa cür təqdim etmək istəyirsinizsə, bu sizin işinizdir. Davam edə bilərsiniz, amma bugünkü reallıqda "Gürcü Arzusu"nun konstitusiya çoxluğu ilə qalib gəlmək imkanı var. Salome Zurabişvili qərargah qurduğunu dedi. Mən bunu təqdir edirəm, çünki o insanlar "Gürcü Arzusu"nun qələbəsini və konstitusiya çoxluğu ilə hakimiyyətə gəlməsini bizimlə birlikdə qeyd edəcəklər. Bugünkü şəraitdə radikalizmin, şərin nəsə bir uğur əldə etməsi imkansızdır". Ölkə parlamentinin deputatı İrakli Şatakişvili is qeyd edir ki, Zurabişvili, müxalifət və psevdoliberal, psevdo-Avropa qüvvələri Gürcüstanın dinc və sabit inkişafının əleyhinədirlər. Onun sözlərinə görə, 26 oktyabr - parlament seçkiləri yaxınlaşdıqca həmin qüvvələrin getdikcə daha da gərginləşən isterik, qeyri-dövlət tonu hakim siyasi komanda üçün təəccüblü deyil: "Bu qüvvələrin son illər Gürcüstanla bağlı heç bir real əsası olmayan fəal şəkildə yaydıqları saxta məlumatlar, Rusiyada mövcud olmayan bəzi qanunlar haqqında rəvayətlər, Gürcüstan əhalisini aldatmağa cəhd etmələri yalnız onu göstərir ki, bu insanların əsl Avropa dəyərlərinə heç bir aidiyyəti yoxdur. Biz seçkilər öncəsi əhali ilə fəal əlaqə saxlayırıq və Gürcüstan əhalisinin tələblərinin nədən ibarət olduğunu dəqiq bilirik. Gürcüstanın Avropaya inteqrasiyası, onun Avropa seçimi hakim "Gürcü Arzusu-Demokratik Gürcüstan" partiyasının siyasi komandası tərəfindən heç bir vaxt ikinci plana keçirilməyib və bu gün də bizim üçün prioritetdir".
Samirə SƏFƏROVA
