Qonşu Gürcüstana münasibətdə Qərb özünün əsl sifətini ortaya qoymaqda, bu ölkəyə vassal kimi yanaşdığını nümayiş etdirməkdədir. Gürcüstanın buna etiraz etməsi isə Qərb tərəfindən təhdidlə qarşılanır, müxtəlif təzyiq alətləri işə salınır. Hazırda görünən odur ki, Tiflisin müstəqil siyasət yürütməsinə Qərb etiraz edir, onu Avropa ailəsinə buraxmamaqla hədələyir.
Bunlar fonunda "Gürcü arzusu" partiyasının yaradıcısı Bidzina İvanişvili bildirib ki, onun partiyası Tiflisin ləyaqətini qoruyaraq, Avropa İttifaqına daxil olması üçün lazım olan hər şeyə malikdir: "Cavab olaraq xarici qüvvələr hələ də müharibə, xaos və yoxsulluq istəyir, bu da ölkənin məhvinə gətirib çıxarır". Bu arada Brüsseldə keçirilən Avropa İttifaqı sammitində qurumun liderləri Gürcüstan hakimiyyətinin öz ölkələrinin Avropaya inteqrasiyasını təhlükə altına atdığını iddia ediblər. Xatırladaq ki, Tiflis 2023-cü ilin dekabrında Avropa İttifaqına üzv olmaq üçün namizəd statusu alıb, sonra isə xarici agentlərə və cinsi azlıqlara qarşı bir sıra qanunlar qəbul edib. Eyni zamanda, Gürcüstan rəhbərliyi konkret siyasətçilərin və ya onların ölkələrinin adını çəkmədən Qərbin müətyyən qüvvələrini Gürcüstanda Rusiyaya qarşı ikinci cəbhə açmağa çalışmaqda ittiham edir. Bu baxımdan Avropa dövlətlərinin başçıları Tiflisin Moskva ilə yaxınlaşmağa doğru getdiyini bəyan edərək, oktyabrın 26-na təyin edilmiş parlament seçkilərinə bəri başdan kölgə salmağa çalışırlar. Almaniya xarici işlər nazirinin müavini Anna Luhrmann da Avropa İttifaqında hökm sürən əhval-ruhiyyənin bu yöndə olduğunu təsdiqləyib. Onun sözlərinə görə, Avropa İttifaqı gürcülərin Avropa istəklərini dəstəkləməkdə davam edəcək, lakin onların hazırkı hökumətini yox: "Gürcüstan xalqının öz yolunu sərbəst seçmək hüququna malik olması vacibdir. Ona görə də azad və ədalətli seçkilər həqiqətən vacib məsələdir". Bu bəyanatın sətirləri arasında müxalifətin qələbəsinə ümid bəsləmək dəqiq sezilir. Ona görə də bir il əvvəl "Gürcü arzusu"nun barışmaz rəqibinə çevrilən Gürcüstan prezidenti Salome Zurabişvili "Financial Times" qəzetinə müsahibəsində hadisələri qabaqcadan görmək qərarına gəlib. Onun fikrincə, hakimiyyətdə olan partiya yalnız seçici saxtakarlığı yolu ilə qalib gələ bilər. Eyni zamanda o, 2012-ci ildən "Gürcü arzusu"nun cəmiyyəti qütbləşdirmək və əhalini qorxutmaq siyasəti yürütdüyünü vurğulayıb: "Rusiyada var-dövlət qazanmış oliqarx Bidzina İvanişvilinin rəhbərlik etdiyi "Gürcü arzusu" hökumət rəsmilərinə ona səs vermələri üçün təzyiq edir, müxalifət fəallarına hücum edir, jurnalistləri hədələyir və xaricdə yaşayan vətəndaşların səs verməsini çətinləşdirir".
