Əli Orucov: "Ermənistanın baş naziri Nikol Paşinyanın eyfopiyaya qapılması və reallıq hissini itirməsi hallarına mütəmadi rast gəlinir"
Bu günlərdə Ermənistanın baş naziri Nikol Paşinyan keçmişdə düşüncələri ilə dalana dirəndiyini, yəni depressiya keçirdiyini etiraf edib.
Belə ki, Ermənistan Respublikasının baş naziri Nikol Paşinyan informasiya texnologiyaları sahəsində çalışan "Render Forest" şirkətinə baş çəkib. Görüş zamanı şirkət rəhbərləri qeyd ediblər ki, şirkət istifadəçilərin video, qrafika, təqdimat, eləcə də internet saytları yarada biləcəyi onlayn dizayn platformasıdır.
Dövlət başçısı görüş zamanı çoxlarına qəribə gələ biləcək açıqlama vermək istədiyini bildirib: "Mənin optimizmim və qəribə bəyanat belədir. Etiraf etməliyəm ki, bu gün mən Ermənistanın gələcəyinə 2018 və ya 2019-cu illərlə müqayisədə daha nikbin baxıram. Əminəm ki, çoxlarına bu bəyanat qəribə gələcək və mən ilk dəfədir ki, kənar təsirlərin əhəmiyyətini vurğulamaq üçün bunu açıq elan edirəm. Bu da ondan irəli gəlir ki, 2018, 2019-cu illərdə mən gələcəyə aparan yollar haqqında düşünərkən keçəcəyimiz yolun davamını görməyərək, təfəkkür müstəvisində dalana dirənmişdim".
Nikol Paşinyan 2018, 2019-cu illərə nisbətən Ermənistanın gələcəyi barədə indi daha nikbin olduğunu dilə gətirib. Buna hazırda ciddi əsas varmı?
Əvvəla onu qeyd etmək yerinə düşərdi ki, erməni xalqının düşüncələri 2018-2019-cu illərə nisbətən indi eyforiyadan bir qədər kənarlaşıb. İndi "Böyük Ermənistan", "Dənizdən dənizə dövlət", "Qərbi Ermənistan", "Qarabağ Ermənistandir", "Yeni müharibə, yeni torpaqlar deməkdir" və s. kimi şüarların, ideyaların reallıqdan kənar - boş bir eyforiya olduğunu erməni cəmiyyətində anlayanların sayı çoxalmaqdadir. Nikol Paşinyan bunu nəzərdə tutub Ermənistanın gələcəyinə nikbin baxırsa, haqlıdır. Yəqin Nikol Paşinyan düşünür ki, bu yolla artıq o, ictimai şüuru xəstə olan cəmiyyəti sağalda, müasir dünya ictimaiyyətinə inteqrasiya edə biləcək. Amma dörd qonşudan üçünə qarşı torpaq iddiasında olan xəstə bir cəmiyyəti yaxın gələcəkdə müalicə etmək ağlabatan görünmür.
Bu xüsusda politoloq Əli Orucovun da fikirkərini öyrəndik: "Ermənistanın baş naziri Nikol Paşinyanın eyforiyaya qapılması və reallıq hissini itirməsi hallarına mütəmadi rast gəlinir. Bir müddət əvvəl irəli sürdüyü "sülh kəsişməsi", Ermənistanın kənar yerlərdə təhlükəsizlik çətiri axtarması və parlaq gələcəyi barədə səsləndirdiyi fikirlər bu qəbildəndir.
"Render Forest" informasiya texnologiyaları kompaniyasının Ermənistanda həyata keçirdiyi layihənin açılışında Paşinyanın gələcəklə bağlı söylədikləri əsası olmayan nikbinlikdir. O deyir ki, 2018 və 2019-cü illərlə müqayisədə Ermənistan daha yaxşı, daha inkişaf etmiş vəziyyətdədir və ölkəsinin gələcəyi parlaqdır. Doğrudur, keçmiş qondarma Dağlıq Qarabağ Ermənistan üçün də ağır siyasi, iqtisadi və maliyyə yükünə çevrilmişdi. Özü özünü təcrid durumuna salmışdı. Orduya milyardlarla vəsait xərcləyirdi. Qonşusu Azərbaycanla müharibə vəziyyətində idi və s. İndi də müsbətə doğru heç nə dəyişməyib. Dəyişən separatçı rejimin süqutu, Azərbaycanın öz ərazilərini geri qaytarması və 30 ilə yaxın sürən münaqişənin bitməsidir. Ermənistan Azərbaycan və Türkiyə ilə münasibətlərini normallaşdırmasa və sülh sazişi imzalamasa, gələcəyi parlaq yox, qaranlıq olaraq qalacaq. Bu gün Ermənistan Cənubi Qafqazın ən qeyri-stabil, ən zəif inkişaf etmiş və xarici gəlirlərdən asılı olan ölkəsidir. İqtisadi və geopolitik vəziyyətinə görə də cəlbedici deyil.
"Render Forest" kompaniyasının 30 milyon dollarlıq sərmayəsindən vəcdə gələn Paşinyan anlamalıdır ki, qeyri-stabil və qonşuları ilə münasibətləri normal olmayan ölkəyə heç bir biznesmen və yaxud şirkət investisiya qoymağa risq etməz. Göründüyü kimi, dayanıqlı sülh və təhlükəsizlik Ermənistan üçün daha vacibdir.
Dəniz NƏSİRLİ
