Dünya müstəvisində geosiyasi ziddiyyətlərin artması fonunda hərbi təhlükələrin və təhdidlərin miqyasının da genişlənməsi müşahidə olunur. Belə ki, bu təhdidlərin informasiya məkanına və ölkələrin daxili sferasına keçirilməsi cəhdləri müşahidə olunur.
Azərbaycan da İkinci Qarabağ müharibəsində qazandığı qələbədən sonra eyni problemlə üzləşib. O səbəbdən daxili məkanın ölkəmizə düşmən planların təsirindən qorunması zəruri şərtə çevrilib.
Milli və dövlət suverenliyinin bərpası təkcə ölkəmiz yox, dünya üçün də əhəmiyyətli hadisədir
Proseslər göstərir ki, əsas təhlükələrə Vətənin müdafiəsi sahəsində tarixi, mənəvi və vətənpərvərlik ənənələrini sarsıtmaq məqsədi ilə əhaliyə, ilk növbədə, ölkənin gənc vətəndaşlarına informasiya ilə təsir etmək məqsədi daşıyan fəaliyyətlər daxildir. Bu fonda gənclərə yönəlik zərərli təsir cəhdləri özünü qabarıq büruzə verir. Lakin bunların neytrallaşdırması məqsədilə dövlət tərəfindən ciddi preventiv tədbirlər də həyata keçirilir.
Vətən müharibəsinin tarixi təcrübəsinin ümumiləşdirilməsi erməni faşizmi üzərində qələbənin ümumdünya-tarixi əhəmiyyətini müəyyən etməyə, bu əhəmiyyəti açıqlayan əsas tezisi formalaşdırmağa imkan verir. Əvvəla, Azərbaycan bir dövlət kimi ərazi bütövlüyünü və suvernliyini bərpa etdi. Milli və dövlət suverenliyinin bərpası təkcə ölkəmiz yox, dünya üçün də əhəmiyyətli hadisədir. Bununla yanaşı, Azərbaycanın zəbt edilmiş ərazilərdə hədəf halında olan maddi və mənəvi mədəniyyəti xilas edildi, əvvəllər işğal olunmuş torpaqlar geri qaytarıldı. Şübhəsiz ki, illər ötdükcə bu qələbənin mahiyyəti və tarixi əhəmiyyəti bütün dünya üçün böyük məna kəsb edəcək. Azərbaycanda elə ailə, elə ev tapmaq olmaz ki, İkinci Qarabağ müharibəsinin itki, ağrı və məhrumiyyətləri ondan yan keçmiş olsun. Ona görə də erməni faşizminin qarşısını almaq üçün həyatlarını qurban vermiş Azərbaycan qəhərmanları bu gün də böyük minnətdarlıq hissi ilə yad edilir. Onların nümayiş etdirdiyi qəhrəmanlıq nümunələri xatirələrdə əbədi yaşayacaq. Qələbənin mühüm nəticələrindən biri ərazi bütövlüyünün qorunması və Azərbaycanın tarixi sərhədlərinin möhkəmlənməsidir. Mif, utopiya əsaslı erməni ideologiyasına son qoyiulması da böyük önəmə malik oldu. Yeni reallıq çərçivəsində Ermənistanın tarixi həqiqətlərlə razılaşıb sərhədlərin delimitasiya və demarkasiyası məsələsinə müsbət və həlledici mövqedən yanaşması da vacib nəticələrdən biridir. O da mühüm faktlardan biridir ki, Azərbaycan torpaqlarının işğaldan azad olunması ilə 30 ilə yaxın müddətdə BMT Təhlükəsizlik Şurasının kağız üzərində qalan məlum dörd qətnaməsinin tələbləri yerinə yetirildi, bölgədə yeni geosiyasi və geoiqtisadi reallıq yarandı. Bu hal Azərbaycanın beynəlxalq aləmdə mövqeyini daha da gücləndirib. Vətən müharibəsi erməni faşizminin iç üzünü bir daha dünyaya göstərdi. Müharibə dövründə düşmən döyüş meydanında məğlub olarkən yenə də insanlığa sığmayan ən çirkin əməllərə əl atdı. Ermənistan qadağan olunmuş silahlardan və ballistik raketlərdən istifadə edərək ölkəmizin şəhər və kəndlərinə müntəzəm olaraq atəş açmağa başladı.bunların bir çoxunun ildönümü elə bu günlərdə qeyd edilir.
Davam edən mina terroru ilə bağlı dünya ictimaiyyəti mütəmadi şəkildə məlumatlandırılır
İkinci Qarabağ müharibəsində qələbənin mühüm nəticələrindən biri də işğaldan azad edilmiş ərazilərə böyük qayıdış layihələrinin sürətlə həyata keçirilməsdir. Bu fonda ermənilərin davam edən mina terrorunun dünya ictimaiyyətinə çatdırlmasına da xüsusi diqqət yetirilir.
Təəssüf ki, işğaldan azad olunmuş ərazilərdə vətəndaşlarımızın, eləcə də xidməti vəzifələrini yerinə yetirən şəxslərin mina qurbanına çevrilməsi hallarına hələ də rast gəlinir. Baş verən hadisələr mina terrorunun bütövlükdə erməni terrorizminin yeni forması olduğunu bir daha sübut edir. Ermənistanın beynəlxalq hüquqa və humanitar dəyərlərə, insan hüquqlarına etinasız yanaşaraq hələ də mina xəritələrinin hamısını verməkdən imtina etməsi bu ölkənin mahiyyətin iifşa edir. Faktdır ki, Vətən müharibəsi nəticəsində torpaqlarımız işğaldan azad olunsa da, Ermənistan tərəfindən hərbi işğal dövründə Qarabağ torpaqlarının dağıntılara məruz qalması və minaların basdırılması keçmiş məcburi köçkünlərin evlərinə təhlükəsiz qayıtmasına çox böyük əngəldir. Beynəlxalq təşkilatlar, ayrı-ayrı ölkələrin parlamentləri, insan haqlarının müdafiəsi ilə məşğul olan qurumlar Azərbaycana qarşı davam etdirilən mina terroru haqqında məlumat alırlar. Xatırladaq ki, ermənilər həm işğal dövründə, həm də Ağdam, Kəlbəcər və Laçın rayonlarından çıxarkən bölgəyə çoxsaylı mina döşənilib, xeyli sayda partlamamış mərmi basdırılıb. Bütün çağırışlara baxmayaraq, Ermənistan postmüharibə dövründə həmin ərazilərin dəqiq xəritələrini Azərbaycana verməyib. O da faktdır ki, regionda sülh və əməkdaşlıq istədiklərini bəyan edən beynəlxalq təşkilatlar vaxtında öz öhdəliklərini yerinə yetirsəydi, təcavüzkara təzyiq göstərsəydi, nə müharibə olar, nə də mina partlayışı nəticəsində həlak olanlar olmazdı. Amma bunlar vaxtında edilmədi. O səbəbdən hesab olunur ki, indi mina terrorunun çözümü üçün zəruri addımlar atılmalıdır. Azərbaycan dövləti isə gücünün və qüdrətinin hesabına bu xüsusda da problemləri həll edəcək. Keçmiş məcburi köçkünlərin məskunlaşması bundan sonra da uğurla davam edəcək.
Tahir TAĞIYEVYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