Öz növbəsində, Avropa diplomatiyasının rəhbəri Josep Borrell Gürcüstan hakimiyyətini avtoritarizmə doğru getməkdə ittiham edib: "Hakim partiyanın son hərəkətləri, bəyanatları və seçki vədləri ölkəni Avropa yolundan uzaqlaşdırır və avtoritarizmə doğru gedişi ifadə edir... Bilirsiniz ki, Avropa Komissiyası Avropanın maliyyə vəsaitlərinə çıxışla bağlı qərar qəbul edir. Ona görə də gəlin Gürcüstan demokratiyası və onun Avropaya inteqrasiyası üçün həlledici sınaq olacaq parlament seçkilərini gözləyək". Lakin "Gürcü arzusu" ümidsizliyə qapılmır. Məsələn, Tiflisin meri Kaxa Kaladze bildirib ki, müasir Avropa İttifaqı SSRİ-dən heç nə ilə fərqlənmir, ona görə də ora inteqrasiyaya ehtiyac yoxdur: "Mədəniyyətimizdən və adət-ənənələrimizdən imtina etməliyiksə, Aİ-yə daxil olmağımızın nə fərqi var?". Bundan əlavə, baş nazir İrakli Kobaxidze seçicilərini əmin edib ki, Rusiya-Ukrayna münaqişəsi bitən kimi Avropa İttifaqı və ABŞ onun hökumətinə münasibətini dəyişəcək: "Bizim üçün bir şey vacibdir. Ukraynada döyüşlər bitən kimi – və bu gələn il də olacaq – Aİ və ABŞ ilə münasibətlər bərpa olunacaq... Birinci cəbhə bitən kimi ikinci cəbhənin Gürcüstana marağı dərhal dayandırılacaq". Eyni zamanda, "Gürcü arzusu"nun nümayəndələri israr edirlər ki, onları seçicilərin təxminən 60%-i dəstəkləyir. Bu baxımdan, hakim elita müxalifətin seçkilərdə qələbə qazanacağına inanmır, lakin xəbərdarlıq edir ki, onların rəqibləri xarici tərəfdaşların dəstəyi ilə iğtişaşlar yarada bilər. Lakin təhlükəsizlik qüvvələri "Gürcü arzusu"nun qələbəsini müdafiə edəcəkləri üçün onların sonu heç nə ilə bitməyəcək. Bundan sonra qaliblər müxalifəti vətənə xəyanətdə ittiham edərək məhkəmə prosesini təşkil etmək arzusundadırlar. Artıq iqtidaryönlü ictimai təşkilatlar müxalifətə səs verməyə hazır olanları təqib etməyə çağırır. Məsələn, "Birləşmiş Neytral Gürcüstan" hərəkatı müxalifətçiləri "övladlarını və ölkənin gələcəyini məhv etməkdə" ittiham edib. Düzdür, gürcülərin əksəriyyəti gələcək dəyişikliklərdən o qədər də narahat deyil. Gürcü analitik Demuri Giorxelidze bildirir: "Əgər siz mediadakı yazılara diqqət yetirməsəniz və siyasi fəallarla ünsiyyət qurmasanız, bir həftədən sonra ümumiyyətlə seçkilərin olmayacağını düşünə bilərsiniz. Bütün bu qütbləşmə və çevrilişə hazırlıq əsasən mediada baş verir. Eyni zamanda, insanların çoxu siyasətlə qətiyyən maraqlanmır". Bu arada Gürcüstan Milli Statistika Xidmətinin oktyabrın 15-də açıqladığı məlumatlara görə, 2014-cü ildən 2023-cü ilə qədər 815 608 nəfər ölkəni tərk edib. Eyni zamanda, 2022-ci ildə əhalinin xaricə axını 118 min nəfər, 2023-cü ildə isə demək olar ki, 163,5 min nəfər təşkil edib ki, bunun da 70 faizini 30 yaşadək gənclər təşkil edib. Ümumilikdə respublikada 3,7 milyondan az insan yaşayır. Onları isə Qərb öz əsarəti altına almağa çalışır.
Samirə SƏFƏROVA
