Arzuxan Əlizadə: "Nə etsələr də öz məqsədlərinə çata bilməyəcəklər"
Ermənistan anti-Azərbaycan təbliğatını son günlər daha da genişləndirib. Dünyanın aparıcı ölkələrinin media orqanlarında və sosial şəbəklərdə Azərbaycan əleyhinə kampaniya aparan erməni millətçiləri COP29 ərəfəsində ölkəmizin imicinə zərbə vurmaq üçün dəridən-qabıqdan çıxırlar.
Ermənistanın keçmiş xarici işlər naziri Vardan Oskanyan da Azərbaycan əleyhinə aparılan böhtan kampaniyasının ideya vericilrindəndir. Keçmiş xarici işlər naziri ABŞ-nin aparıcı "Newsweek" jurnalına müsahibəsində yalnız Azərbaycan haqqında danışıb. Diqqəti çəkən məqam odur ki, Oskanyan Bakıda həbsdə olan erməni hərbi cinayətkarların azad edilməsi üçün ən yaxşı vasitənin COP29 olduğunu bildirib. O qeyd edib ki, yalnız COP29 zamanı Azərbaycana təzyiq etməklə məqsədlərinə çata bilərlər: "Vaxt azdır. ABŞ, Avropa İttifaqı və demokratik təşkilatlar COP-29-dan erməni məhbusların azad edilməsini tələb etmək üçün rıçaq kimi istifadə etməkdə liderlik etməlidir".
Ay sən öləsən! Bunların planına bir bax. Hesab edirlər ki, guya bu yolla Azərbaycanı separatçı quldurları azad etməyə məcbur edəcəklər.
"Heç bir qüvvə bizi separatçı qatillərlə bağlı güzəştə getməyə məcbur edə bilməz"
Sözügedən məsələni "Bakı-Xəbər"ə şərh edən AMİP sədri Arzuxan Əlizadə hesab edir ki, ermənilərin COP29 amilindən Azərbaycana qarşı sui-istifadə edəcəkləri təxmin edilirdi: "Oskanyan olduqca təcrübəli, o cümlədən hiləgər bir diplomatdır. O fərqindədir ki, COP29 tədbiri Azərbaycan üçün necə önəmli və həssas bir tədbirdir. Ona görə də bunu bizim üçün zəif bənd hesab edib oradan vurmaq istəyirlər. ABŞ-da 60 ermənipərəst konqresmenin Dövlət Departamentinə müraciəti, Niderland Parlamentinin Nümayəndələr Palatası tərəfindən Azərbaycan əleyhinə birtərəfli və qərəzli 2 qətnamə qəbul edilməsi, bu ölkənin xarici işlər nazirinin bu qətnamələrə dəstək verməsi və buna bənzər digər təşəbbüslər təsadüfi deyil. Bu, Azərbaycana qarşı olan qüvvələrin bu həssas məqamdan maksimum istifadə etməyə çalışdıqlarının göstəricisidir. Bütün bunları "koordinasiya" edən də məhz erməni lobbisidir. Oskanyan Ermənistanda revanşist qanadın əsas odioz fiqurlarından biridir. Levon Ter-Petrosyanın prezidentliyi dövründə o, Ermənistan xarici işlər nazirinin birinci müavini, Robert Köçəryanın prezidentliyi dövründə isə xarici işlər naziri olub. O, bu müddət ərzində sülh danışıqlarına zərrə qədər hansısa töhfə verməyib. Bütün vasitələrlə danışıqları bir diplomat olaraq dalana sürükləyib. Ancaq nə etsələr də öz məqsədlərinə çata bilməyəcəklər. Çünki bu günlərdə separatçıların həbs müddəti uzadıldı. Ona görə ki, onların əli Azərbaycan xalqının qanına batıb və bununla bağlı ortada çoxsaylı faktlar var. Üstəlik, separatçılarla bağlı məhkəmənin hələ keçirilmədiyi və onun hökmünün elan olunmadığını nəzərə alsaq, istənilən halda onlar azad edilməyəcəklər. Bu istiqamətdə hansısa xarici təzyiqlər üzündən Azərbaycanın geri addım atması mümkünsüzdür. Azərbaycan elə bir güclü mövqedədir ki, heç bir qüvvə bizi separatçı qatillərlə bağlı güzəştə getməyə məcbur edə bilməz".
Vidadi ORDAHALLI
